ఓట్ల తొలగింపు వెనుక కుట్ర.. రేవంత్ రెడ్డి సంచలన ఆరోపణ

తెలంగాణలో ప్రస్తుతం కొనసాగుతున్న ఓటర్ల ప్రత్యేక సమగ్ర సవరణ (SIR) ప్రక్రియ రాజకీయంగా తీవ్ర దుమారం రేపుతోంది. సాధారణంగా ఎన్నికల సంఘం నిర్వహించే ఒక పరిపాలనా ప్రక్రియగా కనిపించే ఈ ఓటర్ల జాబితా సవరణపై ముఖ్యమంత్రి రేవంత్ రెడ్డి సంచలన వ్యాఖ్యలు చేయడం హాట్ టాపిక్ గా మారింది. హైదరాబాద్‌లో జరిగిన ‘మైనారిటీస్ ఎక్సలెన్స్ సమ్మిట్’ వేదికగా సీఎం చేసిన కామెంట్స్ రాష్ట్ర రాజకీయ సమీకరణాలను ఒక్కసారిగా మార్చేశాయి.

తెలంగాణలో అమలవుతున్న ‘సర్’ ప్రక్రియ వెనుక కొన్ని రాజకీయ శక్తులు లక్షలాది ఓట్లను గల్లంతు చేసే కుట్ర చేస్తున్నాయని రేవంత్ రెడ్డి ఆరోపించారు. గతంలో పశ్చిమ బెంగాల్ అసెంబ్లీ ఎన్నికల ముందు లక్షలాది ఓటర్ల పేర్లను జాబితా నుంచి ఎలాగైతే తొలగించారో, సరిగ్గా అదే వ్యూహాన్ని ఇప్పుడు తెలంగాణలో అమలు చేయడానికి ప్రయత్నాలు జరుగుతున్నాయని ఆయన హెచ్చరించారు. ముఖ్యంగా కాంగ్రెస్ శ్రేణులు అప్రమత్తంగా ఉండకపోతే దాదాపు 21 శాతం మేర ఓట్లను కోల్పోయే ప్రమాదం ఉందని ఆయన సంకేతాలు ఇచ్చారు. ఓటు హక్కు రక్షణ కోసం ప్రతి కాంగ్రెస్ కార్యకర్త క్షేత్రస్థాయికి వెళ్లి, ప్రతి ఇంటినీ తనిఖీ చేసి అర్హులైన ఏ ఒక్కరి ఓటూ గల్లంతు కాకుండా చూడాలని పిలుపునిచ్చారు.

ఈ వేదిక ద్వారా రేవంత్ రెడ్డి బీజేపీ, కేంద్ర ప్రభుత్వంపై తీవ్రస్థాయిలో రాజకీయ దాడి చేశారు. తమకు హిందూ, ముస్లింలు రెండు కళ్ల లాంటి వారని స్పష్టం చేసిన సీఎం.. మైనారిటీలకు 4 శాతం రిజర్వేషన్లు కల్పించిన ఘనత కాంగ్రెస్ పార్టీదేనని గుర్తుచేశారు. తెలంగాణలో అధికారంలోకి వస్తే 4 శాతం మైనారిటీ రిజర్వేషన్లను రద్దు చేస్తామని కేంద్ర హోంమంత్రి అమిత్ షా చేసిన వ్యాఖ్యలను ప్రస్తావిస్తూ, చేతనైతే ముందు గుజరాత్‌లో ఉన్న ముస్లిం కోటాను రద్దు చేసి చూపించాలని బీజేపీకి నేరుగా సవాల్ విసిరారు.

రేవంత్ రెడ్డి చేసిన ఈ వ్యాఖ్యల వెనుక స్పష్టమైన రాజకీయ వ్యూహం కనిపిస్తోంది. మైనారిటీ, సంప్రదాయ కాంగ్రెస్ ఓటర్ల జాబితాపై ప్రత్యర్థి శక్తులు దృష్టి సారించకుండా ముందుగానే అప్రమత్తం చేయడం ఇందులో ఓ భాగం. స్థానిక ఎన్నికలు, భవిష్యత్ ఎన్నికలను దృష్టిలో ఉంచుకుని కార్యకర్తలను ఇంటింటికీ పంపడం ద్వారా పార్టీ నెట్‌వర్క్‌ను గ్రౌండ్ లెవెల్‌లో యాక్టివేట్ చేయాలనేది మరో ఆలోచన. బెంగాల్ తరహా రాజకీయ వ్యూహాలను ప్రస్తావించడం ద్వారా, ప్రత్యర్థులపై రాజకీయ పైచేయి సాధించి ఓటర్లలో సెంటిమెంట్‌ను బలోపేతం చేయడం కూడా వ్యూహమై ఉండొచ్చు.

ఓటర్ల జాబితా సవరణ ప్రక్రియ కేవలం అధికార యంత్రాంగానికే పరిమితం కాకుండా, కాంగ్రెస్ పార్టీ శ్రేణులకు ఒక ప్రతిష్టాత్మక పరీక్షగా రేవంత్ రెడ్డి మలిచారు. ఓటు హక్కు పరిరక్షణ పేరిట ఆయన సంధించిన ఈ రాజకీయ అస్త్రం రాబోయే రోజుల్లో రాష్ట్ర రాజకీయాల్లో మరింత వేడి పుట్టించడం ఖాయంగా కనిపిస్తోంది.