Union Budget 2026: మౌలిక సదుపాయాలకు భారీ నిధులు.. 7 నగరాల మధ్య హైస్పీడ్ కారిడార్లు

Union Budget 2026:  కేంద్ర ఆర్థిక మంత్రి నిర్మలా సీతారామన్ నేడు పార్లమెంటులో ప్రవేశపెట్టిన 2026-27 వార్షిక బడ్జెట్‌లో దేశాభివృద్ధికి సంబంధించి కీలక ప్రకటనలు చేశారు. ప్రధానంగా మౌలిక సదుపాయాల కల్పన, రవాణా, ఆరోగ్య రంగాలకు పెద్దపీట వేశారు.

రవాణా విప్లవం: దేశంలోని 7 ప్రధాన నగరాల మధ్య హైస్పీడ్ రైల్ కారిడార్లను ఏర్పాటు చేయాలని ప్రభుత్వం నిర్ణయించింది. ఇందులో భాగంగా హైదరాబాద్ – బెంగళూరు, హైదరాబాద్ – చెన్నై, పుణె – హైదరాబాద్ వంటి మార్గాల్లో ప్రయాణ సమయాన్ని తగ్గించేలా వేగవంతమైన కారిడార్లను అభివృద్ధి చేయనున్నారు. వీటితో పాటు ఢిల్లీ – వారణాసి, ముంబై – పుణె మార్గాల్లో కూడా ఇవి రానున్నాయి.

మౌలిక సదుపాయాలకు కేటాయింపులు: దేశవ్యాప్తంగా రోడ్లు, భవనాలు, ఇతర అభివృద్ధి పనుల కోసం రూ. 12.2 లక్షల కోట్లను కేటాయించారు. ఇది గత ఏడాదితో (రూ. 11.2 లక్షల కోట్లు) పోలిస్తే గణనీయమైన పెరుగుదల.

ఆరోగ్యం, ఫార్మా: రాబోయే ఐదేళ్ల కోసం ‘బయో ఫార్మా శక్తి’ అనే కొత్త పథకాన్ని ప్రకటించారు. దీనికోసం రూ. 10,000 కోట్లు కేటాయించి, దేశాన్ని గ్లోబల్ బయో-ఫార్మా హబ్‌గా మార్చాలని లక్ష్యంగా పెట్టుకున్నారు.

పరిశ్రమలు, ఉపాధి: ఎలక్ట్రానిక్ వస్తువుల తయారీని ప్రోత్సహించేందుకు నిధులను రూ. 40,000 కోట్లకు పెంచారు. అలాగే దేశంలో కొత్తగా మూడు రసాయన పార్కులను, మెగా టెక్స్‌టైల్ పార్కులను ఏర్పాటు చేయాలని ప్రతిపాదించారు.

జలరవాణా: రాబోయే ఐదేళ్లలో 20 కొత్త జాతీయ జలమార్గాలను అందుబాటులోకి తీసుకురావాలని ప్రభుత్వం నిర్ణయించింది.

ఆధునిక సాంకేతికతను, వేగవంతమైన ప్రయాణ సౌకర్యాలను సామాన్యులకు అందుబాటులోకి తీసుకురావడమే లక్ష్యంగా ఈ బడ్జెట్ సాగింది.