Revanth Reddy: కేరళలో యూడీఎఫ్ మేనిఫెస్టో.. విడుదల చేసిన రేవంత్ రెడ్డి!

Revanth Reddy: కేరళ అసెంబ్లీ ఎన్నికల నేపథ్యంలో కాంగ్రెస్ నేతృత్వంలోని యునైటెడ్ డెమోక్రటిక్ ఫ్రంట్ (UDF) తన ఎన్నికల మేనిఫెస్టోను ఘనంగా ప్రకటించింది. కేరళలో జరిగిన ఈ కార్యక్రమంలో తెలంగాణ ముఖ్యమంత్రి రేవంత్ రెడ్డి ముఖ్య అతిథిగా పాల్గొని ఈ మేనిఫెస్టోను విడుదల చేశారు.

తెలంగాణ తరహాలో సంక్షేమ పథకాలు:
తెలంగాణలో అమలు చేస్తున్న ప్రజాదరణ పొందిన పథకాలను కేరళ మేనిఫెస్టోలో కూడా పొందుపరిచారు. ముఖ్యంగా మహిళలకు ఉచిత బస్సు ప్రయాణ సౌకర్యాన్ని కల్పిస్తామని హామీ ఇచ్చారు. అలాగే విద్యార్థినుల ప్రోత్సాహార్థం నెలకు రూ.1,000 ఆర్థిక సాయం అందించనున్నట్లు పేర్కొన్నారు.

ఆరోగ్యం , యువతకు ప్రాధాన్యత:
సామాన్యుల ఆరోగ్య భద్రత కోసం ప్రతి కుటుంబానికి రూ.25 లక్షల ఆరోగ్య బీమా కల్పిస్తామని యూడీఎఫ్ ప్రకటించింది. యువత స్వయం ఉపాధిని ప్రోత్సహించేందుకు రూ.5 లక్షల వరకు వడ్డీ లేని రుణాలను అందిస్తామని మేనిఫెస్టోలో పొందుపరిచారు.

సాధికార కమిటీ ఏర్పాటు:
ప్రకటించిన హామీలన్నీ సక్రమంగా అమలు చేసేందుకు ఒక ప్రత్యేక సాధికార కమిటీని ఏర్పాటు చేస్తామని ఈ సందర్భంగా వెల్లడించారు. మేనిఫెస్టోలోని అంశాలు కేరళ ప్రజల జీవితాల్లో వెలుగు నింపుతాయని, తెలంగాణ తరహాలోనే ఇక్కడ కూడా కాంగ్రెస్ విజయం సాధిస్తుందని సీఎం రేవంత్ రెడ్డి ఆశాభావం వ్యక్తం చేశారు.