శాంసంగ్ ఫోన్ లలో ఇక గూగుల్ కనిపించకపోవచ్చు

ఇటీవల టెక్‌ ప్రపంచంలో చాట్‌ జీపీటీ సంచలనం సృష్టిస్తోంది. ఆధునికతరం ఆర్టిఫిషియల్‌ ఇంటెలిజెన్స్‌ సాంకేతికతకు చాట్‌ జీపీటీ ప్రతిరూపం అని చెప్పవచ్చు. కాగా చాట్‌ జీపీటీనీ మైక్రోసాఫ్ట్‌ సంస్థ తన బింగ్‌ సెర్చ్‌ ఇంజన్‌కు జోడిస్తుండడంతో గూగుల్‌కు బింగ్‌కు మధ్య పోటీ తీవ్రమైంది. ఈ నేపథ్యంలో ప్రముఖ ఎలక్ట్రానిక్‌ ఉపకరణాల సంస్థ శామ్‌సంగ్‌ తన మొబైల్‌ ఫోన్లలో ఇకపై గూగుల్‌ స్థానంలో బింగ్‌ను ప్రవేశపెట్టాలని భావిస్తోంది. ఇప్పటి వరకు శామ్‌సంగ్‌ తాను విడుదల చేసిన ఫోన్లలో గూగుల్‌, మైక్రోసాఫ్ట్‌ కంపెనీలకు చెందిన యాప్‌లు అందించింది. శామ్‌సంగ్‌ ఫోన్లలో డిఫాల్ట్‌ సెర్చ్‌ ఇంజన్‌గా గూగుల్‌ దర్శనమివ్వడం విదితమే. అయితే మారుతున్న సాంకేతికతను అందిపుచ్చుకునే క్రమంలో గూగుల్‌ స్థానంలో బింగ్‌ను డిఫాల్ట్‌గా తీసుకురావడంపై శామ్‌సంగ్‌ కసరత్తులు చేస్తున్నట్లు తెలిసింది. అదే జరిగితే గూగుల్‌కు 3 బిలియన్‌ డాలర్ల వరకు నష్టం వాటిల్లే అవకాశం ఉందని తెలిపింది.