Amit Shah: మమత సర్కార్‌పై అమిత్ షా ‘ఛార్జిషీట్’.. మణిపూర్ సెగతో టీఎంసీ కౌంటర్!

పశ్చిమ బెంగాల్ (West Bengal) అసెంబ్లీ ఎన్నికలు సమీపిస్తున్న కొద్దీ అక్కడ రాజకీయ వాతావరణం మరింత వేడెక్కుతోంది. అధికార తృణమూల్ కాంగ్రెస్ (TMC), ప్రతిపక్ష బీజేపీ (BJP) మధ్య మాటల యుద్ధం తారస్థాయికి చేరింది. ముఖ్యమంత్రి మమతా బెనర్జీ ప్రభుత్వ వైఫల్యాలను, అవినీతిని ఎండగడుతూ కేంద్ర హోంమంత్రి అమిత్ షా (Amit Shah) కోల్‌కతా వేదికగా శనివారం ఒక ‘ఛార్జిషీట్’ను (Charge sheet) విడుదల చేశారు. 15 ఏళ్ల టీఎంసీ దుష్పరిపాలన రాష్ట్రాన్ని ఏ విధంగా భ్రష్టుపట్టించిందో వివరిస్తూ ఆయన తీవ్ర స్థాయి ధ్వజమెత్తారు.

అమిత్ షా ఆరోపణాస్త్రాలు
విలేకరుల సమావేశంలో మాట్లాడిన అమిత్ షా (Amit Shah).. టీఎంసీ ఓటు బ్యాంకు రాజకీయాలపై తీవ్ర విమర్శలు గుప్పించారు. గతంలో అస్సాంలోనూ భారీగా చొరబాట్లు ఉండేవని, కానీ అక్కడ బీజేపీ అధికారంలోకి రాగానే ఉక్కుపాదంతో అణిచివేసిందని షా గుర్తుచేశారు. కానీ, ఇప్పుడు దేశంలోకి చొరబాటుదారులు (Infiltrators) కేవలం బెంగాల్ సరిహద్దుల గుండానే యథేచ్ఛగా వస్తున్నారని, ఇది దేశ భద్రతకు తీవ్ర ఆందోళనకరమని పేర్కొన్నారు. టీఎంసీ అనుసరిస్తున్న మైనారిటీ బుజ్జగింపు రాజకీయాల (Appeasement politics) కారణంగా, ఈశాన్య రాష్ట్రాలను దేశంతో కలిపే అత్యంత కీలకమైన ‘సిలిగుడి కారిడార్’ భద్రతకే ముప్పు వాటిల్లిందని ఆయన ఆందోళన వ్యక్తం చేశారు. గత 15 ఏళ్లుగా బెంగాల్‌లో అవినీతి రాజ్యమేలుతోందని, శాంతిభద్రతలు పూర్తిగా క్షీణించాయని మండిపడ్డారు.

కోర్టులు స్పష్టమైన ఆదేశాలు ఇచ్చినప్పటికీ, సరిహద్దుల్లో కంచె (Border fencing) ఏర్పాటు చేసేందుకు టీఎంసీ ప్రభుత్వం బీఎస్‌ఎఫ్‌కు (BSF) కనీసం భూమి కూడా కేటాయించడం లేదని షా (Amit Shah) ఆరోపించారు. ఎక్కడ చొరబాటుదారుల ఓట్లు గల్లంతవుతాయో అన్న భయంతోనే.. మమతా బెనర్జీ ఉద్దేశపూర్వకంగా ఎన్నికల సంఘం పైనా, ‘సర్‌’ (SAR) ప్రక్రియపైనా నిరాధార ఆరోపణలు చేస్తున్నారని విమర్శించారు.

బీజేపీకి టీఎంసీ కౌంటర్
అమిత్ షా (Amit Shah) ఆరోపణలపై తృణమూల్ కాంగ్రెస్ అదే స్థాయిలో దీటుగా స్పందించింది. ఎన్నికల ముందు రాష్ట్ర ప్రజల మధ్య మతపరమైన చీలికలు తెచ్చి పబ్బం గడుపుకునేందుకే బీజేపీ ఈ నాటకాలకు తెరతీసిందని టీఎంసీ నేతలు మహువా మొయిత్రా, బ్రత్య బసు, కీర్తి ఆజాద్‌లు మండిపడ్డారు. “బెంగాల్ గురించి లెక్చర్లు ఇస్తున్న అమిత్ షా.. గత మూడేళ్లుగా మణిపూర్‌లో రగులుతున్న జాతి హింసపై (Manipur violence) ఎందుకు నోరు విప్పరు? బీజేపీ పాలిత రాష్ట్రాల్లో మహిళలకు భద్రత ఏదీ?” అని వారు సూటిగా ప్రశ్నించారు. కేవలం రాజకీయ లబ్ధి కోసమే అమిత్ షా (Amit Shah) పదేపదే అసత్యాలు ప్రచారం చేస్తున్నారని టీఎంసీ ఎదురుదాడికి దిగింది.