వీసా పొడిగింపు మరింత కష్టం..అమెరికా మరిన్ని కఠిన ఆంక్షలు..!

అమెరికాలో పనిచేస్తున్న విదేశీ సంతతికి చెందిన నిపుణులకు మరో షాకిచ్చింది ట్రంప్ ప్రభుత్వం..హెచ్‌-1బీ, ఎల్‌-1 వంటి నాన్-ఇమ్మిగ్రెంట్ వీసాల పొడిగింపు ప్రక్రియను కఠినతరం చేసేలా కొత్త నిబంధనలను రూపొందించింది. ఈ వీసాలతో ఎక్కువశాతం మంది భారతీయులు అమెరికాలో పనిచేస్తుండడంతో.. ఇప్పుడీ బిల్లు వారికి ఇబ్బందికరంగా మారనుంది.ముఖ్యంగా భారతీయ టెకీలు తీవ్ర ఇబ్బందులు ఎదుర్కొనే అవకాశం ఉందని ఆందోళన వ్యక్తమవుతోంది.

ప్రస్తుతం అమెరికాలో ‘డిఫరెన్స్ టు ప్రయర్ డిటర్మినేషన్స్’ అనే విధానం అమల్లో ఉంది. దీని ప్రకారం ఒక ఉద్యోగికి గతంలో వీసా మంజూరై, అవే పరిస్థితుల్లో (అదే కంపెనీ, అదే ఉద్యోగం) పొడిగింపు కోసం దరఖాస్తు చేసుకుంటే, ఇమ్మిగ్రేషన్ అధికారులు సాధారణంగా ఆమోదం తెలుపుతారు.

అయితే, ఈ విధానాన్ని పూర్తిగా రద్దు చేయాలని అమెరికా హోంలాండ్ సెక్యూరిటీ విభాగం (డీహెచ్ఎస్‌) ప్రతిపాదించింది. ఈ కొత్త రూల్ అమల్లోకి వస్తే, ప్రతి వీసా పొడిగింపు దరఖాస్తును ఒక కొత్త పిటిషన్‌గా పరిగణించి, మొదటి నుంచి పూర్తిస్థాయిలో పరిశీలిస్తారు.

యూఎస్ సిటిజన్‌షిప్ అండ్ ఇమ్మిగ్రేషన్ సర్వీసెస్ (యూఎస్‌సీఐఎస్‌) గణాంకాల ప్రకారం.. 2024 ఆర్థిక సంవత్సరంలో వీసా పొడిగింపు పొందిన హెచ్‌-1బీ లబ్ధిదారులలో 79 శాతం మంది భారతీయులే ఉన్నారు. ఈ నేపథ్యంలో కొత్త నిబంధనల ప్రభావం అత్యధికంగా వారిపైనే పడనుంది. ఈ మార్పు వల్ల ఏటా దాదాపు 2,08,000 పిటిషన్లపై ప్రభావం పడుతుందని, అదనంగా 6,000 దరఖాస్తులకు ‘రిక్వెస్ట్ ఫర్ ఎవిడెన్స్’ (ఆర్ఎఫ్ఈ) జారీ కావొచ్చని డీహెచ్ఎస్‌ అంచనా వేసింది. దీనివల్ల వీసా ప్రాసెసింగ్ సమయం సగటున 64 రోజులు ఆలస్యం అవుతుంది.

హెచ్‌-1బీ వీసాల విషయంలో మోసాలు, నిబంధనల ఉల్లంఘనలు పెరిగాయని, వాటిని అరికట్టేందుకే ఈ మార్పులు తెస్తున్నామని డీహెచ్ఎస్‌ వాదిస్తోంది. పాత విధానం వల్ల దరఖాస్తుదారుడికి బదులుగా, తిరస్కరించడానికి గల కారణాలను నిరూపించుకోవాల్సిన భారం ఇమ్మిగ్రేషన్ అధికారిపై పడుతోందని పేర్కొంది. అయితే, ఈ మార్పు వల్ల ఉద్యోగులు, కంపెనీలు తమ భవిష్యత్ ప్రణాళికల విషయంలో అనిశ్చితికి గురవుతారని కూడా అంగీకరించింది.

ప్రతిపాదనపై ప్రజాభిప్రాయ సేకరణకు నవంబర్ 13 వరకు గడువు విధించారు. ప్రజలు తమ అభిప్రాయాలను regulations.gov వెబ్‌సైట్ ద్వారా తెలియజేయవచ్చు. తుది నిబంధన అమల్లోకి వచ్చేవరకు ప్రస్తుత విధానమే కొనసాగుతుంది. ఈ ‘డిఫరెన్స్’ పాలసీని గతంలో 2017లో ట్రంప్ ప్రభుత్వం రద్దు చేయగా, 2021లో బైడెన్ ప్రభుత్వం తిరిగి ప్రవేశపెట్టింది. ఇప్పుడు మళ్లీ దానిని రద్దు చేసేందుకు రంగం సిద్ధమవుతోంది.