కోనసీమలో కూటమి సమన్వయానికి కేంద్రబిందువుగా సానా సతీష్ బాబు

కోనసీమ: ఒకవైపు స్థానిక సంస్థల ఎన్నికలు.. మరోవైపు కూటమి పార్టీల మధ్య సమన్వయం.. ఇంకోవైపు ప్రకృతి విపత్తుతో ఇబ్బందులు ఎదుర్కొంటున్న ప్రజలకు అండగా నిలవాల్సిన బాధ్యత. ఈ మూడు కీలక అంశాలను సమన్వయం చేసుకుంటూ రాజ్యసభ ఎంపీ సానా సతీష్ బాబు గత నెల రోజులుగా కోనసీమలో విస్తృతంగా పర్యటిస్తున్నారు. అమలాపురం ఎన్నికల పరిశీలకుడిగా బాధ్యతలు అప్పగించినప్పటి నుంచి ఆయన పూర్తిస్థాయిలో క్షేత్రస్థాయి కార్యకలాపాలపై దృష్టి సారించారు.

ఉదయం ఆరు గంటల నుంచే ఎన్నికల వ్యవహారాలు, పార్టీ నాయకులతో సమావేశాలు, స్థానిక పరిస్థితుల సమీక్షలతో ఆయన రోజు ప్రారంభమవుతోంది. అమలాపురం నుంచి రామచంద్రపురం, ముమ్మిడివరం నుంచి రాజోలు వరకు కోనసీమలోని వివిధ ప్రాంతాల్లో పర్యటిస్తూ టీడీపీ, జనసేన, బీజేపీ నాయకులతో నిరంతరం సమన్వయం చేసుకుంటున్నారు. స్థానిక నాయకులు, ప్రజాప్రతినిధులతో వరుస సమావేశాలు నిర్వహిస్తూ ఎన్నికల సన్నద్ధత, అభ్యర్థుల ఎంపిక, ప్రచార వ్యూహాలు, క్షేత్రస్థాయి పరిస్థితులపై సమీక్షిస్తున్నారు.

కూటమి ఐక్యత.. సమన్వయమే లక్ష్యం

స్థానిక సంస్థల ఎన్నికల్లో కూటమి భాగస్వామ్య పార్టీల మధ్య ఎలాంటి సమన్వయ లోపాలు తలెత్తకుండా సానా సతీష్ బాబు ప్రత్యేక శ్రద్ధ తీసుకుంటున్నారు. స్థానిక నాయకుల అభిప్రాయాలను తెలుసుకుంటూ, సమస్యలను చర్చల ద్వారా పరిష్కరించుకుంటూ ఉమ్మడి కార్యాచరణకు ప్రాధాన్యత ఇస్తున్నారు. కూటమి భాగస్వాములందరినీ కలుపుకుని ముందుకు వెళ్లడం, క్షేత్రస్థాయిలో నాయకులు, కార్యకర్తల మధ్య సమన్వయాన్ని బలోపేతం చేయడం లక్ష్యంగా పనిచేస్తున్నారు.

కోనసీమలోని అన్ని నియోజకవర్గాల్లో ఎన్నికల సన్నద్ధతను ఎప్పటికప్పుడు సమీక్షిస్తూ, ఎన్డీఏ కూటమి తరఫున సాధ్యమైనంత సమన్వయంతో ముందుకు సాగేందుకు కృషి చేస్తున్నారు. కూటమి 100 శాతం స్ట్రైక్ రేట్ లక్ష్యంగా నాయకులు, కార్యకర్తలతో కలిసి ఎన్నికల కార్యాచరణను ముందుకు తీసుకెళ్తున్నారు.

తుఫాన్ సమయంలోనూ ప్రజల మధ్యే..

ఎన్నికల కార్యక్రమాలతో బిజీగా ఉన్న సమయంలోనే ఆర్నబ్ తుఫాన్ కోనసీమ ప్రాంతాన్ని ప్రభావితం చేసింది. ఈ సమయంలోనూ సానా సతీష్ బాబు ప్రజలకు అందుబాటులో ఉంటూ సహాయక చర్యల్లో చురుగ్గా పాల్గొన్నారు. తెల్లవారుజామునే తుఫాన్ ప్రభావిత ప్రాంతాల్లో పర్యటిస్తూ అల్లవరం, గోపాయిలంక, గోడి, బెండమూరిలంక, ఓడలరేవు, కొమరగిరిపట్నం, నక్కా రామేశ్వరం తదితర గ్రామాల్లో పరిస్థితులను స్వయంగా పరిశీలించారు.

ఓడలరేవు వద్ద తుఫాన్ కారణంగా దెబ్బతిన్న సుమారు 200 బోట్లను పరిశీలించి నష్టపోయిన మత్స్యకారులను పరామర్శించారు. రైతులు, మత్స్యకారులు ఎదుర్కొంటున్న సమస్యలను తెలుసుకుని వారికి అవసరమైన సహాయం అందేలా కృషి చేస్తానని భరోసా ఇచ్చారు. పునరావాస కేంద్రాలను సందర్శించి బాధితులకు అందుతున్న సౌకర్యాలను పరిశీలించారు. విద్యుత్, తాగునీరు, రహదారుల పునరుద్ధరణతో పాటు సహాయక చర్యలను వేగవంతం చేయాలని అధికారులకు సూచించారు. రహదారులపై కూలిన చెట్లను తొలగించే పనుల్లోనూ స్వయంగా పాల్గొన్నారు.

ముఖ్యమంత్రి దృష్టికి క్షేత్రస్థాయి సమస్యలు

తుఫాన్ ప్రభావిత ప్రాంతాల్లో పర్యటించిన అనంతరం బాధిత రైతులు, మత్స్యకారులు ఎదుర్కొంటున్న సమస్యలు, జరిగిన నష్టాన్ని ముఖ్యమంత్రి నారా చంద్రబాబు నాయుడు దృష్టికి తీసుకెళ్లారు. బాధితులకు అవసరమైన సహాయం అందించడంతో పాటు పునరుద్ధరణ చర్యలు వేగవంతం చేయాల్సిన అవసరాన్ని వివరించారు. కోనసీమ పర్యటనకు వచ్చిన ముఖ్యమంత్రికి క్షేత్రస్థాయి పరిస్థితులను తెలియజేస్తూ ప్రజల సమస్యల పరిష్కారానికి తన వంతు కృషి చేశారు.

ఈ సందర్భంగా సానా సతీష్ బాబు నిర్వహిస్తున్న క్షేత్రస్థాయి పర్యటనలు, కూటమి సమన్వయ బాధ్యతలు, తుఫాన్ సమయంలో సహాయక చర్యల్లో ఆయన భాగస్వామ్యాన్ని ముఖ్యమంత్రి చంద్రబాబు నాయుడు ప్రశంసించారు.

ఎన్నికల బాధ్యతలతో పాటు ప్రజా సమస్యల పరిష్కారానికీ ప్రాధాన్యత ఇస్తూ.. కోనసీమలో నిరంతరం పర్యటిస్తూ స్థానిక నాయకులతో సమన్వయం చేసుకోవడం, ప్రజలకు అందుబాటులో ఉండటం, విపత్తుల సమయంలో బాధితులకు అండగా నిలవడం ద్వారా సానా సతీష్ బాబు తనకు అప్పగించిన బాధ్యతలను క్షేత్రస్థాయిలో నిర్వహిస్తున్నారు. రాబోయే రోజుల్లోనూ కూటమి సమన్వయం, ఎన్నికల సన్నద్ధత, కోనసీమ అభివృద్ధి, ప్రజా సమస్యల పరిష్కారమే లక్ష్యంగా తన కార్యాచరణను కొనసాగించనున్నారు.