Telangana; రైతులకు గుడ్ న్యూస్.. నేడే రైతు భరోసా నగదు జమ!

Rythu Bharosa: తెలంగాణ రాష్ట్రంలోని రైతులకు ప్రభుత్వం తీపి కబురు అందించింది. యాసంగి సీజన్‌కు సంబంధించి ‘రైతు భరోసా’ పంట పెట్టుబడి సాయం నిధులు నేటి (మార్చి 23) నుంచి రైతుల ఖాతాల్లో జమ కానున్నాయి. ముఖ్యమంత్రి రేవంత్ రెడ్డి ఆదివారం సిద్దిపేట జిల్లా నర్మెట వేదికగా బటన్ నొక్కి ఈ నిధులను విడుదల చేయగా, బ్యాంకుల పనిదినం కావడంతో నేడు నగదు బదిలీ ప్రక్రియ ప్రారంభమైంది.

తొలి విడత ప్రాధాన్యత: మొదటి విడతలో భాగంగా ఎకరం వరకు భూమి ఉన్న రైతుల ఖాతాల్లో నగదు జమ అవుతుంది. వీరికి ఎకరాకు రూ. 6,000 చొప్పున ప్రభుత్వం అందిస్తోంది.

లబ్ధిదారుల వివరాలు: రాష్ట్రవ్యాప్తంగా సుమారు 68.89 లక్షల మంది రైతులకు ఈ సాయం అందనుంది. ఇందుకోసం ప్రభుత్వం రూ. 3,446.94 కోట్లను కేటాయించింది.

జిల్లా వారీగా: అత్యధికంగా నల్గొండ జిల్లాలో 5.22 లక్షల మంది రైతులకు రూ. 268.57 కోట్లు విడుదలవ్వగా, అత్యల్పంగా మేడ్చల్ జిల్లాలో 24,935 మంది రైతులకు లబ్ధి చేకూరనుంది.

45 రోజుల్లో పూర్తి: మొత్తం పెట్టుబడి సాయం పంపిణీ ప్రక్రియను 45 రోజుల వ్యవధిలో పూర్తి చేస్తామని ప్రభుత్వం ప్రకటించింది. మొత్తం మీద రూ. 9 వేల కోట్లను రైతుల ఖాతాల్లో జమ చేయడమే లక్ష్యంగా పెట్టుకుంది.

రైతులకు సూచన:
బ్యాంకులు తెరుచుకోగానే నిధులు జమ కావడం ప్రారంభిస్తాయని, సంబంధిత మెసేజ్‌లు ఫోన్లకు వస్తాయని అధికారులు తెలిపారు. ఒకవేళ ఎకరం లోపు భూమి ఉండి కూడా నగదు జమ కాని పక్షంలో, స్థానిక వ్యవసాయాధికారిని సంప్రదించాలని ప్రభుత్వం సూచించింది.

రైతు సంక్షేమమే మా ధ్యేయం – సీఎం రేవంత్ రెడ్డి:
రాష్ట్రంలో ఆర్థిక ఇబ్బందులు ఉన్నప్పటికీ రైతుల మేలు కోరి ఈ నిధులను విడుదల చేస్తున్నట్లు సీఎం రేవంత్ రెడ్డి స్పష్టం చేశారు. అన్నదాతలకు అండగా ఉండటమే తమ ప్రభుత్వ ప్రాధాన్యత అని ఆయన పేర్కొన్నారు.