Janasena: అధినేత మాటకే పరిమితమైన స్పందనలు.. జనసేనలో ఎందుకు ఈ నిశ్శబ్దం?

జనసేన పార్టీ (Jana Sena Party) ప్రస్తుతం పూర్తిగా యాక్టివ్‌గా ఉందా? లేక అంతర్గతంగా కొంత స్థబ్ధతకు లోనైందా? అనే ప్రశ్న రాజకీయ వర్గాల్లో చర్చనీయాంశంగా మారింది. ఇటీవల జరుగుతున్న రాజకీయ పరిణామాలపై పార్టీ నాయకులు పెద్దగా స్పందించకపోవడం ఈ సందేహాలకు కారణమవుతోంది. అధినేత పవన్ కళ్యాణ్ (Pawan Kalyan) స్వయంగా ముందుకు వచ్చి మాట్లాడితే తప్ప, ఇతర నేతలు స్పందించని పరిస్థితి కనిపిస్తోందన్న అభిప్రాయం వినిపిస్తోంది.

ఇది కొత్త విషయం కాదు. గత కొంతకాలంగా జనసేనలో అసంతృప్తి పెరుగుతోందన్న వాదనలు ఉన్నాయి. పార్టీ నాయకులు ఒకే దిశలో కాకుండా, ఎవరి పరిధిలో వారు వ్యవహరిస్తున్నారన్న విమర్శలు కూడా వినిపిస్తున్నాయి. ఈ నేపథ్యంలో పార్టీ కీలక నేత బొలిశెట్టి సత్యనారాయణ (Bolisetty Satyanarayana) చేసిన వ్యాఖ్యలు ప్రాధాన్యం సంతరించుకున్నాయి. ఆయన పార్టీ నాయకుల మధ్య సరైన సమన్వయం లేదని, పార్టీని ముందుకు తీసుకెళ్లే విషయంలో అందరూ ఆశించిన స్థాయిలో సహకరించడం లేదని బహిరంగంగానే చెప్పారు.

నామినేటెడ్ పదవులు, ప్రభుత్వ పరంగా తగిన గుర్తింపు లభించడం లేదన్న భావన కూడా నాయకుల్లో ఉందని బొలిశెట్టి వ్యాఖ్యానించారు. ఇదే అసంతృప్తికి ప్రధాన కారణంగా మారిందన్న అభిప్రాయం వ్యక్తమైంది. ఈ పరిస్థితిని సరిచేయాలంటే పార్టీ స్థాయిలో స్పష్టమైన కార్యాచరణ అవసరమని ఆయన సూచించారు. అయితే, ఈ మార్పులు తక్షణమే సాధ్యమవుతాయా? అనే ప్రశ్న మాత్రం ఇంకా సమాధానం లేని దిగా ఉంది.

ఇదిలా ఉండగా, ఇటీవల పవన్ కళ్యాణ్ కూడా పార్టీ నాయకులు, మంత్రుల పనితీరుపై అసహనం వ్యక్తం చేసినట్లు సమాచారం. జరుగుతున్న పరిణామాలపై ఎందుకు స్పందించట్లేదని ఆయన ప్రశ్నించినట్టు తెలుస్తోంది. అన్నీ తానే చూసుకోవాల్సి వస్తే అది సాధ్యమా? అని కూడా ఆవేదన వ్యక్తం చేసినట్లు చెబుతున్నారు. అయితే, జనసేనలో నాయకులు అధినేత ఆదేశాల మేరకే స్పందించడం మొదటి నుంచీ కొనసాగుతున్న సంప్రదాయంగా మారింది.

గతంలో పార్టీ అనుమతి లేకుండా కొందరు నాయకులు స్పందించిన సందర్భాల్లో వివాదాలు తలెత్తిన అనుభవం ఉండటంతో, ఇప్పుడు ఎవరూ తొందరపడి వ్యాఖ్యలు చేయడం లేదని అంటున్నారు. అందుకే పార్టీ అధికారిక ప్రకటన వచ్చినప్పుడే స్పందించాలన్న నిర్ణయానికి నేతలు కట్టుబడి ఉన్నారని సమాచారం.

ఇంకో వైపు క్షేత్రస్థాయిలో కూటమి పార్టీల మధ్య సమన్వయం కూడా అంతంత మాత్రంగానే ఉందన్న అభిప్రాయం ఉంది. స్థానిక రాజకీయాల్లో స్పష్టత లేకపోవడం వల్ల నాయకులు పూర్తిస్థాయిలో యాక్టివ్ కావడం లేదని పరిశీలకులు చెబుతున్నారు. ముందుగా ఈ అంతర్గత సమన్వయ సమస్యలను పరిష్కరిస్తేనే జనసేనలో కొత్త చైతన్యం కనిపిస్తుందని, అప్పుడు మాత్రమే పార్టీ నాయకులు బహిరంగంగా ముందుకు వస్తారని రాజకీయ విశ్లేషకుల అభిప్రాయం.