ఎమ్మెల్సీ రాజీనామాపై మజ్లిస్లో ముదిరిన సంక్షోభం!
- Published By: Vasishta
- August 31, 2026 / 03:15 PM IST
హైదరాబాద్ రాజకీయాల్లో తిరుగులేని పట్టున్న ఆల్ ఇండియా మజ్లిస్-ఎ-ఇత్తెహాదుల్ ముస్లిమీన్ (AIMIM) పార్టీలో తాజా పరిణామాలు తీవ్ర కలకలం రేపుతున్నాయి. లైంగిక దుష్ప్రవర్తన ఆరోపణలతో కూడిన వీడియో సోషల్ మీడియాలో వైరల్ కావడంతో పార్టీ నుంచి బహిష్కరణకు గురైన ఎమ్మెల్సీ మీర్జా రహ్మత్ బేగ్ వ్యవహారం ఇప్పుడు రాజకీయ వర్గాల్లో హాట్ టాపిక్గా మారింది. పార్టీ ప్రాథమిక సభ్యత్వం నుంచి తప్పించడమే కాకుండా, ఎమ్మెల్సీ పదవికి కూడా తక్షణమే రాజీనామా చేయాలని అధిష్ఠానం ఆదేశించినప్పటికీ, ఆయన ఇంకా రాజీనామా సమర్పించకపోవడం తీవ్ర ఉత్కంఠకు దారితీస్తోంది.
పార్టీ ప్రతిష్టను కాపాడుకునేందుకు ఎంఐఎం నాయకత్వం రహ్మత్ బేగ్పై వెంటనే బహిష్కరణ వేటు వేసి, శాసనమండలి సభ్యత్వానికి రాజీనామా చేయాలని ఆదేశించింది. అయితే, ఆయన మాత్రం మండలి చైర్మన్కు రాజీనామా లేఖను సమర్పించడానికి ఏమాత్రం సుముఖంగా లేరన్న వార్తలు రాజకీయ వర్గాల్లో జోరుగా వినిపిస్తున్నాయి. శుక్రవారం మధ్యాహ్నం నుంచే ఆయన అజ్ఞాతంలోకి వెళ్లడం, తన ఫోన్లను స్విచ్ఛాఫ్ చేసుకోవడంతో పరిస్థితి మరింత జటిలంగా మారింది. పార్టీ అధిష్ఠానం ఒత్తిడి తెస్తున్నప్పటికీ, ఆయన స్వచ్ఛందంగా పదవిని వదులుకోవడానికి సిద్ధంగా లేరనే సంకేతాలు వెలువడుతున్నాయి.
ఈ వివాదం తీవ్రరూపం దాల్చడంతో రహ్మత్ బేగ్ ఒక వీడియో ద్వారా తన వాదనను వినిపించారు. తనపై వచ్చిన ఆరోపణలను ఆయన పూర్తిగా ఖండించారు. తనను, పార్టీని రాజకీయంగా దెబ్బతీసేందుకు కొందరు ఉద్దేశపూర్వకంగానే ఏఐ ఉపయోగించి మార్ఫింగ్ వీడియోలను సృష్టించి ప్రచారం చేశారని ఆరోపించారు. ఈ వ్యవహారంతో పార్టీ అధ్యక్షుడు అసదుద్దీన్ ఒవైసీకి గానీ, చాంద్రాయణగుట్ట ఎమ్మెల్యే అక్బరుద్దీన్ ఒవైసీకి గానీ లేదా ఎంఐఎం పార్టీకి ఎలాంటి సంబంధం లేదని స్పష్టం చేశారు. ఈ కుట్రపై న్యాయపోరాటం చేస్తానని చెబుతూ ఇప్పటికే పోలీసులకు అధికారికంగా ఫిర్యాదు చేయగా, పోలీసులు కేసు నమోదు చేసి విచారణ చేపట్టారు.
సాధారణంగా ఎంఐఎం అధిష్ఠానం ఆదేశిస్తే నాయకులు ఎదురుచెప్పే పరిస్థితి ఉండదు. కానీ, రహ్మత్ బేగ్ రాజీనామా విషయంలో నాన్చుడు ధోరణి ప్రదర్శించడం పార్టీ కేడర్తో పాటు రాజకీయ విశ్లేషకులను సైతం ఆశ్చర్యపరుస్తోంది. ఒకవేళ బేగ్ స్వచ్ఛందంగా రాజీనామా చేయకపోతే, పార్టీ ఫిరాయింపుల నిరోధక చట్టం లేదా అనర్హత వేటు కోసం మండలి చైర్మన్ను ఎంఐఎం ఆశ్రయిస్తుందా? లేక అంతర్గతంగా ఆయనపై ఒత్తిడి తెచ్చి రాజీనామా చేయిస్తుందా? అనేది ప్రస్తుతానికి ప్రశ్నార్థకంగా మారింది. రహ్మత్ బేగ్ సోషల్ మీడియా ఖాతాలను పరిశీలిస్తే, ఇటీవల ఆయన సౌదీ అరేబియాలో ఉమ్రా తీర్థయాత్రకు సంబంధించిన పోస్టు తప్ప ఎలాంటి తాజా అప్డేట్లు లేకపోవడం గమనార్హం.
మొత్తానికి, పాతబస్తీ రాజకీయాల్లో రహ్మత్ బేగ్ ఎపిసోడ్ ఎంఐఎం అధిష్ఠానానికి పెద్ద పరీక్షగా మారింది. ఆయన రాజీనామా లేఖ చైర్మన్కు చేరుతుందా లేదా న్యాయపరమైన, రాజకీయపరమైన పోరుకు ఆయన సిద్ధపడుతున్నారా అనేది రానున్న 24 నుంచి 48 గంటల్లో స్పష్టమయ్యే అవకాశం ఉంది.
