నవరాత్రి ‘గ్లో డ్రిప్’ ట్రెండ్.. Gen Zకు పట్టిన ఈ కొత్త పిచ్చి ఏంటి?

ఏదైనా పండుగకు ముందు ఫేషియల్స్ చేయించుకోవడం కామన్ గా జరిగేదే. కానీ ఇప్పుడు ముఖానికి గ్లో రావాలంటే ఏకంగా రక్తంలోకే విటమిన్లు ఎక్కించుకుంటున్నారు కొందరు యువత. నవరాత్రుల్లో తొమ్మిది రోజుల పాటు గర్బా ఆడుతూ అలసిపోకుండా ఉండాలని, ఫొటోల్లో మెరిసిపోవాలని ‘గ్లో డ్రిప్స్’ వైపు మొగ్గు చూపుతున్నారు. ఈ ట్రీట్‌మెంట్ కోసం రూ.15 వేల వరకు ఖర్చు చేస్తున్నారు. అసలేంటీ గ్లో డ్రిప్? నిజంగానే దీనివల్ల ముఖం మెరుస్తుందా? ఆరోగ్యపరమైన సమస్యలు వస్తాయా?

ఫేషియల్స్ నుంచి ‘గ్లో డ్రిప్స్’ వరకు.. ఇదేం కొత్త ట్రెండ్!

నవరాత్రులు వచ్చాయంటే గుజరాత్‌లో సందడే సందడి. రంగురంగుల దుస్తులు, ట్రెండీ మేకప్, స్నేహితులతో కలిసి గర్బా నృత్యాలు.. ఇలా తొమ్మిది రోజుల పాటు పండుగ వాతావరణం నెలకొంటుంది. ముఖ్యంగా యువత ఈ వేడుకలను సోషల్ మీడియాలోనూ ఘనంగా సెలబ్రేట్ చేసుకుంటుంది. ఫొటోలు, రీల్స్‌లో అందంగా కనిపించాలనే ఆసక్తి కూడా ఎక్కువే.

అయితే, ఈసారి నవరాత్రుల ముందు అహ్మదాబాద్‌లో మరో కొత్త ట్రెండ్ చర్చకు వచ్చింది. అదే ‘గ్లో డ్రిప్’ (Glow Drip). సాధారణంగా చర్మం మెరుస్తూ కనిపించాలని ఫేషియల్స్, బ్యూటీ ట్రీట్‌మెంట్లు చేయించుకుంటారు. కానీ ఇప్పుడు కొందరు యువత అంతటితో ఆగకుండా, విటమిన్లు, ఇతర పోషకాలను నేరుగా రక్తంలోకి పంపించే ఐవీ డ్రిప్ థెరపీని ఎంచుకుంటున్నారు.

సోషల్ మీడియాలో వెల్‌నెస్, బ్యూటీ ట్రీట్‌మెంట్లపై పెరుగుతున్న ఆసక్తి ఈ ట్రెండ్‌కు కారణాల్లో ఒకటిగా కనిపిస్తోంది. అయితే, ఇది కేవలం Gen Zకే పరిమితం కాలేదు. పని ఒత్తిడితో అలసిపోయే 30, 40 ఏళ్ల వయసున్న ఉద్యోగులు కూడా ఇలాంటి ట్రీట్‌మెంట్లపై ఆసక్తి చూపుతున్నట్లు తెలుస్తోంది.

ఒక్క సెషన్‌కు రూ.10 వేలు.. ప్యాకేజీ ధర రూ.15 వేలు!

అహ్మదాబాద్‌లోని కొన్ని ప్రత్యేక క్లినిక్‌లలో ఒక్క ఐవీ డ్రిప్ సెషన్‌కు రూ.4,000 నుంచి రూ.10,000 వరకు ఖర్చవుతోంది. నవరాత్రుల సందర్భంగా అందించే కొన్ని మల్టీ సెషన్ ప్యాకేజీల ధర రూ.15,000 వరకు ఉంటోంది. క్లినిక్, ఉపయోగించే పదార్థాలు, ట్రీట్‌మెంట్ ఫార్ములాను బట్టి ధర మారుతుంది.

అంటే, ముఖానికి గ్లో రావాలనే ఆశతో కొందరు వేల రూపాయలు ఖర్చు చేస్తున్నారు. మరికొందరు రాత్రివేళల్లో గంటల తరబడి గర్బా ఆడేందుకు కావాల్సిన శక్తి లభిస్తుందని ఆశిస్తున్నారు.

అయితే, ఈ ట్రీట్‌మెంట్‌కు అంత ఖర్చు చేస్తున్నారంటే నిజంగానే అద్భుతమైన ఫలితాలు వస్తున్నాయా? అనేదే అసలు ప్రశ్న. ఐవీ డ్రిప్ ద్వారా కొన్ని పదార్థాలు నేరుగా రక్తప్రవాహంలోకి చేరతాయి. కానీ అవి శరీరానికి అవసరమైన మోతాదులోనే ఉన్నాయా? ఆ వ్యక్తికి నిజంగా వాటి అవసరం ఉందా? అనే అంశాలు కూడా ముఖ్యమే.

అసలు ఈ డ్రిప్స్‌లో ఏం ఉంటుంది?

ఈ ఐవీ డ్రిప్స్‌లో విటమిన్ సి, బి-కాంప్లెక్స్ విటమిన్లు, జింక్, గ్లుటాథియోన్ వంటి పదార్థాలను ఉపయోగిస్తున్నట్లు చెప్తున్నారు. వీటిని చర్మం మెరుపు, అలసట తగ్గింపు, శక్తి పెంపు వంటి ప్రయోజనాల కోసం అని ప్రచారం చేస్తున్నారు.

సాధారణంగా మన శరీరానికి అవసరమైన విటమిన్లు, ఖనిజాలు సమతుల్య ఆహారం ద్వారా అందుతాయి. కొన్ని సందర్భాల్లో పోషకాల లోపం లేదా నిర్దిష్ట వైద్య అవసరం ఉంటే వైద్యులు సప్లిమెంట్లను సూచించవచ్చు. అయితే, పోషకాల లోపం లేని వ్యక్తులు అదనంగా విటమిన్లు తీసుకుంటే మరింత అందంగా కనిపిస్తారని లేదా ఎక్కువ శక్తి పొందుతారని చెప్పడానికి బలమైన శాస్త్రీయ ఆధారాలు లేవు.

ముఖ్యంగా గ్లుటాథియోన్ వంటి పదార్థాలను నేరుగా రక్తంలోకి ఎక్కించడం వల్ల చర్మం తెల్లగా మారుతుందని లేదా తప్పనిసరిగా గ్లో వస్తుందని హామీ ఇవ్వలేం. సోషల్ మీడియాలో కనిపించే ప్రచారాన్ని వైద్యపరంగా నిరూపితమైన ఫలితంగా భావించకూడదు.

వైద్యుల హెచ్చరిక.. అందరికీ ఈ ట్రీట్‌మెంట్ అవసరం లేదు!

ఈ ట్రెండ్ విషయంలో జాగ్రత్త అవసరమని డాక్టర్లు హెచ్చరిస్తున్నారు. ఐవీ డ్రిప్స్‌ను సాధారణ బ్యూటీ పార్లర్ ట్రీట్‌మెంట్‌లా చూడకూడదని, ఇవి వైద్య పర్యవేక్షణలోనే తీసుకోవాల్సిన చికిత్సలని ఆమె స్పష్టం చేశారు.

వ్యక్తి ఆరోగ్య పరిస్థితిని అంచనా వేయకుండా, అవసరం ఉందో లేదో తెలుసుకోకుండా అధిక మోతాదులో విటమిన్లు లేదా ఇతర పదార్థాలను శరీరంలోకి ఎక్కించడం ప్రమాదకరమని హెచ్చరించారు. వైద్యుల పర్యవేక్షణ లేకపోతే అలర్జీ ప్రతిచర్యలు, ఇన్ఫెక్షన్లు, శరీరంలో ద్రవాలు అధికంగా చేరడం వంటి సమస్యలు తలెత్తవచ్చు. ఉపయోగించే పదార్థాలు, వాటి మోతాదును బట్టి ఇతర దుష్ప్రభావాలు కూడా ఉండొచ్చు.

అందుకే కేవలం గ్లో రావాలనే ఆశతోనో, స్నేహితులు సూచించారనో, సోషల్ మీడియాలో ట్రెండ్ అవుతోందనో ఐవీ డ్రిప్ తీసుకోవడం సరైన నిర్ణయం కాదు. ఈ చికిత్స అవసరమా కాదా అనేది అర్హత కలిగిన వైద్యుడే నిర్ణయించాలి.

చివరగా.. గ్లో కోసం ఇంత ఖర్చు అవసరమా?

నవరాత్రుల్లో అందంగా కనిపించాలనుకోవడం, ఉత్సాహంగా గర్బా ఆడాలనుకోవడం సహజమే. కానీ అందుకోసం ఖరీదైన చికిత్సలను ఎంచుకునే ముందు వాటి ప్రయోజనాలు, ప్రమాదాలను అర్థం చేసుకోవడం ముఖ్యం. సరైన నిద్ర, సమతుల్య ఆహారం, తగినంత నీరు, విశ్రాంతి కూడా శరీర ఆరోగ్యానికి కీలకం.

‘గ్లో డ్రిప్’ ట్రెండ్ ఇప్పుడు బ్యూటీ, వెల్‌నెస్ ప్రపంచంలో ఆసక్తిని రేకెత్తిస్తున్నా.. దాని ప్రచారం వెనుక ఉన్న ప్రతి వాదనకు శాస్త్రీయ ఆధారాలు ఉన్నాయని అనుకోకూడదు.

ఫొటోల్లో గ్లో కోసం రూ.15 వేలు ఖర్చు చేయడం ఒక ఎత్తయితే.. ఆ గ్లో కోసం ఆరోగ్యంతో రిస్క్ తీసుకోవడం మరో ఎత్తు. ట్రెండ్‌ను ఫాలో అయ్యే ముందు ఒక్కసారి ఆలోచించడం మాత్రం తప్పనిసరి!

—సూర్య ప్రకాష్ జోశ్యుల