రాహుల్ గాంధీతో మహేశ్ కుమార్ గౌడ్ భేటీ

తెలంగాణలో నామినేటెడ్, పార్టీ సంస్థాగత పదవులను నెలలోగా భర్తీ చేస్తామని టీపీసీసీ అధ్యక్షుడు మహేశ్ కుమార్ గౌడ్ (Mahesh Kumar Goud) తెలిపారు. ఢిల్లీలో ఏఐసీసీ అగ్రనేత రాహుల్ గాంధీ (Rahul Gandhi) తో ఆయన సమావేశమయ్యారు. రాష్ట్రంలో పార్టీ పరిస్థితులు, సంస్థాగత నిర్మాణం, ప్రభుత్వ పనితీరుతోపాటు కులగణన తదితర కీలక అంశాలపై చర్చించారు. అనంతరం మహేశ్ కుమార్ మీడియాతో మాట్లాడుతూ రాష్ట్రంలో పార్టీ అధికారంలోకి రావడానికి అహర్నిశలు శ్రమించిన ప్రతి ఒక్కరికీ సముచిత స్థానం కల్పిస్తామని తెలిపారు. టీపీసీసీ పూర్తి స్థాయి కార్యవర్గ నియామకంతోపాటు వివిధ కార్పొరేషన్లు, బోర్డులకు సంబంధించిన నామినేటెడ్ పదవుల భర్తీపై రాహుల్ గాంధీ తో విస్తృతంగా చర్చించినట్లు వెల్లడించారు. పార్టీని బూత్ స్థాయి నుంచి మరింత బలోపేతం చేసే దిశగా అడుగులు వేస్తున్నామని చెప్పారు. పదవుల భర్తీలో ప్రభుత్వం, పార్టీ మధ్య మరింత సమన్వయం ఉండేలా చూస్తున్నామని తెలిపారు.