రూటు మార్చిన బీఆర్ఎస్..!
- Published By: Vasishta
- September 10, 2026 / 03:25 PM IST
అసెంబ్లీలో గొంతు నొక్కితే.. రోడ్డెక్కి సర్కార్ను నిలదీస్తామంటోంది బీఆర్ఎస్. తెలంగాణ అసెంబ్లీలో ఊహించని పరిణామాల మధ్య సస్పెన్షన్కు గురైన బీఆర్ఎస్ ఎమ్మెల్యేలు, ఏమాత్రం వెనక్కి తగ్గకుండా తమ రాజకీయ వ్యూహాన్ని పూర్తిగా మార్చేశారు. సభా వేదికపై అధికార కాంగ్రెస్ పార్టీ వేసిన వ్యూహాత్మక అడుగులను ఎదుర్కొనేందుకు, నేరుగా ప్రజల ముందుకు వెళ్లే రూటును ఎంచుకున్నారు. కాంగ్రెస్ ప్రభుత్వం అత్యంత ప్రతిష్టాత్మకంగా భావిస్తున్న ఫ్యూచర్ సిటీ ప్రాజెక్టును అస్త్రంగా మలచుకుని బీఆర్ఎస్ చేపట్టిన మెరుపు పర్యటన సరికొత్త ప్రకంపనలు సృష్టిస్తోంది.
అసెంబ్లీలో మాట్లాడే అవకాశం ఇవ్వకుండా తమను సస్పెండ్ చేశారన్న కసితో ఉన్న బీఆర్ఎస్ వర్కింగ్ ప్రెసిడెంట్ కేటీఆర్, మాజీ మంత్రి హరీష్ రావు నేతృత్వంలోని బృందం రంగారెడ్డి జిల్లాలోని తుక్కుగూడ, రావిర్యాల ప్రాంతాలపై దృష్టి సారించింది. ఈ ప్రాంతంలో అభివృద్ధి పేరిట జరుగుతున్న వ్యవహారాలపై రేవంత్ రెడ్డి సర్కార్ను కార్నర్ చేయడమే లక్ష్యంగా గ్రౌండ్లోకి దిగారు. సీఎం రేవంత్ రెడ్డి కుటుంబ సభ్యులకు, ముఖ్యంగా ఆయన సోదరుడు కొండల్ రెడ్డికి లబ్ధి చేకూర్చేలా వేలాది కోట్ల విలువైన భూములను దారాదత్తం చేశారని బీఆర్ఎస్ తెరపైకి తెచ్చింది. కేవలం ప్రజా ప్రయోజనాల ముసుగులో పేద, మధ్యతరగతి రైతుల భూములను లాక్కుంటూ, రియల్ ఎస్టేట్ మాఫియాను ప్రోత్సహిస్తున్నారంటూ కాంగ్రెస్ ప్రభుత్వంపై పదునైన విమర్శలు సంధించింది.
బీఆర్ఎస్ నేతల క్షేత్రస్థాయి పరిశీలన సందర్భంగా రావిర్యాల, తుక్కుగూడ ప్రాంతాల్లో తీవ్ర ఉద్రిక్త పరిస్థితులు తలెత్తాయి. ఎమ్మెల్యేలను అడ్డుకునేందుకు పోలీసులు భారీగా బారికేడ్లను ఏర్పాటు చేయడంతో అక్కడ హైడ్రామా నడిచింది. పోలీసుల ఆంక్షలను లెక్కచేయకుండా బీఆర్ఎస్ శ్రేణులు ప్రభుత్వ తీరుకు వ్యతిరేకంగా నినాదాలు చేస్తూ హోరెత్తించారు. సభలో ప్రతిపక్షాన్ని డిఫెన్స్లో పడేయాలని చూసిన అధికార పక్షానికి, ఈ యాత్ర ద్వారా గట్టి కౌంటర్ ఇవ్వడంలో బీఆర్ఎస్ నాయకత్వం సఫలమైందనే చర్చ రాజకీయ వర్గాల్లో జోరుగా సాగుతోంది.
ఈ మొత్తం పరిణామాలను పరిశీలిస్తే, బీఆర్ఎస్ తన పోరాట పంథాను మార్చుకుందని అర్థమవుతోంది. అసెంబ్లీ వేదికగా ప్రభుత్వం నుంచి సమాధానం రాబట్టడం కష్టమని భావించిన బీఆర్ఎస్, ఇకపై ప్రజా క్షేత్రంలోనే ప్రభుత్వాన్ని దోషిగా నిలబెట్టాలని నిర్ణయించుకుంది. ఫ్యూచర్ సిటీ భూకేటాయింపుల జీవోలు, టెండర్ల ప్రక్రియపై చట్టపరమైన, రాజకీయపరమైన పోరాటాన్ని ఉధృతం చేస్తామని హెచ్చరించడంతో.. తెలంగాణ రాజకీయం మున్ముందు మరింత వేడెక్కడం ఖాయంగా కనిపిస్తోంది.
