IPL 2026: విడతలవారీగా ఐపీఎల్ షెడ్యూల్.. మార్చి 15న బీసీసీఐ అవార్డులు!
- Published By: Phanindra
- March 11, 2026 / 08:34 AM IST
క్రికెట్ అభిమానులు ఎంతగానో ఎదురుచూస్తున్న ఇండియన్ ప్రీమియర్ లీగ్ (IPL 2026) 19వ సీజన్కు సంబంధించిన సందడి మొదలైంది. ఐపీఎల్ 2026 సీజన్కు సంబంధించిన మొదటి 20 రోజుల షెడ్యూల్ను బీసీసీఐ (BCCI) రేపు (మార్చి 12న) అధికారికంగా విడుదల చేయనుంది. ఈ విషయాన్ని బీసీసీఐ సెక్రటరీ దేవ్జిత్ సైకియా మంగళవారం స్వయంగా ధ్రువీకరించారు.
ప్రారంభ తేదీ మార్పు..
వాస్తవానికి ఈ మెగా టోర్నీని (IPL 2026) మార్చి 26న ప్రారంభించాలని నిర్వాహకులు ముందుగా భావించారు. కానీ, కొత్త సీజన్ సన్నాహకాల కోసం ఫ్రాంచైజీలకు, ఆటగాళ్లకు కాస్త అదనపు సమయం ఇవ్వాలనే ఉద్దేశంతో ఈ ప్రారంభ తేదీని మార్చి 28కి మార్చారు. సుదీర్ఘ టోర్నీకి ముందు ఆటగాళ్లు శారీరకంగా, మానసికంగా సన్నద్ధం కావడానికి ఈ నిర్ణయం దోహదపడుతుంది. ఇప్పటికే ఐపీఎల్లో పాల్గొనే జట్లన్నీ తమ ప్రాక్టీస్ క్యాంపులను ముమ్మరంగా కొనసాగిస్తున్నాయి.
తొలి విడత షెడ్యూల్ మాత్రమే ఎందుకంటే?
క్రికెట్ అభిమానులకు పూర్తి షెడ్యూల్ (IPL 2026) ఒకేసారి కాకుండా కేవలం 20 రోజుల వివరాలు మాత్రమే వెల్లడించడానికి ఒక బలమైన కారణం ఉంది. త్వరలో పశ్చిమ బెంగాల్, అస్సాం, తమిళనాడు రాష్ట్రాల్లో అసెంబ్లీ ఎన్నికలు జరగనున్నాయి. ఆయా రాష్ట్రాల్లో ఎన్నికల తేదీలు, భద్రతా బలగాల లభ్యతను దృష్టిలో ఉంచుకుని, ఎవరికీ ఎలాంటి ఇబ్బందీ కలగకుండా ఉండేందుకు మిగతా ఐపీఎల్ షెడ్యూల్ను తర్వాత దశలో విడుదల చేయాలని బీసీసీఐ వ్యూహాత్మకంగా నిర్ణయించింది.
ఇవి కూడా చదవండి
మార్చి 15న అవార్డుల పండగ..
మరోవైపు, భారత క్రికెట్ కీర్తిని విశ్వవ్యాప్తం చేసిన ఆటగాళ్లను సత్కరించేందుకు బీసీసీఐ సిద్ధమైంది. మార్చి 15న దేశ రాజధాని ఢిల్లీ వేదికగా బీసీసీఐ వార్షిక అవార్డుల ప్రదానోత్సవం అత్యంత ఘనంగా జరగనుంది. ఈ వేడుకకు ఇటీవలే టీ20 ప్రపంచకప్ సాధించిన పురుషుల జట్టుతో పాటు, వివిధ ఐసీసీ టోర్నీల్లో సత్తా చాటిన విజేతలను, కోచ్లను బోర్డు ప్రత్యేకంగా ఆహ్వానించింది. “ఈ కార్యక్రమంలో సీనియర్ పురుషుల జట్టుతో పాటు, 2025లో ట్రోఫీ నెగ్గిన సీనియర్ మహిళల జట్టు, అండర్-19 బాలుర, బాలికల జట్లను, అలాగే 2025 ఐసీసీ ఛాంపియన్స్ ట్రోఫీ విజేతలను బీసీసీఐ సగర్వంగా సన్మానించనుంది” అని దేవ్జిత్ సైకియా వెల్లడించారు.
ఇవి కూడా చదవండి
