White House: నాటో నుంచి స్పెయిన్ ను గెంటేయాలి.. ట్రంప్ సంచలన వ్యాఖ్యలు..!

నాటో (NATO) సంస్కరణలపై ప్రధానంగా ఫోకస్ పెట్టారు అమెరికా అధ్యక్షుడు ట్రంప్ (Trump). రష్యా రక్షణరంగానికి కేటాయింపులు పెరుగుతుండడంతో… దానికి తగినట్లుగా నాటో సైతం రక్షణ వ్యయాన్ని పెంచాల్సి ఉందని ఇప్పటికే పలుమార్లు ట్రంప్ స్పష్టం చేశారు. లేదంటే నాటో సభ్యదేశాల భద్రతకు తాము భరోసా ఇవ్వలేమన్నారు ట్రంప్. ఈ పరిణామాలు.. అప్పట్లోనే నాటోలో తీవ్ర చర్చనీయాంశమయ్యాయి. అయితే ఇప్పుడు అదే స్వరాన్ని వినిపించారు. రక్షణరంగ వ్యయాన్ని పెంచడంలో వెనకబడి ఉన్న స్పెయిన్ (Spain) పై ట్రంప్ తీవ్ర ఆగ్రహం వ్యక్తం చేశారు. ఆదేశాన్ని నాటో నుంచి అర్జంటుగా గెంటేయాలన్నారు.

రక్షణ వ్యయాన్ని పెంచడానికి నిరాకరిస్తున్న స్పెయిన్‌ను నాటో నుంచి బహిష్కరించాల్సి రావొచ్చని అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. రక్షణ రంగానికి అవసరమైన నిధులు కేటాయించడంలో స్పెయిన్ వెనుకబడిందని ఆయన విమర్శించారు.ఫిన్లాండ్ అధ్యక్షుడు అలెగ్జాండర్ స్టబ్‌తో వైట్‌హౌస్‌లో జరిగిన సమావేశం అనంతరం ట్రంప్ విలేకరులతో మాట్లాడారు. ఈ సందర్భంగా ఆయన మాట్లాడుతూ, “ఖర్చు పెంచకపోవడానికి వారికి ఎలాంటి సాకూ లేదు. కూటమిలో ఒక్క దేశం వెనుకబడింది, అదే స్పెయిన్. నిజం చెప్పాలంటే, బహుశా మీరు వాళ్లను నాటో నుంచి బయటకు పంపేయాలేమో. మీరంతా స్పెయిన్‌తో మాట్లాడటం మొదలుపెట్టాలి. ఎందుకు వెనుకబడ్డారో వాళ్లను అడిగి తెలుసుకోవాలి” అని అన్నారు.

డొనాల్డ్ ట్రంప్ ఒత్తిడి మేరకు, నాటోలోని 32 సభ్య దేశాలు తమ స్థూల జాతీయోత్పత్తిలో 5 శాతాన్ని 2035 నాటికి రక్షణ రంగానికి కేటాయించాలని జూన్‌లో అంగీకారానికి వచ్చాయి. అయితే, ఈ లక్ష్యాన్ని స్పెయిన్ ప్రధానమంత్రి పెడ్రో సాంచెజ్ తీవ్రంగా వ్యతిరేకించారు. “ఈ లక్ష్యం మా సంక్షేమ రాజ్యానికి, మా ప్రపంచం దృష్టికి సరిపడనిది” అని ఆయన స్పష్టం చేశారు. నాటో దేశాల్లో రక్షణ రంగానికి తక్కువగా ఖర్చు చేస్తున్న దేశాల్లో స్పెయిన్ ఒకటిగా ఉంది.

గతంలో కూడా ఈ విషయంపై ట్రంప్ స్పందిస్తూ, 5 శాతం లక్ష్యాన్ని వ్యతిరేకిస్తే స్పెయిన్‌పై వాణిజ్యపరమైన ఆంక్షలు విధించాల్సి వస్తుందని హెచ్చరించారు. ఇప్పుడు ఏకంగా నాటో కూటమి నుంచే బహిష్కరించాలంటూ ఆయన చేసిన వ్యాఖ్యలు అంతర్జాతీయంగా చర్చనీయాంశమయ్యాయి.