Retail Inflation: ఫిబ్రవరిలో 3.21 శాతానికి చేరిన రిటైల్ ద్రవ్యోల్బణం!

దేశంలో సామాన్యుడిపై ధరల భారం స్వల్పంగా పెరిగింది. ఈ ఏడాది ఫిబ్రవరి నెలకు సంబంధించిన వినియోగదారుల ధరల సూచీ (CPI) ఆధారిత రిటైల్ ద్రవ్యోల్బణం (Retail Inflation) 3.21 శాతానికి ఎగబాకింది. జాతీయ గణాంక కార్యాలయం (NSO) గురువారం విడుదల చేసిన తాజా డేటా ప్రకారం.. జనవరిలో 2.75 శాతంగా ఉన్న ద్రవ్యోల్బణం, నెల రోజుల వ్యవధిలో 47 బేసిస్ పాయింట్లు పెరిగింది. కేంద్రం కొత్తగా పరిగణనలోకి తీసుకున్న ‘2024 బేస్ ఇయర్ (ఆధారిత సంవత్సరం)’ సిరీస్ లెక్కల ప్రకారం ఈ ద్రవ్యోల్బణాన్ని మదింపు చేశారు.

ద్రవ్యోల్బణం పెరుగుదలకు కారణాలు..
అంతర్జాతీయ పరిణామాలు, దేశీయ మార్కెట్ డిమాండ్ కలగలిపి రిటైల్ ద్రవ్యోల్బణాన్ని (Retail Inflation) పైకి నెట్టాయి. ముఖ్యంగా పశ్చిమాసియా (Middle East)లో నెలకొన్న తీవ్ర యుద్ధ వాతావరణం, భౌగోళిక రాజకీయ ఉద్రిక్తతల కారణంగా అంతర్జాతీయ వాణిజ్య మార్గాల్లో ఏర్పడిన అంతరాయాలు, తద్వారా ముడి చమురు (Crude Oil) ధరలు మళ్లీ పుంజుకోవడం ప్రధాన కారణం. దీనికి తోడు నిత్యావసరాలైన కూరగాయలు, తృణధాన్యాలు, దుస్తులు, రోజువారీ వినియోగ వస్తువుల ధరలు పెరిగాయి. మరోవైపు బంగారం, వెండి లాంటి విలువైన లోహాల ధరల్లో వచ్చిన భారీ పెరుగుదల కూడా ద్రవ్యోల్బణం (Retail Inflation) పైకి వెళ్లడానికి గట్టిగా దోహదపడింది.