ఆటోమోటివ్ & ఏరోస్పేస్ అల్లాయ్ ప్లాంట్ ఏర్పాటు చేయండి ..రుసాల్ సీనియర్ మేనేజ్ మెంట్ తో మంత్రి నారా లోకేష్ భేటీ
- Published By: techteam
- June 6, 2026 / 07:29 AM IST
అల్యూమినియం ఫాయిల్ తయారీ యూనిట్ను నెలకొల్పండి
సెయింట్ పీటర్స్ బర్గ్ (రష్యా): ప్రపంచంలోనే అతిపెద్ద అల్యూమినియం సంస్థల్లో ఒకటైన రుసాల్ (RUSAL) సీనియర్ మేనేజ్ మెంట్ తో రాష్ట్ర విద్య, ఐటి, ఎలక్ట్రానిక్స్ శాఖల మంత్రి నారా లోకేష్ సెయింట్ పీటర్స్ బర్గ్ లో భేటీ అయ్యారు. ఈ సందర్భంగా మంత్రి లోకేష్ మాట్లాడుతూ… భారతదేశ పారిశ్రామిక కారిడార్లలో రెన్యువబుల్ ఎనర్జీని ఉపయోగించుకొని లో-కార్బన్ గ్రీన్ అల్యూమినియం స్మెల్టర్ & ఎక్స్ట్రూషన్ యూనిట్ నిర్మించండి. భారతదేశంలోని డీప్ వాటర్ పోర్టుల వద్ద ప్రత్యేకమైన వాటర్ఫ్రంట్ బెర్త్లు, క్రమబద్ధమైన కస్టమ్స్ క్లియరెన్స్లను ఉపయోగించుకొని ఒక కోస్టల్ అల్యూమినియం రిఫైనరీ, బాక్సైట్ దిగుమతి హబ్ను అభివృద్ధి చేయడానికి భాగస్వామ్యం వహించండి. భారతదేశంలో వేగంగా అభివృద్ధి చెందుతున్న ఆటోమోటివ్, ఎలక్ట్రానిక్స్ ఎకోసిస్టమ్లకు నేరుగా అనుసంధానం చేస్తూ, విశాఖపట్నం-చెన్నై కారిడార్లో హైవాల్యూ ఆటోమోటివ్ & ఏరోస్పేస్ అల్లాయ్ ప్లాంట్ ఏర్పాటుచేయండి.
దక్షిణాసియాలో వేగంగా విస్తరిస్తున్న ఫుడ్ ప్రాసెసింగ్, FMCG రంగాలకు సరఫరా చేయడానికి, ఒక పర్యావరణ అనుకూల అల్యూమినియం ఫాయిల్ తయారీ యూనిట్ను నెలకొల్పాలని మంత్రి లోకేష్ విజ్ఞప్తిచేశారు.
రుసాల్ మేనేజ్ మెంట్ ప్రతినిధులు మాట్లాడుతూ… యూసీ రుసాల్ (UC RUSAL) మార్చి 2025లో ఆంధ్రప్రదేశ్కు చెందిన పయనీర్ అల్యూమినియంలో 243 మిలియన్ డాలర్లకు 26% వాటాను కొనుగోలు చేసిందని తెలిపారు. భారత్ లోని ముంబై, న్యూఢిల్లీలో గల రుసాల్ కీలక వాణిజ్య కేంద్రాలు వాణిజ్య లాజిస్టిక్స్, కస్టమ్స్ క్లియరెన్స్లు, సాంకేతిక క్లయింట్ మద్దతును సమన్వయం చేస్తాయి. ఇక్కడి నుంచే రుసాల్ దక్షిణాసియా అంతటా ప్రాథమిక అల్యూమినియం, ప్రత్యేక మిశ్రమ లోహాల కోసం భారీస్థాయి పంపిణీ, సరఫరా ఒప్పందాలను నిర్వహిస్తుంది. భారతదేశంలోని ఆటోమోటివ్, ఏరోస్పేస్, పవర్ రంగాలకు అనుగుణంగా రూపొందించిన ప్రీమియం అల్యూమినియం-సిలికాన్, అల్యూమినియం-మెగ్నీషియం మిశ్రమ లోహాలను అందిస్తుంది. ద్వైపాక్షిక కారిడార్ల కింద, రుసాల్ ఒక కీలకమైన సప్లయ్ చైన్ భాగస్వామిగా పనిచేస్తూ, భారీస్థాయి అంతర్జాతీయ రవాణాతో దేశీయ ముడి పదార్థాల కొరతను తీరుస్తుందని తెలిపారు. మంత్రి లోకేష్ చేసిన ప్రతిపాదనలను పరిశీలిస్తామని చెప్పారు.
రుసాల్ (RUSAL) సంస్థ గురించి:
మాస్కో కేంద్రంగా పనిచేస్తున్న రుసాల్ సంస్థ ప్రపంచంలోనే అతిపెద్ద అల్యూమినియం ఉత్పత్తిదారులలో ఒకటి. ఇది బాక్సైట్ మైనింగ్, అల్యూమినా రిఫైనింగ్, అధునాతన గ్రీన్ అల్యూమినియం తయారీ (ALLOW బ్రాండ్) వంటి రంగాలలో సమగ్రంగా విస్తరించి ఉంది. ఐదు ఖండాల్లోని 20 దేశాలలో 90వేల మందికిపైగా ఉద్యోగులు కలిగిన ఈ సంస్థ గత ఏడాది సుమారు 12.2 బిలియన్ డాలర్ల ఆదాయాన్ని ఆర్జించింది.
