ఎన్టీఆర్ భరోసా పింఛన్లపై సర్కార్ గుడ్ న్యూస్..!
- Published By: Tech Team
- September 16, 2026 / 12:04 PM IST
ఆంధ్రప్రదేశ్ రాష్ట్రంలోని పింఛన్ దారులకు కూటమి ప్రభుత్వం కీలకమైన ఊరటనిచ్చింది. రాష్ట్రంలో అర్హులైన ప్రతి ఒక్కరికీ అవకాశం కల్పించాలనే ఉద్దేశంతో ‘ఎన్టీఆర్ భరోసా పింఛన్ల’(NTR Bharosa Pension) దరఖాస్తుల గడువును సెప్టెంబర్ 18 వరకు పొడిగిస్తూ ప్రభుత్వం నిర్ణయం తీసుకుంది. ఈ విషయాన్ని రాష్ట్ర పురపాలక, పట్టణాభివృద్ధి శాఖ మంత్రి కొండపల్లి శ్రీనివాస్ అధికారికంగా వెల్లడించారు. సాంకేతిక కారణాలు, ఇతర ఇబ్బందుల వల్ల ఇప్పటివరకు దరఖాస్తు చేసుకోలేకపోయిన వారికి ఈ గడువు పొడిగింపు ఒక మంచి అవకాశమని ఆయన పేర్కొన్నారు.
నిజానికి గతంలో ప్రకటించిన షెడ్యూల్ ప్రకారం పింఛన్ల దరఖాస్తులకు సెప్టెంబర్ 7 నుంచి సెప్టెంబర్ 16 వరకే గడువు ఉంది. అయితే క్షేత్రస్థాయిలో ఇంకా చాలా మంది అర్హులు దరఖాస్తు చేసుకోలేకపోయారనే విజ్ఞప్తుల నేపథ్యంలో.. ప్రభుత్వం ఈ గడువును మరో రెండు రోజుల పాటు అంటే సెప్టెంబర్ 18వ తేదీ వరకు పొడిగించింది. రాష్ట్రంలోని వృద్ధులు, వితంతువులు, దివ్యాంగులు, ఒంటరి మహిళలతో పాటు అర్హత కలిగిన ప్రతి ఒక్కరూ ఈ పొడిగించిన గడువు లోపు తమ దరఖాస్తులను సమర్పించాలని మంత్రి కోరారు.
ఈ దరఖాస్తుల స్వీకరణ ప్రక్రియను మరింత సులభతరం చేసేందుకు ప్రభుత్వం పటిష్టమైన ఏర్పాట్లు చేసింది. ప్రతి గ్రామంలోని ‘స్వర్ణ గ్రామం’ కేంద్రాలు, పట్టణాల్లోని ‘స్వర్ణ వార్డు’ కేంద్రాల్లో దరఖాస్తులను స్వీకరిస్తున్నారు. దరఖాస్తుతో పాటు లబ్ధిదారుల ఈ-కేవైసీ (e-KYC) నమోదుకు కూడా అక్కడే పూర్తి సౌకర్యాలు కల్పించారు. ఆన్లైన్లో దరఖాస్తు విజయవంతంగా నమోదైన వెంటనే లబ్ధిదారులకు ఒక అక్నాలెడ్జ్మెంట్ పత్రాన్ని కూడా అందజేస్తారు. ప్రస్తుతం రాష్ట్రవ్యాప్తంగా ఎన్టీఆర్ భరోసా పథకం ద్వారా 62 లక్షల మందికి పింఛన్లు అందుతుండగా, అర్హత ఉండి పింఛన్ రాని వారు ఈ అవకాశాన్ని సద్వినియోగం చేసుకోవాలని అధికారులు విజ్ఞప్తి చేశారు.
