Supreme Court of India: చట్టాలు పాటించకపోతే భారత్ వదిలి వెళ్లండి.. మెటాపై సుప్రీంకోర్టు సంచలన వ్యాఖ్యలు..

Supreme Court of India: వాట్సాప్ మాతృ సంస్థ మెటా (Meta) పై భారత అత్యున్నత న్యాయస్థానం సుప్రీంకోర్టు తీవ్ర ఆగ్రహం వ్యక్తం చేసింది. భారతీయ పౌరుల వ్యక్తిగత సమాచార భద్రత విషయంలో రాజీపడే ప్రసక్తే లేదని స్పష్టం చేస్తూ, దేశ చట్టాలకు అనుగుణంగా పని చేయలేకపోతే దేశం విడిచి వెళ్లిపోవచ్చని ఘాటుగా హెచ్చరించింది.

ఈ వివాదం 2021లో వాట్సాప్ ప్రవేశపెట్టిన వివాదాస్పద ప్రైవసీ పాలసీతో ప్రారంభమైంది. అప్పట్లో వాట్సాప్ ‘టేక్ ఇట్ ఆర్ లీవ్ ఇట్’ (Take-it-or-leave-it) పద్ధతిలో ఒక కొత్త విధానాన్ని తెచ్చింది. దీని ప్రకారం, వినియోగదారులు తమ డేటాను మెటా అనుబంధ సంస్థలతో పంచుకోవడానికి అంగీకరిస్తేనే యాప్‌ను వాడుకోవాలని, లేదంటే వాడటం మానేయాలని నిబంధన పెట్టింది. దీనిపై విచారణ జరిపిన కాంపిటీషన్ కమిషన్ ఆఫ్ ఇండియా (CCI), వాట్సాప్ తన మార్కెట్ ఆధిపత్యాన్ని దుర్వినియోగం చేస్తోందని పేర్కొంటూ రూ. 213.14 కోట్ల జరిమానా విధించింది. దీనిపై మెటా సంస్థ కోర్టులను ఆశ్రయించింది.

సుప్రీంకోర్టు తాజా ఆగ్రహం: మంగళవారం (ఫిబ్రవరి 3, 2026) ఈ కేసు విచారణ సందర్భంగా చీఫ్ జస్టిస్ సూర్యకాంత్, జస్టిస్ జోయ్ మల్య బాగ్చి, జస్టిస్ విపుల్ పంచోలిలతో కూడిన ధర్మాసనం మెటా తీరును తప్పుపట్టింది.

డేటా దొంగతనం: “వ్యాపార ప్రయోజనాల కోసం దేశ పౌరుల ప్రైవసీతో ఆటలాడటానికి వీల్లేదు. ఇది ఒక రకంగా ప్రైవేట్ సమాచారాన్ని దొంగిలించడమే. మీ పాలసీలలోని సంక్లిష్ట భాష సామాన్యులకు, వీధి వ్యాపారులకు అర్థం కాదు. వారి అమాయకత్వాన్ని మీరు పెట్టుబడిగా మార్చుకుంటున్నారు” అని సీజేఐ వ్యాఖ్యానించారు.

గుత్తాధిపత్యం: దేశంలో వాట్సాప్‌కు ఎదురులేకుండా పోయిందని, ప్రజలకు వేరే దారి లేకపోవడాన్ని ఆ కంపెనీ అడ్వాంటేజ్‌గా తీసుకుంటోందని జడ్జీలు మండిపడ్డారు. ప్రజల వ్యక్తిగత విషయాలను కాపాడాల్సింది పోయి, వాటితో వాట్సాప్ ఆటలాడుకుంటోందని తీవ్రంగా ఆగ్రహం వ్యక్తం చేశారు.

నిక్కచ్చిగా ఆదేశం: “మేం ఒక్క అక్షరం లేదా అంకెను కూడా మెటాతో షేర్ చేయడానికి అనుమతించం. మీరు భారతీయుల డేటాను వాణిజ్య పరంగా వాడుకోబోమని అఫిడవిట్ సమర్పించాలి. లేదంటే మీ పిటిషన్‌ను కొట్టివేస్తాం” అని కోర్టు స్పష్టం చేసింది.

ఈ కేసులో తదుపరి విచారణను వచ్చే సోమవారానికి వాయిదా వేస్తూ, కేంద్ర ఐటీ శాఖకు కూడా నోటీసులు జారీ చేసింది. భారత డిజిటల్ సార్వభౌమాధికారం, పౌరుల డేటా భద్రత విషయంలో సుప్రీంకోర్టు తీసుకున్న ఈ కఠిన నిర్ణయం ఇప్పుడు అంతర్జాతీయ స్థాయిలో చర్చనీయాంశమైంది.