US Military: ఇరాన్తో యుద్ధం వేళ అమెరికా ఆర్మీ చీఫ్ రాజీనామా..
- Published By: Vishal
- April 3, 2026 / 10:30 AM IST
US Military: అమెరికా రక్షణ శాఖలో పెను మార్పులు చోటుచేసుకుంటున్నాయి. ఇరాన్తో ఉద్రిక్తతలు కొనసాగుతున్న ప్రస్తుత తరుణంలో, అమెరికా సైన్యాధిపతి (Army Chief) జనరల్ ర్యాండీ జార్జ్పై వేటు పడింది. రక్షణ మంత్రి పీట్ హెగ్సెత్ ఆదేశాల మేరకు ఆయన తన పదవి నుంచి తక్షణమే తప్పుకున్నారు. ఈ పరిణామాన్ని పెంటగాన్ వర్గాలు కూడా అధికారికంగా ధ్రువీకరించాయి.
ఇవి కూడా చదవండి
రక్షణ విభాగాన్ని సమూలంగా ప్రక్షాళన చేయాలనే లక్ష్యంతో హెగ్సెత్ వేగంగా పావులు కదుపుతున్నారు. ఇందులో భాగంగా ఇప్పటివరకు దాదాపు డజను మందికి పైగా కీలక జనరల్స్, అడ్మిరల్స్ను పదవుల నుంచి తొలగించారు. గతేడాది జాయింట్ చీఫ్స్ ఆఫ్ స్టాఫ్ ఛైర్మన్ జనరల్ చార్లెస్ సీక్యూ బ్రౌన్ను తొలగించిన క్రమంలోనే తాజాగా ర్యాండీ జార్జ్ ఉద్వాసన కూడా చర్చనీయాంశంగా మారింది.
ర్యాండీ జార్జ్ వివరణ:
వెస్ట్పాయింట్ మిలిటరీ అకాడమీ గ్రాడ్యుయేట్ అయిన ర్యాండీ జార్జ్, గల్ఫ్ యుద్ధంతో పాటు ఇరాక్, అఫ్గానిస్థాన్లలో కీలక బాధ్యతలు నిర్వర్తించారు. గతంలో రక్షణ మంత్రి లాయిడ్ ఆస్టిన్కు సహాయకుడిగా కూడా పనిచేశారు. ఆయన హఠాత్తుగా వైదొలిగిన నేపథ్యంలో, అమెరికా సైన్యం ఆయన సేవలను కొనియాడుతూ కృతజ్ఞతలు తెలిపింది.
సైనికులకు ఆయుధాల అనుమతి:
మరోవైపు, అమెరికా దళాల వ్యక్తిగత భద్రత దృష్ట్యా రక్షణ మంత్రి హెగ్సెత్ మరో సంచలన నిర్ణయం తీసుకున్నారు. దేశవ్యాప్తంగా ఉన్న సైనిక స్థావరాల్లోకి సైనికులు తమ వ్యక్తిగత ఆయుధాలను తీసుకెళ్లేందుకు అనుమతినిచ్చారు. దళాల రక్షణను పటిష్టం చేయడమే ఈ నిర్ణయం వెనుక ఉన్న ప్రధాన ఉద్దేశమని ఆయన పేర్కొన్నారు. హర్మూజ్ జలసంధిపై కూడా అమెరికా ప్రత్యేక దృష్టి సారించినట్లు తెలుస్తోంది.
ఇవి కూడా చదవండి
