మిస్ వరల్డ్ 2026 జొహైరీ విజయం వెనక..?
- Published By: Srinivas Mohan
- September 7, 2026 / 08:30 PM IST
“బ్యూటీ విత్ ఎ పర్పస్” అనేది మిస్ వరల్డ్ పోటీల వెనక ఉన్న ముఖ్య ఉద్దేశ్యం. దానికి పూర్తిస్థాయిలో అనుగుణమైన భావజాలమున్న డొమినికన్ రిపబ్లిక్ అందాల భామ జొహైరీ మోలో డొమింగ్యూజ్.. 2026 మిస్ వరల్డ్ అందగత్తెగా నిలిచారు. గత ఏడాది విజేత, థాయ్లాండ్కు చెందిన సుచతా చువాంగ్శ్రీ.. జొహైరీకి కిరీటాన్ని అలంకరించారు. ఈ విజయంతో దాదాపు 44 ఏళ్ల సుదీర్ఘ విరామం తర్వాత డొమినికన్ రిపబ్లిక్కు మిస్ వరల్డ్ టైటిల్ దక్కింది. 1982లో మరియాసెలా అల్వారెజ్ ఆ దేశం తరఫున తొలిసారి ఈ కిరీటాన్ని గెలుచుకున్నారు.
“వాయిసెస్ ఆఫ్ టుమారో” పేరుతో జొహైరీ స్థాపించిన సేవా కార్యక్రమం ఆమె విజయానికి బాటలు వేసింది. పేద వర్గాల పిల్లలు, యువతకు ఇంగ్లీష్ విద్యను అందించడమే ఈ సంస్థ ముఖ్య ఉద్దేశం. ఫైనల్ రౌండ్లోనూ ఇదే అంశంపై మాట్లాడుతూ.. “పేద పిల్లలకు ఇంగ్లిష్ విద్యను అందించడం వారి జీవితాల్లో గొప్ప అవకాశాలకు తలుపులు తెరుస్తుంది” అని ఆమె చెప్పిన సమాధానం న్యాయనిర్ణేతలను ఎంతగానో ఆకట్టుకుంది. “బ్యూటీ విత్ ఎ పర్పస్” అనే మిస్ వరల్డ్ నినాదానికి ఆమె నేపథ్యం, లక్ష్యాలు సరిగ్గా సరిపోవడంతో విజయం ఆమెను వరించింది.
24 ఏళ్ల జొహైరీ మోలా విద్య, మోడలింగ్, జర్నలిజం వంటి బహుళ రంగాల్లో రాణిస్తున్నారు. యూనివర్సిడాడ్ ఇబెరోఅమెరికానా నుంచి బిజినెస్ మేనేజ్మెంట్లో డిగ్రీ పూర్తి చేసిన ఆమె.. ఒకవైపు ప్రొఫెషనల్ మోడల్గా కొనసాగుతూనే, మరోవైపు సాహిత్యం, సోషల్ స్టడీస్ టీచర్గా పనిచేస్తున్నారు. అంతేకాకుండా, యూనివిజన్ న్యూయార్క్ ఛానెల్ కోసం న్యూస్ కరస్పాండెంట్గా కూడా వ్యవహరిస్తున్నారు. ఆమెకు స్పానిష్, ఇంగ్లిష్ భాషల్లో మంచి ప్రావీణ్యం ఉంది.
ప్రతిష్ఠాత్మక మిస్ వరల్డ్ 2026 కిరీటాన్ని డొమినికన్ రిపబ్లిక్కు చెందిన జొహైరీ మోలా డొమింగ్యూజ్ గెలుచుకున్నారు. వియత్నాంలోని అట్టహాసంగా జరిగిన 73వ మిస్ వరల్డ్ ఫైనల్స్లో ఆమె విజేతగా నిలిచారు. ప్రపంచవ్యాప్తంగా 110 దేశాల నుంచి వచ్చిన సుందరీమణులతో పోటీపడి జొహైరీ మోలా ఈ టైటిల్ను కైవసం చేసుకున్నారు. ఈ పోటీలో స్పెయిన్కు చెందిన ఎలిసబెత్ రేనెస్ ఫస్ట్ రన్నరప్గా, మలేషియాకు చెందిన తానుసియా శెట్టి సెకండ్ రన్నరప్గా నిలిచారు. వియత్నాం, ఎరిత్రియా, దక్షిణాఫ్రికా దేశాల ప్రతినిధులు టాప్ 6లో స్థానం సంపాదించారు.
