Netflix ని నాశనం చేసిందెవరు? కొత్త బాస్, కొత్త వ్యూహాలు ఫలిస్తాయా?

ఒకప్పుడు నెట్‌ఫ్లిక్స్‌లో కొత్త సిరీస్‌ వస్తోందంటే చాలు.. ప్రపంచమంతా దాని గురించే మాట్లాడుకునేది. రాత్రికి రాత్రే బింజ్‌ వాచ్‌లు, సోషల్ మీడియాలో మీమ్స్‌, తదుపరి సీజన్‌ కోసం ఎదురుచూపులు.. ఇదీ నెట్‌ఫ్లిక్స్‌ సృష్టించిన క్రేజ్‌! కానీ ఇప్పుడు సీన్‌ మారుతోంది. చేతినిండా కంటెంట్‌ ఉన్నా, ప్రేక్షకులను కట్టిపడేసే హిట్‌లు మాత్రం ఆశించిన స్థాయిలో రావడం లేదు. మరోవైపు యూట్యూబ్‌ టీవీల్లోనూ దూసుకుపోతోంది. మరి ప్రపంచ వినోద రంగాన్నే మార్చేసిన నెట్‌ఫ్లిక్స్‌కు ఏమైంది? ప్రేక్షకులు దూరమవుతున్నారా? లేక వాళ్ల అభిరుచులే మారిపోయాయా?

కంటెంట్‌ కొండంత.. క్రేజ్‌ మాత్రం తగ్గుతోంది!

స్ట్రేంజర్ థింగ్స్, వెడ్నెస్‌డే, కె-పాప్ డెమన్ హంటర్స్ వంటి విజయాలతో ప్రపంచవ్యాప్తంగా గుర్తింపు తెచ్చుకున్న నెట్‌ఫ్లిక్స్‌.. ఇప్పుడు మరో భారీ హిట్‌ కోసం ఎదురుచూస్తోంది. రోజుకో కొత్త సినిమా, సిరీస్‌, పాడ్‌కాస్ట్‌ తీసుకొస్తున్నా.. వాటిలో ఏది ప్రపంచవ్యాప్తంగా సంచలనం సృష్టిస్తుందనే ప్రశ్నకు స్పష్టమైన సమాధానం కనిపించడం లేదు.

ఈ ప్రభావం వ్యాపారంపైనా పడుతోంది. 2026 మూడో త్రైమాసికంలో నెట్‌ఫ్లిక్స్‌ అమ్మకాల వృద్ధి మూడేళ్లలోనే అత్యంత నెమ్మదిగా నమోదైంది. ఈ ఏడాది కంపెనీ షేర్‌ విలువ దాదాపు 28 శాతం పడిపోయింది. ఖర్చులు తగ్గించుకునేందుకు సుమారు వెయ్యి ఉద్యోగాలను తొలగించే ప్రణాళికను కూడా ప్రకటించింది. కంటెంట్‌ విభాగంలో కీలక మార్పులు చేపట్టింది. అంటే సమస్య కేవలం ఒకటి రెండు సినిమాలు ఫ్లాప్‌ కావడం కాదు.. నెట్‌ఫ్లిక్స్‌ భవిష్యత్తు వ్యూహంపైనే ఇప్పుడు చర్చ మొదలైంది.

నెట్‌ఫ్లిక్స్‌కు అసలైన విలన్‌ యూట్యూబేనా?

నెట్‌ఫ్లిక్స్‌ సహ వ్యవస్థాపకుడు రీడ్ హేస్టింగ్స్‌ ఒకప్పుడు తమకు ప్రధాన పోటీ నిద్రేనని చెప్పారు. ప్రేక్షకులు నెట్‌ఫ్లిక్స్‌ చూడకుండా నిద్రపోవడమే సమస్య అన్నది ఆయన మాటల వెనుక అర్థం. కానీ ఇప్పుడు నిద్ర కంటే పెద్ద ప్రత్యర్థి వచ్చేసింది.. అదే యూట్యూబ్‌!

అమెరికాలో యూట్యూబ్‌ టీవీ వీక్షణ సమయం నెట్‌ఫ్లిక్స్‌ కంటే రెండింతలకుపైగా ఉందని నీల్సన్‌ గణాంకాలు సూచిస్తున్నాయి. యూట్యూబ్‌లో చిన్న వీడియోలు, పాడ్‌కాస్ట్‌లు, సైన్స్‌ ప్రయోగాలు, పిల్లల కార్యక్రమాలు.. ఇలా ఏది కావాలన్నా దొరుకుతుంది. పైగా నచ్చకపోతే వెంటనే మరో వీడియోకు వెళ్లిపోవచ్చు. నెట్‌ఫ్లిక్స్‌లో మాత్రం సినిమా లేదా సిరీస్‌ కోసం ప్రత్యేకంగా సమయం కేటాయించాలి.

ఇక్కడే అసలు పోటీ ఉంది. నెట్‌ఫ్లిక్స్‌ ప్రేక్షకులకు ఏం చూపించాలా అని ఆలోచిస్తుంటే.. యూట్యూబ్‌ వాళ్లు ఏది చూడాలనుకుంటున్నారో దానికి తగ్గట్టుగా కంటెంట్‌ను అందిస్తోంది.

అందరికీ అన్నీ ఇవ్వాలనే ప్రయత్నమే కొంపముంచుతోందా?

ప్రేక్షకులను నిలబెట్టుకోవడానికి నెట్‌ఫ్లిక్స్‌ ఇప్పుడు పాడ్‌కాస్ట్‌లు, యూట్యూబ్‌ క్రియేటర్ల కార్యక్రమాలు, లైవ్‌ స్పోర్ట్స్‌, ఇతర సంస్థల సినిమాలపై దృష్టి పెడుతోంది. ఫ్రాన్స్‌లో లైవ్ టెలివిజన్‌ కార్యక్రమాలను అందించేందుకు కూడా ఒప్పందం చేసుకుంది. మరోవైపు డిస్నీ, సోనీ, యూనివర్సల్‌ వంటి సంస్థల నుంచి కంటెంట్‌ను తీసుకొస్తోంది.

కానీ ఇక్కడో సమస్య ఉంది. నెట్‌ఫ్లిక్స్‌ కూడా యూట్యూబ్‌లా మారిపోతే.. దానికి ఉన్న ప్రత్యేకత ఏమవుతుంది? ప్రేక్షకులు సబ్‌స్క్రిప్షన్‌ తీసుకునేది అక్కడ వేలాది కార్యక్రమాలు ఉన్నాయని మాత్రమే కాదు. తమకు గుర్తుండిపోయే కథలు, ప్రపంచవ్యాప్తంగా చర్చకు దారితీసే సిరీస్‌లు ఉంటాయని కూడా. ఆ ప్రత్యేకత తగ్గితే, కొత్త కంటెంట్‌ సంఖ్య పెరిగినా ప్రేక్షకుల్లో ఉత్సాహం పెరుగుతుందనే గ్యారంటీ లేదు.

కొత్త బాస్‌.. పాత మ్యాజిక్‌ను తీసుకొస్తారా?

ఈ పరిస్థితిని మార్చేందుకు నెట్‌ఫ్లిక్స్‌ అనుభవజ్ఞుడైన ఎంటర్‌టైన్‌మెంట్‌ ఎగ్జిక్యూటివ్‌ పీటర్ రైస్‌ను చీఫ్ కంటెంట్ ఆఫీసర్‌గా నియమించింది. డిస్నీ, ఫాక్స్‌ సంస్థల్లో పనిచేసిన ఆయన.. నెట్‌ఫ్లిక్స్‌కు కొత్త సృజనాత్మక దిశ చూపిస్తారని యాజమాన్యం ఆశిస్తోంది.

అయితే అసలు పరీక్ష ఆయనకు ఎదురయ్యే సవాళ్లలోనే ఉంది. ప్రేక్షకులు మర్చిపోలేని కథలను మళ్లీ అందించగలరా? ప్రపంచవ్యాప్తంగా చర్చకు దారితీసే హిట్‌లను సృష్టించగలరా? లేక ఎక్కువ కంటెంట్‌ అందించడమే విజయమని భావించే పోటీలో నెట్‌ఫ్లిక్స్‌ కూడా చిక్కుకుపోతుందా?

ఒకప్పుడు ప్రేక్షకులు ఏం చూడాలో నిర్ణయించిన నెట్‌ఫ్లిక్స్‌.. ఇప్పుడు ప్రేక్షకులు తమ దగ్గరే ఎందుకు ఉండాలనే ప్రశ్నకు సమాధానం చెప్పాల్సి వస్తోంది. స్ట్రీమింగ్‌ ప్రపంచంలో గెలవడానికి వేలాది సినిమాలు సరిపోవు. ప్రేక్షకులు మర్చిపోలేని ఒక్క కథ కూడా కొన్నిసార్లు మొత్తం ఆటను మార్చేయగలదు!

—సూర్య ప్రకాష్ జోశ్యుల