తెలంగాణపై జనసేన గురి.. ఒంటరి పోరుకు సై
- Published By: Vasishta
- August 24, 2026 / 12:58 PM IST
తెలంగాణ రాజకీయ యవనికపై తనదైన ముద్ర వేసేందుకు జనసేన పార్టీ వ్యూహాత్మక అడుగులు వేస్తోంది. ఆంధ్రప్రదేశ్లో కూటమి ప్రభుత్వంలో కీలక భాగస్వామిగా కొనసాగుతున్నప్పటికీ, తెలంగాణ గడ్డపై మాత్రం పార్టీ అస్తిత్వాన్ని చాటుకోవడమే లక్ష్యంగా కార్యాచరణను ముమ్మరం చేసింది. ఇటీవల పార్టీ అధినేత పవన్ కళ్యాణ్ను లక్ష్యంగా చేసుకుని అధికార కాంగ్రెస్ శ్రేణులు తీవ్ర విమర్శలు గుప్పించడం, ఆయన సభకు ప్రభుత్వం నుంచి అనుమతి నిరాకరణ ఎదురుకావడం వంటి పరిణామాలు జనసేన వర్గాల్లో కసిని రగిల్చాయి. మరోవైపు తెలంగాణలో జనసేనతో పొత్తు ఉండబోదని బీజేపీ స్పష్టం చేయడంతో, ఎవరిపైనా ఆధారపడకుండా ఒంటరి పోరుతోనే క్షేత్రస్థాయిలోకి వెళ్లాలని జనసేన నాయకత్వం నిర్ణయించింది.
ఈ రాజకీయ సమీకరణాల నడుమ హైదరాబాద్, ఖమ్మం వేదికగా జనసేన పార్టీ కీలక నిర్ణయాన్ని అధికారికంగా ప్రకటించింది. ఉమ్మడి ఖమ్మం, నల్గొండ, వరంగల్ జిల్లాల పట్టభద్రుల ఎమ్మెల్సీ స్థానానికి తమ పార్టీ అభ్యర్థిగా తెలంగాణ రాష్ట్ర వైద్య, ఆరోగ్య శాఖ మాజీ డైరెక్టర్ డాక్టర్ గడల శ్రీనివాసరావును బరిలోకి దించుతున్నట్లు వెల్లడించింది. ప్రస్తుతం జనసేన పార్టీ అధికార ప్రతినిధిగా, ఉమ్మడి ఖమ్మం జిల్లా పార్టీ సమన్వయకర్తగా బాధ్యతలు నిర్వర్తిస్తున్న గడల శ్రీనివాసరావు పేరును పార్టీ ప్రధాన కార్యదర్శి తాళ్లూరి రామ్, తెలంగాణ రాష్ట్ర ఇన్ఛార్జి శంకర్ గౌడ్ అధినేత పవన్ కళ్యాణ్ దృష్టికి తీసుకెళ్లగా, ఆయన పూర్తి సుముఖత వ్యక్తం చేశారు.
ప్రస్తుతం ఈ పట్టభద్రుల స్థానంలో ఎమ్మెల్సీగా ఉన్న తీన్మార్ మల్లన్న పదవీ కాలం త్వరలోనే ముగియనుండగా, 2027 మార్చిలో ఈ స్థానానికి ఎన్నికలు జరగనున్నాయి. అయితే ఎన్నికలకు చాలా సమయం ముందే అభ్యర్థిని ఖరారు చేసి క్షేత్రస్థాయి ప్రచారంలో ముందంజ వేయాలని జనసేన భావిస్తోంది. ఖమ్మంలో ఆదివారం తాళ్లూరి రామ్ అధ్యక్షతన జరిగిన పార్టీ కార్యకర్తల విస్తృత స్థాయి సమావేశంలో ఈ అంశంపై సమగ్ర చర్చ జరిగింది.
ఈ సమావేశం అనంతరం పార్టీ ప్రధాన కార్యదర్శి తాళ్లూరి రామ్ కీలక విషయాలు వెల్లడించారు. పట్టభద్రుల స్థానానికే పరిమితం కాకుండా, రాబోయే రోజుల్లో రాష్ట్రంలో జరగనున్న జడ్పీటీసీ, ఎంపీటీసీ ఎన్నికలతో పాటు ఖమ్మం కార్పొరేషన్ ఎన్నికల్లోనూ జనసేన నేరుగా పోటీ చేస్తుందని స్పష్టం చేశారు. అంతేకాకుండా, మరో పట్టభద్రుల నియోజకవర్గానికి సంబంధించిన అభ్యర్థి పేరును కూడా వారం రోజుల్లోనే అధికారికంగా ప్రకటిస్తామని తెలిపారు.
పార్టీ బలోపేతంలో భాగంగా సెప్టెంబరు 13న పార్టీ ఆధ్వర్యంలో భారీ ఎత్తున ‘జనసేన శంఖారావం’ కార్యక్రమాన్ని నిర్వహించనున్నట్లు ప్రకటించారు. తనను అభ్యర్థిగా ఖరారు చేసినందుకు డాక్టర్ గడల శ్రీనివాసరావు పార్టీ అధినేత పవన్ కళ్యాణ్కు, రాష్ట్ర నాయకత్వానికి కృతజ్ఞతలు తెలిపారు. తెలంగాణవ్యాప్తంగా పార్టీ నిర్మాణాన్ని వేగవంతం చేస్తామని, అన్ని లోక్సభ నియోజకవర్గాల వారీగా విస్తృత సమావేశాలు నిర్వహించి ప్రజల్లోకి వెళ్తామని ఆయన పేర్కొన్నారు.
ఆంధ్రప్రదేశ్లో బీజేపీ, టీడీపీలతో కలిసి అధికారం పంచుకుంటున్న జనసేన, తెలంగాణలో మాత్రం ప్రత్యేక రాజకీయ ప్రస్థానాన్ని నిర్మించుకోవాలని భావిస్తోంది. కాంగ్రెస్ విమర్శలను రాజకీయంగా తిప్పికొడుతూనే, బీజేపీ దూరం పెట్టిన పరిస్థితులను అవకాశంగా మలచుకుని సొంత ఓటు బ్యాంకును సృష్టించుకునే ప్రయత్నంలో ఉంది. ముందస్తుగానే ఎమ్మెల్సీ, స్థానిక సంస్థల ఎన్నికల కార్యాచరణను ప్రకటించడం ద్వారా తెలంగాణ రాజకీయాల్లో తాము ప్రత్యామ్నాయ శక్తిగా ఎదిగేందుకు సిద్ధంగా ఉన్నామనే స్పష్టమైన సందేశాన్ని జనసేన పంపింది.
