ఏపీలో కూటమి ప్రభుత్వం భారీ యాక్షన్ ప్లాన్..!

అమరావతి వేదికగా ఆంధ్రప్రదేశ్ ముఖ్యమంత్రి చంద్రబాబు నాయుడు(Chandrababu Naidu) పార్టీ ముఖ్యనేతలు, ప్రజాప్రతినిధులతో శనివారం కీలకమైన టెలీకాన్ఫరెన్స్ నిర్వహించారు. కూటమి(NDA) ప్రభుత్వం అధికారంలోకి వచ్చి రెండేళ్లు పూర్తి చేసుకుంటున్న తరుణంలో, క్షేత్రస్థాయిలో ప్రజలతో సంబంధాలను మరింత బలోపేతం చేసుకోవడంపై ఈ సమావేశంలో సుదీర్ఘంగా చర్చించారు. ప్రభుత్వ పాలన, సాధించిన విజయాలు మరియు ప్రజా రెస్పాన్స్‌పై నేతలతో సమీక్షించిన సీఎం, రాబోయే రోజుల్లో ప్రతి ఒక్క ప్రజాప్రతినిధి ప్రజల్లోనే ఉండాలని, కిందిస్థాయి క్యాడర్‌ను సమన్వయం చేసుకుంటూ ముందుకు సాగాలని స్పష్టమైన ఆదేశాలు జారీ చేశారు.

ఈ టెలీకాన్ఫరెన్స్ ద్వారా తెలుగుదేశం పార్టీ మరియు కూటమి శ్రేణులు అత్యంత ప్రతిష్టాత్మకమైన ప్రజా ప్రచారానికి శ్రీకారం చుట్టాయి. రేపటి నుంచి ఆంధ్రప్రదేశ్ వ్యాప్తంగా ఏకంగా 45 రోజుల పాటు నిరంతరాయంగా ‘డోర్ టు డోర్’ (ఇంటింటి ప్రచారం) కార్యక్రమాన్ని చేపట్టబోతున్నట్లు సీఎం చంద్రబాబు ప్రకటించారు. ఈ 45 రోజుల పాటు సాగే మహా ప్రచారంలో కూటమి నేతలు, ఎమ్మెల్యేలు, మంత్రులు ప్రతి గ్రామాన్ని, వార్డును జల్లెడ పడుతూ ప్రతి ఇంటి తలుపు తట్టనున్నారు.

ఈ ఇంటింటి ప్రచారంలో ప్రజల్లోకి తీసుకెళ్లాల్సిన ప్రధానాంశాలపై ముఖ్యమంత్రి చంద్రబాబు నాయుడు నేతలకు దిశా నిర్దేశం చేశారు. గత రెండేళ్ల కూటమి పాలనలో సాధించిన సంక్షేమ, అభివృద్ధి విజయాలను, ముఖ్యంగా సూపర్ సిక్స్ వంటి కీలక హామీల అమలు తీరును ప్రతి కుటుంబానికి కళ్లకి కట్టినట్లు వివరించాలని చెప్పారు. అలాగే, గత ప్రభుత్వ విధ్వంసాన్ని అధిగమించి రాష్ట్రాన్ని ఎలా అభివృద్ధి బాట పట్టించామో ప్రజలకు అర్థమయ్యేలా చెప్పాలన్నారు. ఈ 45 రోజుల ప్రచారంలో నేతల పనితీరుపై నిరంతర పర్యవేక్షణ ఉంటుందని, ప్రజాప్రతినిధులు ఎవరూ అలసత్వం వహించకుండా బాధ్యతాయుతంగా వ్యవహరించాలని సీఎం కరాఖండిగా తేల్చి చెప్పారు.