Rahul Gandhi: కేంద్ర మంత్రి పూరిపై రాహుల్ సంచలన ఆరోపణలు..!

దేశంలో నెలకొన్న ఆయిల్, గ్యాస్ సంక్షోభంపై పార్లమెంట్ ఉభయ సభలు తీవ్ర వాడివేడి చర్చలకు వేదికవుతున్నాయి. ఈ క్రమంలో లోక్‌సభ ప్రతిపక్ష నేత రాహుల్ గాంధీ (Rahul Gandhi) కేంద్ర ప్రభుత్వంపై, ముఖ్యంగా పెట్రోలియం శాఖ మంత్రి హర్దీప్‌సింగ్ పూరిపై సంచలన ఆరోపణలు చేసి సభలో పెను దుమారం రేపారు. పశ్చిమాసియా యుద్ధ పరిస్థితుల వేళ.. రష్యా నుంచి చమురు కొనుగోలు చేసేందుకు భారత్‌కు అమెరికా ‘అనుమతి’ ఇవ్వడాన్ని, దానికి కేంద్రం తలొగ్గడాన్ని రాహుల్ తీవ్రస్థాయిలో తప్పుబట్టారు.

అమెరికా అనుమతి తీసుకోవడం ఏంటి?
సభలో రాహుల్ (Rahul Gandhi) మాట్లాడుతూ భారత విదేశాంగ, ఇంధన విధానాలపై సూటి ప్రశ్నలు సంధించారు. “ఒక దేశ పునాదులు కేవలం దాని ఇంధన భద్రతపైనే ఆధారపడి ఉంటాయి. అలాంటప్పుడు మనం ఎవరి వద్ద చమురు, గ్యాస్ కొనుగోలు చేయాలో నిర్ణయించే హక్కు అమెరికాకు ఎక్కడిది? రష్యా నుంచి ఇంధనం కొనాలా వద్దా అని అమెరికా అనుమతించడానికి భారత ప్రభుత్వం ఎలా అంగీకరిస్తుంది?” అని ప్రభుత్వాన్ని నిలదీశారు.

చమురు ఉత్పత్తి దేశాలతో మన సంబంధాలు ఎలా ఉండాలో మనమే స్వతంత్రంగా నిర్ణయించుకోవాలని, అంతటి సార్వభౌమత్వాన్ని ఇతర దేశాలకు తాకట్టు పెట్టడం దారుణమన్నారు. భారత్ లాంటి అతిపెద్ద దేశం.. ఆయిల్ కొనుగోళ్ల కోసం వేరే దేశ అధ్యక్షుడి వద్ద అనుమతులు తీసుకోవాల్సిన పరిస్థితి ఎందుకు వచ్చిందని (Rahul Gandhi) ప్రశ్నించారు.