Donald Trump: ఫార్మా కంపెనీలకు ట్రంప్ టారిఫ్ బాంబు..ఆ ఔషధాలపై 100 శాతం పన్ను!
- Published By: Vishal
- April 3, 2026 / 11:29 AM IST
Donald Trump: అమెరికా అధ్యక్షుడు డొనాల్డ్ ట్రంప్ ఇతర దేశాల ఉత్పత్తులపై టారిఫ్ యుద్ధాన్ని మరింత ముమ్మరం చేశారు. ఇప్పటికే పలు దేశాల వస్తువులపై సుంకాలు విధించిన ఆయన, తాజాగా ఫార్మా రంగంపై తన ప్రతాపం చూపారు. కొన్ని రకాల పేటెంట్ ఔషధాలపై ఏకంగా 100 శాతం వరకు సుంకాలు విధించేలా సరికొత్త ఎగ్జిక్యూటివ్ ఆర్డర్పై ట్రంప్ సంతకం చేశారు.
కొత్త నిబంధనల అంతరార్థం:
ట్రంప్ సర్కారు తీసుకున్న ఈ నిర్ణయం ప్రకారం.. అమెరికాలో ఉత్పత్తి కేంద్రాలను ఏర్పాటు చేయని లేదా ‘మోస్ట్ ఫేవరెడ్’ ఒప్పందాలు చేసుకోని ఫార్మా కంపెనీలకు చుక్కెదురు కానుంది. అటువంటి సంస్థలు తయారు చేసే ఔషధాలపై తొలుత 20 శాతం సుంకం విధిస్తారు. రాబోయే నాలుగేళ్లలో దీనిని దశలవారీగా 100 శాతానికి పెంచనున్నారు. అయితే, అమెరికాలో తయారీ కేంద్రాలు ఉన్న కంపెనీలకు మాత్రం ఈ సుంకాల నుంచి మినహాయింపు ఉంటుంది.
గడువు విధింపు:
ఈ భారీ సుంకాల అమలుకు ముందు కంపెనీలకు కొంత సమయం ఇచ్చారు. టారిఫ్ అంశాలపై చర్చలు జరిపేందుకు పెద్ద కంపెనీలకు 120 రోజులు, ఇతర సంస్థలకు 180 రోజుల గడువు కల్పించారు. ఇప్పటికే సుమారు 13 ప్రధాన ఔషధ తయారీ సంస్థలు ట్రంప్ ప్రభుత్వంతో ఒప్పందాల దిశగా అడుగులు వేస్తున్నట్లు తెలుస్తోంది.
లోహాల దిగుమతులపై కూడా:
ఔషధాలతో పాటు స్టీల్, అల్యూమినియం, రాగి ఉత్పత్తుల దిగుమతులపై కూడా టారిఫ్ విధానంలో మార్పులు చేశారు. వీటి కస్టమ్స్ విలువ ఆధారంగా సుంకాలను వసూలు చేసే కొత్త పద్ధతి వచ్చే సోమవారం నుంచి అమలులోకి రానుంది.
అమెరికా సుప్రీంకోర్టు గతంలో కొన్ని టారిఫ్లను రద్దు చేసినప్పటికీ, ట్రంప్ మాత్రం తన స్వదేశీ తయారీ విధానానికే మొగ్గు చూపుతూ ఈ కఠిన నిర్ణయాలు తీసుకుంటున్నారు.
ఇవి కూడా చదవండి
