TVK: టీవీకే మరో పీఆర్పీ అవుతోందా..? తమిళ రాజకీయాల్లో ఆసక్తికర చర్చ..!

తమిళనాడు రాజకీయాల్లో నటుడు విజయ్ స్థాపించిన తమిళగ వెట్రి కళగం (TVK) రాకతో 2026 అసెంబ్లీ ఎన్నికల సమీకరణాలు ఆసక్తికరంగా మారాయి. ముఖ్యంగా విజయ్ ఒంటరిగా పోటీ చేస్తామని ప్రకటించడంతో, ఇది గతంలో ఉమ్మడి ఆంధ్రప్రదేశ్‌లో చిరంజీవి స్థాపించిన ప్రజారాజ్యం పార్టీ మాదిరిగా ఓట్లను చీలుస్తుందా అనే చర్చ మొదలైంది. తమిళనాడు రాజకీయ యవనికపై ‘దళపతి’ విజయ్ ఎంట్రీ ఒక సంచలనంగానే చెప్పుకోవచ్చు. 2026 ఎన్నికల్లో ఏ కూటమితోనూ పొత్తు లేకుండా స్వతంత్రంగా బరిలోకి దిగుతామని ఆయన ప్రకటించారు. ఈ నిర్ణయం 2009 ఆంధ్రప్రదేశ్ ఎన్నికల్లో ప్రజారాజ్యం పార్టీ పోషించిన పాత్రను గుర్తు చేస్తోంది.

అప్పట్లో ప్రభుత్వ వ్యతిరేక ఓటును పీఆర్పీ భారీగా చీల్చింది. దీనివల్ల ప్రధాన ప్రతిపక్షమైన తెలుగుదేశం పార్టీ (TDP)కి పడాల్సిన ఓట్లు చీలిపోయి, అంతిమంగా కాంగ్రెస్ పార్టీ అతి తక్కువ మెజారిటీతో మళ్ళీ అధికారంలోకి రావడానికి మార్గం సుగమమైంది. చిరంజీవి 18 సీట్లు మాత్రమే గెలవగలిగారు, కానీ కింగ్ మేకర్ కాలేకపోయారు. విజయ్ తన పార్టీని ఒక బలమైన శక్తిగా నిలబెట్టాలని చూస్తున్నారు. అయితే ఒంటరి పోరు వల్ల కొన్ని సవాళ్లు ఎదురయ్యే అవకాశం ఉంది. రాజకీయ విశ్లేషకుల అభిప్రాయం ప్రకారం, విజయ్ ప్రధానంగా యువత, కొత్త ఓటర్లను ఆకర్షిస్తున్నారు.

పీఆర్పీ విఫలం కావడానికి ప్రధాన కారణం బలమైన సంస్థాగత నిర్మాణం లేకపోవడం. విజయ్ ఇప్పటికే క్షేత్రస్థాయిలో విజయ్ మక్కల్ ఇయక్కం ద్వారా బలమైన నెట్‌వర్క్‌ ఏర్పాటు చేసుకున్నారు. ఆయన తన పార్టీకి అంబేద్కరిజం, పెరియరిజం, కామరాజ్ సిద్ధాంతాలను ప్రకటించి తన భావజాలాన్ని స్పష్టం చేశారు. ఒంటరిగా పోటీ చేస్తే ఓట్ల చీలక ఖాయం. అయితే అది ప్రజారాజ్యంలా కేవలం ఓట్లను చీలుస్తుందా.. లేదా డీఎంకే, ఏఐఏడీఎంకేలకు ప్రత్యామ్నాయంగా ఎదుగుతుందా అనేది ఆయన ప్రచార సరళి, ఎన్నికల నాటికి కుదిరే సమీకరణాలపై ఆధారపడి ఉంటుంది.