Washington: ట్రంప్ ప్రతీకార సుంకాలు.. ఏయే దేశంపై ఎంతెంత అంటే..?

అమెరికా అధ్యక్షుడు డొనాల్డ్‌ ట్రంప్‌ పలుదేశాలపై ప్రతీకార సుంకాలు విధిస్తున్నట్లు ప్రకటించారు. ఈ అర్ధరాత్రి నుంచి ఈ నిర్ణయం అమల్లోకి వస్తుందని తెలిపారు. వైట్‌హౌస్‌లోని రోజ్‌ గార్డెన్‌లో నిర్వహించిన ప్రెస్‌ కాన్ఫరెన్స్‌లో ఈ విషయాలు వెల్లడించారు. ఈ రోజును ట్రంప్‌ ‘లిబరేషన్‌ డే(liberation day)’గా నిర్వచించారు. ఈ కార్యక్రమానికి కేబినెట్‌ సభ్యులతో పాటు స్టీల్‌, ఆటోమొబైల్‌ కార్మికులను ట్రంప్‌ ఆహ్వానించారు. అమెరికా భవిష్యత్తు అమెరికన్ల చేతుల్లోనే ఉందన్నారు. ఇతర దేశాలు తమపై విధిస్తున్న సుంకాల్లో తాము సగమే విధిస్తున్నట్లు తెలిపారు. ఆయా దేశాలపై జాలితోనే ఇలా సగం సుంకాలు ప్రకటించినట్లు తెలిపారు. వీటిని రాయితీ టారిఫ్‌లుగా ట్రంప్‌ పేర్కొన్నారు.

భారత్‌పై తాము 26 శాతం సుంకాలు విధిస్తున్నట్లు ట్రంప్‌ ప్రకటించారు. ఇక భారత ప్రధాని మోడీ(Modi) గురించి ట్రంప్‌ ప్రస్తావించారు. తనకు మోడీ గొప్ప స్నేహితుడని, అయితే భారత్‌ అమెరికాతో సరైనవిధంగా వ్యవహరించడం లేదన్నారు. 52 శాతం సుంకాలను విధిస్తోందని ట్రంప్‌ అన్నారు. ఇక చైనాపై 34 శాతం సుంకాలు విధించనున్నట్లు అమెరికా అధ్యక్షుడు తెలిపారు. యూఎస్‌కు దిగుమతయ్యే అన్నిదేశాల ఉత్పత్తులపై కనీసం 10 శాతం టారిఫ్‌లు విధిస్తున్నట్లు ట్రంప్‌ ప్రకటించారు.

అమెరికాకు ఈరోజు పునర్జన్మ: ట్రంప్‌

‘‘ఈ రోజు కోసం అమెరికా ఎన్నో ఏళ్లుగా వేచి చూస్తోంది. అమెరికా ఇండస్ట్రీ ఈరోజు పునర్జన్మించినట్లు అయింది. యూఎస్‌ మళ్లీ సుసంపన్నమైన దేశంగా అవతరించిన రోజుగా గుర్తుండబోతుంది. అమెరికాను చాలా ఏళ్లుగా మోసగాళ్లు ఉపయోగించుకున్నారు. తమ టాక్స్‌ పేయర్లను గత 50 ఏళ్లుగా దోచుకున్నారు. ఇక అది జరగదు. మాపై సుంకాలు విధించే దేశాలపై తప్పకుండా సుంకాలు విధిస్తాం. అమెరికాకు ఈ రోజు నిజమైన ఆర్థిక స్వాతంత్ర్యం వచ్చిందన్నారు ట్రంప్..

ఇప్పుడు అమెరికా మరింత ఎదగడానికి అవకాశం వచ్చింది. సుంకాల ప్రకటనతో అమెరికాలో మళ్లీ పెద్ద ఎత్తున ఉద్యోగాలు వస్తాయి. కంపెనీలు తిరిగి వెనక్కి వస్తాయి. విదేశీ మార్కెట్లకు ద్వారాలు తెరుస్తాం. అమెరికాలో పోటీతత్వం పెరిగి సరసమైన ధరల్లో వస్తువులు లభిస్తాయి. దీంతో అమెరికా స్వర్ణయుగమవుతుంది. దశాబ్దాలుగా వాణిజ్య అడ్డంకులను అమెరికా తొలగిస్తూ వచ్చింది. కానీ పలు దేశాలు అమెరికా ఉత్పత్తులపై భారీ సుంకాలను విధిస్తూ వచ్చాయి. అనేక దేశాలు అమెరికా మేధో సంపత్తిని దొంగిలించాయి. పలు దేశాలు అన్యాయమైన నియమాలను అవలంభించాయి. అమెరికాలో దిగుమతి అవుతున్న మోటారు సైకిళ్లపై కేవలం 2.4 శాతమే పన్నులు విధిస్తున్నారు. అదే థాయిలాండ్‌, ఇతర దేశాలు అమెరికా నుంచి దిగుమతి చేసుకున్న ద్విచక్రవాహనాలపై 60 శాతం, భారత్‌ 70 శాతం, వియత్నాం 75 శాతం సుంకాలు విధిస్తున్నాయి.

మా కార్లు ఆ దేశాల్లో తక్కువగా అమ్ముడుపోతున్నాయి..

వాణిజ్య విషయానికి వచ్చినప్పుడు కొన్నిసార్లు స్నేహితుడు సైతం శత్రువు కంటే ప్రమాదకరం. దక్షిణ కొరియాలో తయారవుతున్న కార్లు 80 శాతం అక్కడే అమ్ముడవుతున్నాయి. జపాన్‌లో తయారవుతున్న కార్లు అక్కడే 90 శాతం అమ్ముడుపోతున్నాయి. అదే అమెరికాలో తయారవుతున్న కార్లు అక్కడ తక్కువ సంఖ్యలోనే అమ్ముడవుతున్నాయి. అమెరికాకు చెందిన ఫోర్డు కార్లు ఇతర దేశాల్లో చాలా పరిమిత సంఖ్యలో అమ్మకాలు జరుగుతున్నాయి. ఈ అసమతుల్యత అమెరికాకు నష్టం తెస్తోంది. అందుకే అన్ని విదేశీ తయారీ ఆటోమొబైల్స్‌పై 25 శాతం సుంకాలు ఈ అర్ధరాత్రి నుంచి విధించనున్నాం. ఇతర దేశాలు అమెరికాను చెడుగా చూపిస్తున్నాయి. అమెరికా దిగుమతులపై అసమానమైన సుంకాలు విధించాయి. అమెరికాలో ఉత్పత్తులు తయారుచేసే కంపెనీలపై ఎలాంటి పన్నులు వసూలు చేయం. తాను ప్రతీకార పన్నుల ప్రతిపాదన తేవడంతో అనేక దేశాల రాజులు, రాయబారులు వీటిపై స్పందించారు. పన్నులపై మినహాయింపులు కోరారు. అయితే మీరు సుంకాలు తగ్గిస్తేనే తాను తగ్గిస్తానని చెప్పాను. కరెన్సీని మార్చుకోవద్దని, బిలియన్‌ డాలర్ల అమెరికా వస్తువులను కొనాలని చెప్పానని’’ అని ట్రంప్‌ పేర్కొన్నారు.

ట్రంప్‌ విధించిన ప్రతీకార సుంకాలు ..

భారత్‌: 26 శాతం
చైనా: 34 శాతం
ఈయూ: 20 శాతం
తైవాన్‌: 32 శాతం
జపాన్‌: 24 శాతం
దక్షిణ కొరియా: 25 శాతం
థాయిలాండ్‌: 36 శాతం
స్విట్జర్లాండ్‌: 31 శాతం
ఇండోనేషియా: 32 శాతం
మలేషియా: 24 శాతం
కంబోడియా: 49 శాతం
యూకే: 10 శాతం
దక్షిణాఫ్రికా: 30 శాతం
బ్రెజిల్‌: 10 శాతం
బంగ్లాదేశ్‌ 37 శాతం
సింగపూర్‌: 10 శాతం
ఇజ్రాయెల్: 17 శాతం
పిలిఫ్ఫీన్స్‌: 17 శాతం
చిలి: 10 శాతం
ఆస్ట్రేలియా: 10 శాతం
పాకిస్థాన్‌: 29 శాతం
టర్కీ: 10 శాతం
శ్రీలంక: 44 శాతం
కొలంబియా: 10 శాతం