Chandrababu: చంద్రబాబు కేసు క్లోజ్!
- Published By: Vasishta
- April 1, 2026 / 09:59 AM IST
ఆంధ్రప్రదేశ్ రాజకీయాల్లో గత కొన్నేళ్లుగా సంచలనం సృష్టించిన అమరావతి ఇన్నర్ రింగ్ రోడ్డు (IRR) కేసు ఎట్టకేలకు ముగిసిపోయింది. ఈ కేసులో ప్రస్తుత సీఎం చంద్రబాబు(Chandrababu), మంత్రులు లోకేశ్, నారాయణలకు భారీ ఊరట లభించింది. సీఐడీ దాఖలు చేసిన ‘క్లోజర్ రిపోర్ట్’ను విజయవాడ ఏసీబీ కోర్టు ఆమోదించడంతో, ఈ కేసు నుంచి నిందితులందరికీ విముక్తి లభించినట్లయింది.
వైసీపీ ప్రభుత్వ హయాంలో నమోదైన ఈ కేసును మూసివేస్తూ విజయవాడ ఏసీబీ కోర్టు న్యాయాధికారి పి. భాస్కరరావు మంగళవారం సాయంత్రం కీలక ఉత్తర్వులు జారీ చేశారు. కేసుకు సంబంధించి సీఐడీ సమర్పించిన నివేదికలో ఎటువంటి తప్పులు లేవని, నిందితులపై మోపిన ఆరోపణలకు సరైన ఆధారాలు లేవని కోర్టు నిర్ధారించింది. అదే సమయంలో, ఈ కేసును మూసివేయవద్దంటూ మాజీ ఎమ్మెల్యే ఆళ్ల రామకృష్ణారెడ్డి దాఖలు చేసిన ప్రొటెస్ట్ పిటిషన్ను కూడా న్యాయస్థానం కొట్టివేసింది. ఆ పిటిషన్లో ఎటువంటి సహేతుక కారణాలు లేవని కోర్టు స్పష్టం చేసింది.
2014-19 మధ్య తెలుగుదేశం ప్రభుత్వ హయాంలో అమరావతి ఇన్నర్ రింగ్ రోడ్డు అలైన్మెంట్ మార్పు ద్వారా కొందరు వ్యక్తులకు, సంస్థలకు లబ్ధి చేకూర్చారనేది ప్రధాన ఆరోపణ. అప్పటి మంగళగిరి ఎమ్మెల్యే ఆళ్ల రామకృష్ణారెడ్డి ఫిర్యాదు మేరకు అప్పటి వైసీపీ ప్రభుత్వం సీఐడీ విచారణకు ఆదేశించింది. ఈ కేసులో చంద్రబాబు, లోకేశ్, పొంగూరు నారాయణ, లింగమనేని రమేశ్ వంటి ప్రముఖులను నిందితులుగా చేర్చారు. రింగ్ రోడ్డు అలైన్మెంట్లో అక్రమాలు జరిగాయని, దీనివల్ల ప్రభుత్వానికి నష్టం వాటిల్లి, ప్రైవేటు వ్యక్తులకు లాభం చేకూరిందని అప్పట్లో సీఐడీ దర్యాప్తులో తేలింది.
ఇవి కూడా చదవండి
రాష్ట్రంలో కూటమి ప్రభుత్వం అధికారంలోకి వచ్చిన తర్వాత, ఈ కేసుపై సీఐడీ లోతైన దర్యాప్తు నిర్వహించింది. ఈ క్రమంలో గత ప్రభుత్వం చేసిన ఆరోపణల్లో వాస్తవం లేదని ప్రస్తుత దర్యాప్తు సంస్థ గుర్తించింది. అలైన్మెంట్ మార్పులో ఎక్కడా అక్రమాలు జరగలేదని, వ్యక్తిగత ప్రయోజనాల కోసం నిబంధనలు ఉల్లంఘించలేదని సీఐడీ తేల్చింది. ఈ మేరకు ‘మిస్టేక్ ఆఫ్ ఫ్యాక్ట్’ (వాస్తవ విరుద్ధమైన అంశాలు) కింద కేసును క్లోజ్ చేయాలని ఏసీబీ కోర్టును కోరింది. మార్చి 17న జరిగిన వాదనల్లో సీఐడీ తరఫు న్యాయవాది ఉన్నం అఖిల్ చౌదరి కీలక అంశాలను లేవనెత్తారు. నిష్పక్షపాతంగా జరిగిన దర్యాప్తులో ఎటువంటి ఆధారాలు లభించలేదని, అందుకే తుది నివేదిక సమర్పించామని కోర్టుకు వివరించారు.
ఈ కేసు క్లోజర్ రిపోర్ట్ ఆమోదం పొందడం తెలుగుదేశం పార్టీకి నైతికంగా పెద్ద విజయం అని చెప్పొచ్చు. గత ఐదేళ్లుగా ఈ కేసును రాజకీయ అస్త్రంగా వాడుకున్నారని టీడీపీ మొదటి నుంచీ వాదిస్తోంది. ఎటువంటి ప్రాథమిక ఆధారాలు లేకుండానే అగ్రనేతలపై కేసులు పెట్టారని వారు ఆరోపిస్తున్నారు. ఇప్పుడు న్యాయస్థానం కూడా ఆధారాలు లేవని స్పష్టం చేయడంతో, ఆరోపణలు చేసిన వారిపై విమర్శలు వెల్లువెత్తుతున్నాయి.
మరోవైపు, ఆళ్ల రామకృష్ణారెడ్డి దాఖలు చేసిన ప్రొటెస్ట్ పిటిషన్ను కోర్టు కొట్టివేయడం ప్రాధాన్యత సంతరించుకుంది. గత ప్రభుత్వ హయాంలో సీఐడీ కీలక ఆధారాలు సేకరించిందని ఆళ్ల తరఫు న్యాయవాది వాదించినప్పటికీ, కోర్టు ఆ వాదనలతో ఏకీభవించలేదు.
విజయవాడ ఏసీబీ కోర్టు ఇచ్చిన ఈ తీర్పుతో చంద్రబాబు, లోకేశ్ సహా ఇతర నేతలపై ఉన్న ఒక ప్రధాన చట్టపరమైన అడ్డంకి తొలగిపోయింది. ఇన్నర్ రింగ్ రోడ్డు కేసు ముగింపుతో అమరావతి ప్రాజెక్టుపై ఉన్న నీలినీడలు కూడా తొలగిపోయాయని రాజకీయ విశ్లేషకులు భావిస్తున్నారు. మొత్తానికి ఆధారాలు లేని కేసులకు న్యాయస్థానాల్లో తావు ఉండదని ఈ తీర్పు మరోసారి నిరూపించింది.
ఇవి కూడా చదవండి
