Trisha: త్రిషకు సారీ చెప్పిన నైనార్ నాగేంద్రన్..! వివాదం ముగిసినట్లేనా?

నటి త్రిష, తమిళనాడు బీజేపీ రాష్ట్ర అధ్యక్షుడు నైనార్ నాగేంద్రన్ మధ్య చోటుచేసుకున్న వివాదం ప్రస్తుతం దక్షిణాది సినీ, రాజకీయ వర్గాల్లో పెను దుమారం రేపుతోంది. ఒక నటిగా తన వృత్తిని గౌరవించాలని, తన వ్యక్తిగత జీవితాన్ని రాజకీయ ప్రయోజనాల కోసం వాడుకోవద్దని త్రిష గట్టిగా కౌంటర్ ఇచ్చింది. దీంతో నైనార్ నాగేంద్రన్ దిగివచ్చారు. త్రిషకు క్షమాపణ చెప్పారు.

తమిళనాడులో అసెంబ్లీ ఎన్నికలు సమీపిస్తున్న తరుణంలో రాజకీయ వాతావరణం వేడెక్కింది. ఇటీవల నటుడు విజయ్ స్థాపించిన ‘తమిళగ వెట్రి కళగం’ (TVK) పార్టీపై విమర్శలు చేస్తూ, బీజేపీ రాష్ట్ర అధ్యక్షుడు నైనార్ నాగేంద్రన్ హద్దులు దాటిన వ్యాఖ్యలు చేశారు. విజయ్‌కు రాజకీయ అనుభవం లేదని ఎద్దేవా చేసే క్రమంలో, “విజయ్ ముందుగా త్రిష ఇంటి నుండి బయటకు రావాలి, అప్పుడే అతనికి గ్రౌండ్ రియాలిటీ తెలుస్తుంది” అని వివాదాస్పద వ్యాఖ్యలు చేశారు. ఒక రాజకీయ నాయకుడిని విమర్శించే క్రమంలో, సంబంధం లేని ఒక నటి వ్యక్తిగత జీవితాన్ని ప్రస్తావించడం తీవ్ర అభ్యంతరాలకు దారితీసింది.

ఈ వ్యాఖ్యలపై త్రిష సోషల్ మీడియా వేదికగా తీవ్రంగా స్పందించారు. “అగౌరవాన్ని ఎప్పుడూ ప్రశ్నించాలి.. ఖండించాలి” అంటూ ఆమె తన నిరసనను వ్యక్తం చేశారు. కేవలం సోషల్ మీడియాకే పరిమితం కాకుండా, తన న్యాయవాది నిత్యేష్ నటరాజ్ ద్వారా ఒక అధికారిక ప్రకటనను విడుదల చేశారు. తనకు ఏ రాజకీయ పార్టీతోనూ సంబంధం లేదని, భవిష్యత్తులో కూడా రాజకీయాల్లోకి రావాలనే ఆలోచన లేదని త్రిష స్పష్టం చేశారు. రాజకీయ అంశాల్లో తాను ఎప్పుడూ తటస్థ వైఖరినే పాటిస్తానని తెలిపారు. తనను కేవలం తన నటన, వృత్తిపరమైన విజయాలతోనే గుర్తించాలని, అనవసరంగా రాజకీయ వివాదాల్లోకి లాగవద్దని కోరారు. రాష్ట్ర రాజకీయాల్లో ఉన్నత స్థాయిలో ఉన్న వ్యక్తులు ప్రజాప్రతినిధులుగా సంయమనంతో, బాధ్యతగా వ్యవహరించాలని హితవు పలికారు. వ్యక్తిగత జీవితాలను బహిరంగ చర్చకు పెట్టడం దిగజారుడు తనమని మండిపడ్డారు. తన ప్రతిష్టకు భంగం కలిగించేలా ప్రవర్తిస్తే చట్టపరమైన చర్యలు తీసుకోవడానికి వెనుకాడబోనని హెచ్చరించారు.

త్రిష స్పందనతో పాటు, అటు డీఎంకే, ఇటు విజయ్ పార్టీ నేతలు కూడా నాగేంద్రన్ వ్యాఖ్యలను తీవ్రంగా ఖండించారు. మహిళల పట్ల ఇలాంటి వ్యాఖ్యలు చేయడం బీజేపీ సంస్కృతికి నిదర్శనమని ప్రత్యర్థి పార్టీలు విమర్శించాయి. పరిస్థితి తీవ్రతను గమనించిన బీజేపీ అధిష్టానం కూడా దీనిపై జోక్యం చేసుకున్నట్లు సమాచారం. మహిళా విభాగం నేత వానతి శ్రీనివాసన్, ఇతర సీనియర్ నేతల సూచనల మేరకు నైనార్ నాగేంద్రన్ దిగివచ్చారు. తన వ్యాఖ్యలు పొరపాటున చేసినవని, ఎవరి మనసునైనా నొప్పించి ఉంటే క్షమాపణలు కోరుతున్నానని ఆయన ప్రకటించారు. తన రాజకీయ జీవితంలో ఎప్పుడూ వ్యక్తిగత విమర్శలు చేయలేదని, ఈసారి అలా జరగడంపై విచారం వ్యక్తం చేశారు.

ఈ వివాదం మళ్ళీ ఒకసారి సినీ తారల వ్యక్తిగత జీవితాలపై రాజకీయ నేతలు చేస్తున్న ‘క్యారెక్టర్ అస్సాసినేషన్’ ధోరణిని బయటపెట్టింది. గతంలో కూడా మన్సూర్ అలీ ఖాన్, ఏవీ రాజు వంటి వారు త్రిషపై ఇలాంటి అనుచిత వ్యాఖ్యలు చేసినప్పుడు ఆమె గట్టిగానే పోరాడారు.

నటి త్రిష తీసుకున్న ఈ నిర్ణయం సినీ పరిశ్రమలోని మహిళలకు ఒక భరోసాను ఇస్తుంది. రాజకీయ అవసరాల కోసం మహిళా సెలబ్రిటీల పేరును వాడుకోవడం, వారి వ్యక్తిగత జీవితాలను కించపరచడం వంటి పద్ధతులకు స్వస్తి పలకాలని ఈ ఉదంతం హెచ్చరిస్తోంది. నైనార్ నాగేంద్రన్ క్షమాపణ చెప్పడంతో ప్రస్తుతానికి ఈ వివాదం సద్దుమణిగినట్లు కనిపిస్తున్నా, ప్రజాక్షేత్రంలో ఉన్నవారు మహిళల పట్ల ఎంత గౌరవంగా ఉండాలో ఇది మరోసారి గుర్తుచేసింది.