రాజకీయ రణక్షేత్రంగా మారనున్న అసెంబ్లీ!

తెలంగాణ అసెంబ్లీ వేదికగా అధికార కాంగ్రెస్, ప్రతిపక్షాల మధ్య సరికొత్త రాజకీయ పోరుకు తెరలేవనుంది. సెప్టెంబర్ 7 నుంచి అసెంబ్లీ సమావేశాలు ప్రారంభం కానుండటంతో, ఉభయపక్షాలు సభ లోపల, వెలుపల తమ రాజకీయ ఆధిపత్యాన్ని నిరూపించుకునేందుకు తీవ్రస్థాయిలో అస్త్రశస్త్రాలు సిద్ధం చేసుకుంటున్నాయి. ముఖ్యమంత్రి రేవంత్ రెడ్డి నేతృత్వంలోని కాంగ్రెస్ ప్రభుత్వం సెప్టెంబర్ 2 నాటికి అధికారంలోకి వచ్చి 1,000 రోజుల మైలురాయిని చేరుకోనుంది. ఈ సందర్భాన్ని పురస్కరించుకుని తాము సాధించిన సంక్షేమం, అభివృద్ధిని ప్రజల్లోకి తీసుకెళ్లాలని పాలకపక్షం భావిస్తుండగా.. కాంగ్రెస్ వైఫల్యాలను ఎండగట్టేందుకు ప్రధాన ప్రతిపక్షం బిఆర్ఎస్, బీజేపీలు ఉమ్మడిగా పోరుబాట పట్టాయి.

గత 32 నెలల పాలనలో సాధించిన ఘనతలను, అభివృద్ధి ప్రగతిని సభలో బలంగా వినిపించేందుకు అధికార పక్షం సన్నద్ధమైంది. రాష్ట్రంలో తలసరి ఆదాయం 2025–26 నాటికి రూ.4,18,931 కి చేరి, జాతీయ తలసరి ఆదాయం కంటే దాదాపు 91 శాతం అధికంగా నమోదైందన్న ఆర్థిక ప్రగతిని సర్కార్ ప్రధానంగా తెరపైకి తెస్తోంది. వ్యవసాయ రంగానికి అత్యధిక ప్రాధాన్యతనిస్తూ రూ.1.68 లక్షల కోట్లను వెచ్చించామని, ఇందులో భాగంగా 25 లక్షల మందికి పైగా రైతులకు రూ.2 లక్షల వరకు పంట రుణమాఫీ పూర్తి చేయడంతో పాటు, రైతు భరోసా కింద రూ.36,000 కోట్లు అందించామని అధికార వర్గాలు స్పష్టం చేస్తున్నాయి. సన్నరకం ధాన్యానికి క్వింటాల్‌కు రూ.500 బోనస్, 24 గంటల ఉచిత విద్యుత్, రైతు బీమా, పంట నష్టపరిహారం లాంటి చర్యలను ప్రభుత్వం హైలైట్ చేయనుంది. 32 నెలల్లో రూ.35,077 కోట్ల వ్యయంతో 1.47 కోట్ల మెట్రిక్ టన్నులకు పైగా ధాన్యం సేకరించిన రికార్డును, కృష్ణా-గోదావరి జలాల్లో తెలంగాణ వాటాను కాపాడేందుకు చేపట్టిన చర్యలను సభలో వివరించనుంది.

మహిళా సాధికారతకు సంబంధించి ఆర్టీసీ బస్సుల్లో ఉచిత ప్రయాణం, 200 యూనిట్ల వరకు ఉచిత విద్యుత్, రూ.500కే ఎల్పీజీ సిలిండర్ రీఫిల్, కల్యాణలక్ష్మి ఆర్థిక సాయం, స్వయం సహాయక సంఘాలకు సున్నా వడ్డీ రుణాలు వంటి పథకాలను ప్రభుత్వం తన విజయాల జాబితాలో చేర్చింది. 15 లక్షలకు పైగా కొత్త రేషన్ కార్డులను జారీ చేసి, ఆహార భద్రతను 3.38 కోట్ల మందికి విస్తరించిన విషయాన్ని సభలో ప్రతిపక్షాల దాడికి ఎదురుదాడిగా వాడనుంది. పరిపాలనా సంస్కరణల్లో భూభారతి భూ చట్టం, ప్రజాపాలన గ్రీవెన్స్ విధానం, మౌలిక వసతుల రంగంలో మెట్రో ఫేజ్-2, మూసీ పునరుజ్జీవనం, ఎయిర్‌పోర్టు విస్తరణ ప్రాజెక్టులను అసెంబ్లీ ముందు ఉంచనుంది.

మరోవైపు, కాంగ్రెస్ 1,000 రోజుల పాలనను వైఫల్యాల చిట్టాగా చిత్రీకరించేందుకు ప్రతిపక్షాలు వ్యూహాత్మకంగా అడుగులు వేస్తున్నాయి. కాంగ్రెస్ ప్రభుత్వ వైఫల్యాలు, నెరవేర్చని ఎన్నికల హామీలపై సెప్టెంబర్ 2న తెలంగాణ భవన్‌లో ఛార్జ్‌షీట్ విడుదల చేసేందుకు బిఆర్ఎస్ నిర్ణయించింది. వారం రోజుల పాటు ప్రజాక్షేత్రంలో విస్తృత నిరసనలు చేపట్టి, సెప్టెంబర్ 10న ఉద్యోగ, ఉపాధ్యాయ సంఘాలతో కలిసి భారీ ఆందోళనలతో ఈ నిరసన పర్వాన్ని ముగించనుంది. ప్రభుత్వం అమలు చేస్తున్న సంక్షేమ పథకాలపై తప్పుడు ప్రచారం జరుగుతోందని, నిధుల లేమితో రాష్ట్రం సంక్షోభంలో పడిందని సభలో నిలదీయడానికి రంగం సిద్ధం చేసింది.

మరోవైపు బీజేపీ కూడా ప్రభుత్వ వైఫల్యాలపై ఉద్యమబాట పట్టింది. రాష్ట్ర అధ్యక్షుడు రాంచందర్ రావు నేతృత్వంలో నాంపల్లి కార్యాలయంలో ఎంపీలు, ఎమ్మెల్యేలు, ఎమ్మెల్సీలతో సమావేశమైన బీజేపీ.. ప్రజా సమస్యలపై రాజీలేని పోరాటానికి కార్యాచరణ రూపొందించింది. సెక్షన్ 22ఏ సమస్య, ఫీజు రీయింబర్స్‌మెంట్ బకాయిలు, రైతుల సమస్యలపై బీజేపీ పోరుబాట పట్టింది. అసెంబ్లీలో బీజేపీ పక్ష నేత ఏలేటి మహేశ్వర్ రెడ్డి నేతృత్వంలో జీవో 22ఏ రద్దును డిమాండ్ చేస్తూ సెప్టెంబర్ 5, 6 తేదీల్లో నిరసనలకు పిలుపునిచ్చారు.

మొత్తంగా, వెయ్యి రోజుల పాలన సంబరాలతో మైలేజ్ సాధించాలని కాంగ్రెస్ ఆలోచిస్తుంటే.. ప్రజా సమస్యలను, ఆర్థిక లోటుపాట్లను ఎత్తిచూపుతూ ప్రభుత్వాన్ని ఇరుకున పెట్టాలని బిఆర్ఎస్, బీజేపీలు ఉవ్విళ్లూరుతున్నాయి. దీంతో రాబోయే అసెంబ్లీ సమావేశాలు వాడీవేడి చర్చలు, రాజకీయ ముఖాముఖి ఘర్షణలతో రణరంగాన్ని తలపించడం ఖాయంగా కనిపిస్తోంది.