Nagababu: జనసేన శిబిరంలో కదలిక.. హిందూ ధర్మం, వైసీపీపై నాగబాబు ఘాటు వ్యాఖ్యలు..

జనసేన పార్టీ (Jana Sena Party) జనరల్ బాడీ సమావేశంలో అధినేత పవన్ కళ్యాణ్‌ (Pawan Kalyan) చేసిన తీవ్ర వ్యాఖ్యలు ఇప్పుడు రాజకీయ వర్గాల్లో పెద్ద చర్చకు దారి తీశాయి. తిరుమల లడ్డూ (Tirumala Laddu) వ్యవహారంపై అధికార, ప్రతిపక్ష పార్టీల మధ్య మాటల యుద్ధం నడుస్తున్న సమయంలో జనసేన నేతలు మౌనంగా ఉండటంపై పవన్ తీవ్ర అసంతృప్తి వ్యక్తం చేసిన విషయం తెలిసిందే. పార్టీ తరఫున తానే ఒక్కడే మాట్లాడాలా? పదవుల్లో ఉన్న నాయకులు ఎందుకు స్పందించడం లేదని ఆయన ప్రశ్నించడం జనసేన శిబిరంలో కదలికను తీసుకొచ్చిందనే అభిప్రాయం వ్యక్తమవుతోంది.

ఈ అసంతృప్తి కాకినాడ ఎంపీ ఉదయ్ శ్రీనివాస్‌ (Uday Srinivas) తో పాటు ఎమ్మెల్సీ నాగబాబు‌ (Nagababu) పైనా వ్యక్తమైందని కథనాలు రావడంతో, వెంటనే నాగబాబు ఒక వీడియో విడుదల చేయడం రాజకీయంగా ప్రాధాన్యం సంతరించుకుంది. బుధవారం విడుదల చేసిన ఈ వీడియోలో ఆయన తిరుమల లడ్డూ అంశంతో పాటు, హిందూ మతం పట్ల వైసీపీ (YSR Congress Party) అనుసరిస్తున్న విధానాన్ని తీవ్రంగా విమర్శించారు. వీడియో ప్రారంభంలోనే తాను నాస్తికుడినని చెప్పుకున్న నాగబాబు, హిందూ మతం ఒక ధర్మమని వ్యాఖ్యానించడం ఆసక్తికరంగా మారింది.

సోమవారం జరిగిన జనసేన సాధారణ సమావేశంలో పవన్ కళ్యాణ్ క్లాస్ తీసుకున్న వెంటనే నాగబాబు ఈ వీడియో విడుదల చేయడంతో, ఇది పవన్ వార్నింగ్ ప్రభావమేనా అనే చర్చ మొదలైంది. వీడియోలో నాగబాబు తాను ఒక సాధారణ భారతీయుడిని, హిందువుని అంటూ హిందూ ధర్మ గొప్పతనాన్ని వివరించారు. దేశంలో పుట్టిన ప్రతి ఒక్కరూ హిందువులుగానే పరిగణించబడతారని వ్యాఖ్యానిస్తూ విపక్ష వైసీపీని టార్గెట్ చేశారు.

గత వైసీపీ పాలనలో చోటుచేసుకున్న సంఘటనలను గుర్తు చేస్తూ, 2020 సెప్టెంబరులో అంతర్వేది (Antarvedi) లో రథం దగ్ధమైన ఘటన, అదే ఏడాది డిసెంబరులో రామతీర్థం (Ramatheertham) ఆలయంలో రాముడి విగ్రహం ధ్వంసమైన ఘటనలను ప్రస్తావించారు. ఈ సంఘటనలు హిందువుల మనోభావాలను తీవ్రంగా గాయపరిచాయని ఆయన ఆవేదన వ్యక్తం చేశారు. అలాగే తిరుమల తిరుపతి దేవస్థానం (TTD – Tirumala Tirupati Devasthanams) వ్యవహారాల్లో గత ప్రభుత్వం భక్తులను దూరం చేసిందని విమర్శించారు.

తిరుమలలో వసతి గదుల ధరలు భారీగా పెంచడం ద్వారా సామాన్య భక్తుడికి శ్రీవారి దర్శనం దూరమైందని నాగబాబు ఆరోపించారు. కొండపై రూ.500 ఉన్న గదులను వెయ్యి రూపాయలకు, నారాయణగిరి (Narayanagiri) లో రూ.1700కి పెంచారని, ఏ మాఫియాను సంతృప్తి పరచడానికి ఇలా చేశారో చెప్పాలని ప్రశ్నించారు. దర్శనాలు, సేవల విషయంలోనూ ఘోరంగా వ్యవహరించారని అప్పటి టీటీడీ చైర్మన్ సుబ్బారెడ్డి‌ (Subba Reddy) వ్యాఖ్యలను గుర్తు చేశారు.

అంతేకాదు, తిరుమల దర్శనానికి డిక్లరేషన్ ఇవ్వాల్సి రావడంతో మాజీ సీఎం జగన్ మోహన్ రెడ్డి‌ (Y. S. Jagan Mohan Reddy) తన పర్యటనను వాయిదా వేసుకున్న విషయాన్ని కూడా నాగబాబు ప్రస్తావించారు. మాజీ రాష్ట్రపతి అబ్దుల్ కలాం‌ (A. P. J. Abdul Kalam) కూడా డిక్లరేషన్ ఇచ్చి దర్శనం చేసుకున్నారని గుర్తు చేస్తూ విమర్శలు చేశారు. వీడియో చివర్లో “ఇంకా చాలా చెప్పాలి, ఈ రోజు డోస్ ఎక్కువైంది, రేపు మాట్లాడుదాం” అంటూ సినీ స్టైల్‌లో ముగించడంతో, నాగబాబు ఇకపై సీరియల్ తరహాలో వీడియోలు విడుదల చేసే అవకాశముందని రాజకీయ వర్గాలు అంచనా వేస్తున్నాయి.