యుద్ధం ముగింపునకు ఇరాన్ కు అమెరికా విధించిన షరతులేంటి..?

యుద్ధాన్ని ముగించేదిశగా అడుగులైతే పడుతున్నాయి. కానీ అవి గట్టి అడుగులా కాదా అన్నది తేల్చడమే కష్టమవుతోంది. ఎందుకంటే అమెరికా పంపించిన ప్రత్యామ్నాయ ప్రతిపాదనలను.. ఇరాన్ పూర్తిగా స్టడీ చేసి, ఆపై తన రియాక్షన్ తెలపాల్సి ఉంటుంది. ఇంతకూ యుద్ధవిరమణ జరగాలంటే అమెరికా విధించిన షరతులేంటి..

యుద్ధాన్ని ముగించే ఒప్పందంలో భాగంగా ఇరాన్ తన యురేనియం శుద్ధి సామర్థ్యాన్ని గణనీయంగా తగ్గించుకోవాలన్నది అమెరికా ప్రధాన షరతుగా కనిపిస్తోంది. ఇదే విషయాన్ని అమెరికా ఉపాధ్యక్షుడు జేడీ వాన్స్ కూడా స్పష్టం చేశారు. అయితే గతంలో ఇరాన్ దగ్గర అస్సలు యురేనియం ఉండకూడదని గట్టిగా భీష్మించుకు కూర్చున్న అమెరికా వైఖరిలో కాస్త మార్పు వచ్చినట్లు కనిపిస్తోంది.

మరోవైపు, ఇరాన్‌పై అమెరికా-ఇజ్రాయెల్ యుద్ధం ఎనిమిదో నెలలోకి ప్రవేశిస్తున్న తరుణంలో వాషింగ్టన్ నిజంగా చర్చలు కోరుకుంటుందా అని టెహ్రాన్‌లోని అధికారులు ప్రశ్నించారు. అయితే ఇరాన్ ముందు యురేనియం శుద్ధి అంశం కన్నా మరింతముఖ్యమైన అంశాలున్నాయని విదేశీ వ్యవహారాల నిపుణులు చెబుతున్నారు.చమురు ఎగుమతులపై ఆంక్షలు, స్తంభింపజేసిన ఆస్తులు, అమెరికా నావికా దిగ్బంధనం మరియు ప్రాంతమంతటా జరుగుతున్న పోరాటాల గురించే ఇరాన్ నాయకత్వం ఎక్కువగా ఆందోళన చెందుతోందని వారు భావిస్తున్నారు.

ఇరాన్ తన యురేనియం శుద్ధి నిలిపివేత ద్వారా అణ్వాయుధాలను అభివృద్ధి చేయబోమనే తన నిబద్ధతను ప్రదర్శించాల్సిన అవసరం ఉందని వాన్స్ తెలిపారు. “మీకు అణ్వాయుధం వద్దు అనుకుంటే, మీకు 60 శాతం సుసంపన్నమైన ఇంధనం ఎందుకు అవసరం?” అని ఆయన ప్రశ్నించారు.

యురేనియంను సుసంపన్నం చేయడం వల్ల దానిని అణు రియాక్టర్లకు ఇంధనంగా లేదా, ఇంకా అధిక స్థాయిలో, అణ్వాయుధాల తయారీకి ఉపయోగపడేలా చేయవచ్చు. ఇరాన్ యురేనియంను 60 శాతానికి సుసంపన్నం చేసిందని, ఇది ఆయుధ-శ్రేణిగా పరిగణించబడే సుమారు 90 శాతం కంటే తక్కువని అంతర్జాతీయ అణుశక్తి సంస్థ (IAEA) నివేదించింది. మే 2025లో జరిపిన తన అంచనాలో, ఒక వ్యవస్థీకృత అణు కార్యక్రమానికి సంబంధించిన విశ్వసనీయమైన ఆధారాలు ఏవీ దానికి లభించలేదు.

హోర్ముజ్ జలసంధిపై ఇరాన్ “పూర్తి నియంత్రణ కోల్పోయిందని” .. దాని ఆర్థిక వ్యవస్థ “పూర్తిగా పతనం అంచున ఉందని” కూడా ట్రంప్ తెలిపారు. మరోవైపు.. అమెరికాకు చర్చల విషయంలో చిత్తశుద్ధి లేదన్నారు ఇరాన్ నేతలు. తాము చర్చలకు వచ్చినప్పుడల్లా, వెంటనే తమ దేశంపై అమెరికా దాడులు చేస్తోందని వివరించారు.