Budget 2026: హైస్పీడ్ కారిడార్లతో రవాణా విప్లవం.. మౌలిక వసతులకు రికార్డు నిధులు!

Budget 2026: కేంద్ర ఆర్థిక మంత్రి నిర్మలా సీతారామన్ 2026-27 బడ్జెట్‌లో దేశ మౌలిక సదుపాయాలను ప్రపంచ స్థాయికి చేర్చేలా భారీ కేటాయింపులు చేశారు. ప్రధానంగా రవాణా, తయారీ, సహజ వనరుల వెలికితీతపై ఈసారి కేంద్రం ప్రత్యేక దృష్టి సారించింది.

వేగవంతమైన ప్రయాణం: దేశంలోని 7 ప్రధాన నగరాలను కలుపుతూ హైస్పీడ్ రైల్ కారిడార్లను నిర్మించాలని నిర్ణయించారు. ఇందులో భాగంగా హైదరాబాద్ నుంచి బెంగళూరు, చెన్నై,పుణె నగరాలకు అత్యంత వేగంగా చేరుకునే మార్గాలు సిద్ధం కానున్నాయి. అలాగే ముంబై-పుణె, ఢిల్లీ-వారణాసి వంటి మార్గాల్లోనూ వీటిని ఏర్పాటు చేస్తారు.

మౌలిక సదుపాయాల బడ్జెట్: దేశాభివృద్ధి పనుల కోసం గత ఏడాది కంటే రూ. 1 లక్ష కోట్లు అదనంగా, అంటే మొత్తం రూ. 12.2 లక్షల కోట్లను కేటాయించారు. మెగా టెక్స్‌టైల్ పార్కులు, హైటెక్ టూల్ రూమ్స్ ఏర్పాటు ద్వారా పరిశ్రమలను మరింత బలోపేతం చేయనున్నారు.

టెక్నాలజీ, ఎలక్ట్రానిక్స్: ఎలక్ట్రానిక్ విడిభాగాల తయారీ కోసం కేటాయింపులను రూ. 40,000 కోట్లకు పెంచారు. అంతేకాకుండా, సెమీకండక్టర్ రంగాన్ని ప్రోత్సహించడానికి ISM 2.0 (ఇండియా సెమీకండక్టర్ మిషన్) ను ప్రారంభించారు.

ఖనిజాల వెలికితీత: అరుదైన ఖనిజాల (Rare Earth Minerals) కోసం ఆంధ్రప్రదేశ్, కేరళ, ఒడిశా సహా ఐదు రాష్ట్రాల్లో ప్రత్యేక వెలికితీత ప్రాజెక్టులను చేపట్టనున్నారు. వీటితో పాటు కొత్తగా 3 రసాయన పార్కులను ఏర్పాటు చేయాలని ప్రతిపాదించారు.

జల రవాణా: రాబోయే ఐదేళ్లలో కొత్తగా 20 జాతీయ జలమార్గాలను అభివృద్ధి చేయనున్నారు. వారణాసి, పాట్నా నగరాల్లో నౌకల మరమ్మతు కేంద్రాలను ఏర్పాటు చేసి, పారిశ్రామిక కేంద్రాలను నేరుగా ఓడరేవులతో అనుసంధానించనున్నారు.

ఈ కేటాయింపుల వల్ల దేశంలో భారీగా ఉపాధి అవకాశాలు పెరగడంతో పాటు, రవాణా ఖర్చులు తగ్గి వాణిజ్యం వేగవంతం అవుతుందని ప్రభుత్వం భావిస్తోంది.