శర్వాతో శ్రీను వైట్ల రీ-ఎంట్రీ.. జార్జ్ క్రిష్‌తో హిట్ టార్గెట్!

టాలీవుడ్‌లో ఒకప్పుడు కామెడీ ఎంటర్‌టైనర్లతో ప్రత్యేక గుర్తింపు తెచ్చుకున్న దర్శకుడు శ్రీను వైట్ల(Srinu Vaitla) మరో కీలక ప్రాజెక్ట్‌తో ప్రేక్షకుల ముందుకు రావడానికి సిద్ధమవుతున్నారు. గత కొన్ని సంవత్సరాలుగా ఆయన సినిమాలు ఆశించిన స‌క్సెస్‌ను అందుకోకపోవడంతో, ఇప్పుడు శర్వానంద్(Sharwanand) హీరోగా రూపొందనున్న జార్జ్ క్రిష్‌(George Krish)పై సినీ వర్గాల్లో ఆసక్తికర చర్చ సాగుతోంది. మొదట ఈ సినిమాను మరో ప్రముఖ నిర్మాణ సంస్థ చేపడుతుందనే ప్రచారం జరిగినప్పటికీ, ప్రస్తుతం నిర్మాత అనిల్ సుంకర(Anil Sunkara) ఈ ప్రాజెక్ట్‌ను నిర్మించనున్నట్లు సమాచారం. జూలై తొలి వారంలో రెగ్యులర్ షూటింగ్ ప్రారంభం కానుండగా, ఇప్పటికే ప్రీ ప్రొడక్షన్ పనులు వేగంగా కొనసాగుతున్నాయని తెలుస్తోంది.

ఈ కథలో ఎమోష‌న్స్ కు ప్రాధాన్యం ఉండటంతో పాటు వినోదాన్ని కూడా సమపాళ్లలో మిళితం చేసినట్లు టాక్ వినిపిస్తోంది. చిన్న వయసులో జరిగిన ఒక నిర్ణయం లేదా పొరపాటు కారణంగా హీరో జీవితంలో చోటుచేసుకునే మార్పులు కథకు ప్రధాన బలంగా నిలుస్తాయని చెబుతున్నారు. శర్వానంద్ పాత్రలో పలు కోణాలు ఉండటంతో ఆయన ఈ కథపై ప్రత్యేక ఆసక్తి చూపినట్లు సమాచారం. మరోవైపు మ్యాడ్(MAD), 8 వసంతాలు(8 vasanthalu) ద్వారా గుర్తింపు పొందిన అనంతిక సనీల్ కుమార్(Ananthika Sanil kumar) హీరోయిన్‌గా నటించే అవకాశాలు ఉన్నాయనే వార్తలు వినిపిస్తున్నాయి. అధికారిక ప్రకటన కోసం అభిమానులు ఎదురుచూస్తున్నారు.

అయితే ఈ సినిమాపై ఎక్కువగా చర్చకు కారణమవుతున్న అంశం శ్రీను వైట్ల తన పాత కామెడీ శైలిని తిరిగి తెరపైకి తీసుకురావాలనే ప్రయత్నమే. గతంలో ఆయన తెరకెక్కించిన పలు బ్లాక్‌బస్టర్ సినిమాల్లో కనిపించిన క్యారెక్టర్ ఓరియెంటెడ్ కామెడీ, ఎంట‌ర్టైన్మెంట్ సీన్స్ ఈ సినిమాలో కూడా ప్రధాన ఆకర్షణలుగా ఉండనున్నట్లు తెలుస్తోంది. తొలి షెడ్యూల్‌లో కీలక కథా ఘట్టాలను షూట్ చేయ‌గా, తదుపరి షెడ్యూల్‌లో ప్రధాన నటీనటుల మధ్య సన్నివేశాలకు ప్రాధాన్యం ఇవ్వనున్నారు. మొత్తంగా చూస్తే జార్జ్ క్రిష్ శ్రీను వైట్ల కెరీర్‌లో మరో టర్నింగ్ పాయింట్‌గా మారుతుందా లేదా అన్నది ఇప్పుడు ఆసక్తికరంగా మారింది.