చారిత్రక నిర్ణయం, దేశంలో తొలిసారి కులగణన!

భారతదేశ చరిత్రలోనే అత్యంత కీలకమైన, చారిత్రాత్మక నిర్ణయానికి కేంద్ర ప్రభుత్వం శ్రీకారం చుట్టింది. స్వతంత్ర భారతదేశంలోనే మొట్టమొదటిసారిగా దేశవ్యాప్తంగా ‘కులగణన’ (Caste Census) చేపట్టేందుకు కేంద్ర హోంశాఖ అధికారికంగా నోటిఫికేషన్ విడుదల చేసింది. జనాభా లెక్కల సేకరణలో భాగంగా నిర్వహించే ఈ ప్రక్రియ కోసం ప్రత్యేకంగా 40 ప్రశ్నలతో కూడిన ఎన్యూమరేషన్ పత్రాన్ని రిజిస్ట్రార్ జనరల్ ఆఫ్ ఇండియా (RGI) ఖరారు చేసింది. 1931 తర్వాత దేశంలో మళ్లీ జాతీయ స్థాయిలో కులాలవారీగా సమగ్ర వివరాలు సేకరించడం ఇదే తొలిసారి కావడంతో ఈ నిర్ణయం జాతీయ రాజకీయాల్లో పెను సంచలనంగా మారింది.

కేంద్ర హోంశాఖ మార్గదర్శకాల ప్రకారం.. ఈ భారీ జనాభా లెక్కల సేకరణ ప్రక్రియ రెండు దశల్లో సాగనుంది. తొలి దశలో దేశవ్యాప్తంగా ఇళ్ల వివరాల సేకరణ చేపడతారు. ఆ తర్వాత రెండో దశలో అసలైన జనగణన మరియు కులగణన ప్రక్రియను నిర్వహిస్తారు. ఎన్యూమరేషన్ ఫామ్‌లో గతంలో ఉండే సాధారణ వివరాలతో పాటు, ఈసారి ప్రత్యేకంగా ‘ఎస్సీ (SC), ఎస్టీ (ST)’ కాలమ్స్‌తో పాటే ‘కులం’ (Caste) వివరాల సేకరణకు ప్రత్యేక కాలమ్‌ను పొందుపరిచారు.

ఈ తాజా నోటిఫికేషన్‌లోని 40 ప్రశ్నలలో వ్యక్తిగత వివరాలు, విద్య, ఉపాధి, డిజిటల్ అక్షరాస్యత, వలసలు, బ్యాంకు ఖాతాల వివరాలతో పాటు కోవిడ్-19 వ్యాక్సినేషన్ తీసుకున్న స్థలం వంటి ఆసక్తికరమైన అంశాలను కూడా చేర్చారు. లడఖ్, జమ్మూ కాశ్మీర్, హిమాచల్ ప్రదేశ్, ఉత్తరాఖండ్ వంటి మంచు కురిసే సరిహద్దు ప్రాంతాల్లో ఈ ఏడాది సెప్టెంబర్ 1 నుంచే రెండో దశ ప్రక్రియ ప్రారంభం కానుండగా, దేశంలోని మిగిలిన ప్రాంతాల్లో వచ్చే ఏడాది ఫిబ్రవరిలో ఈ ప్రక్రియ జరగనుంది. ఈ చారిత్రక కులగణన ద్వారా లభించే అధికారిక డేటా భవిష్యత్తులో దేశంలోని సామాజిక న్యాయం, రిజర్వేషన్లు, సంక్షేమ పథకాల రూపకల్పన మరియు బడ్జెట్ కేటాయింపుల్లో అత్యంత కీలక పాత్ర పోషించనుందని నిపుణులు విశ్లేషిస్తున్నారు.