Telangana: మరో ఎన్నికల సమరానికి తెలంగాణ సిద్ధం!
- Published By: Vasishta
- April 18, 2026 / 03:30 PM IST
తెలంగాణలో పంచాయతీ ఎన్నికల కోలాహలం ముగిసిన వెంటనే, ఇప్పుడు మరో రాజకీయ యుద్ధానికి రంగం సిద్ధమైంది. రాష్ట్రంలో ఖాళీగా ఉన్న 566 జడ్పీటీసీ, 5,773 ఎంపీటీసీ స్థానాలకు మే నెలలో ఎన్నికలు నిర్వహించేందుకు రాష్ట్ర ఎన్నికల సంఘం కసరత్తు చేస్తోంది. గత ఏడాది జూన్ నుండి ప్రత్యేకాధికారుల పాలనలో ఉన్న స్థానిక సంస్థలకు ఎట్టకేలకు మోక్షం లభించనుంది.
ఓటర్ల జాబితా రూపకల్పన ప్రక్రియ మొదలుపెట్టినట్లు రాష్ట్ర ఎన్నికల సంఘం ప్రకటించింది. 10.07.2025 నుండి 05.02.2026 వరకు కేంద్ర ఎన్నికల సంఘం తయారు చేసిన జాబితా ఆధారంగా అదనపు ఓటర్లను గుర్తించి, గ్రామ పంచాయతీలు, పోలింగ్ కేంద్రాల వారీగా కొత్త జాబితాలను సిద్ధం చేయాలని హైదరాబాద్, మేడ్చల్-మల్కాజిగిరి మినహా మిగిలిన 31 జిల్లాల కలెక్టర్లను ఆదేశించింది. ఈ నెల 23వ తేదీలోపు డేటాలోని వ్యత్యాసాలను నివేదించాలని, ఆ తర్వాత ముసాయిదా, తుది జాబితాలను విడుదల చేస్తామని స్పష్టం చేసింది.
2019లో జరిగిన ఎన్నికలతో పోలిస్తే, ఈసారి స్థానాల సంఖ్యలో స్వల్ప మార్పులు జరిగాయి. పురపాలికలు, నగరపాలికల్లో అనేక గ్రామ పంచాయతీలు విలీనం కావడంతో 44 ఎంపీటీసీలు, 4 జడ్పీటీసీ, 4 ఎంపీపీ స్థానాలు తగ్గాయి. మేడ్చల్-మల్కాజిగిరిని పూర్తి అర్బన్ జిల్లాగా మార్చడంతో, ప్రస్తుతం 31 జిల్లా పరిషత్ల పరిధిలోనే ఈ ఎన్నికలు జరగనున్నాయి.
ఈ ఎన్నికలు కేవలం స్థానిక ప్రతినిధులను ఎన్నుకునే ప్రక్రియ మాత్రమే కాదు, రాష్ట్రంలోని ప్రధాన పార్టీలకు ఇదొక అగ్నిపరీక్ష. రాష్ట్రంలో అధికారంలో ఉన్న కాంగ్రెస్ పార్టీ, తన సంక్షేమ పథకాలు, పాలనపై ప్రజల తీర్పును ఈ ఎన్నికల ద్వారా నిరూపించుకోవాలని చూస్తోంది. స్థానిక సంస్థలపై పట్టు సాధిస్తేనే క్షేత్రస్థాయిలో పార్టీ క్యాడర్ బలోపేతం అవుతుందని భావిస్తోంది. అసెంబ్లీ ఎన్నికల తర్వాత కొంత డీలా పడ్డ బీఆర్ఎస్, తన కంచుకోటలైన గ్రామీణ ప్రాంతాల్లో తిరిగి పట్టు సాధించేందుకు ఈ ఎన్నికలను ఒక అవకాశంగా మలుచుకోవాలని చూస్తోంది. ముఖ్యంగా బీసీ రిజర్వేషన్ల అంశంపై హైకోర్టు తీర్పు తర్వాత ఏర్పడిన పరిస్థితులను తమకు అనుకూలంగా మార్చుకునే వ్యూహంలో ఉంది. పట్టణ ప్రాంతాలకే పరిమితం కాకుండా, గ్రామీణ తెలంగాణలో కూడా పాగా వేయాలని చూస్తున్న బీజేపీకి ఈ ఎంపీటీసీ, జడ్పీటీసీ ఎన్నికలు అత్యంత కీలకం.
2019 మే నెలలో జరిగిన ఎన్నికల తర్వాత ఐదేళ్ల పదవీకాలం ముగిసినా, రిజర్వేషన్ల అంశంపై హైకోర్టులో పిటిషన్లు దాఖలు కావడంతో గతేడాది సెప్టెంబరులో జరగాల్సిన ఎన్నికల ప్రక్రియ నిలిచిపోయింది. తాజాగా హైకోర్టు అనుమతితో, మే నెలలో ఎన్నికల నిర్వహణకు ప్రభుత్వం మొగ్గు చూపుతోంది. దీంతో వేసవి ఎండలతో పాటు తెలంగాణ పల్లెల్లో రాజకీయ సెగలు మొదలయ్యాయి. బ్యాలెట్ బాక్సుల సిద్ధం చేయడం నుండి పార్టీల వ్యూహాల వరకు అంతా “మే” సమరానికి సిద్ధమవుతోంది. క్షేత్రస్థాయిలో ఏ పార్టీ జెండా ఎగురుతుందో చూడాలి!
