Keir Starmer: ట్రంప్ బెదిరింపులకు ‘డోంట్ కేర్’.. ఇరాన్ యుద్ధంలోకి నో ఎంట్రీ!

పశ్చిమాసియాలో (Middle East) రగులుతున్న యుద్ధ జ్వాలల సెగలు ప్రపంచ దేశాలకు పాకుతున్న వేళ.. బ్రిటన్ ప్రధానమంత్రి కీర్ స్టార్మర్ (Keir Starmer) సంచలన నిర్ణయం తీసుకున్నారు. ప్రపంచ వాణిజ్యానికి అత్యంత కీలకమైన హోర్ముజ్ జలసంధి (Strait of Hormuz) మూసివేతపై ఆయన తీవ్ర ఆందోళన వ్యక్తం చేస్తూనే, అమెరికా ఒత్తిళ్లకు తలొగ్గేది లేదని స్పష్టం చేశారు. హోర్ముజ్‌ను తిరిగి తెరిపించేందుకు త్వరలోనే ఒక భారీ ప్రపంచ స్థాయి దౌత్య సదస్సును (Global Summit) నిర్వహిస్తామని ఆయన ప్రకటించారు.

ట్రంప్‌కు స్టార్మర్ కౌంటర్
హోర్ముజ్ జలసంధిపై సైనిక చర్యల విషయంలో తమతో కలిసిరాకపోతే, భవిష్యత్తులో బ్రిటన్‌కు అమెరికా ఎలాంటి సహాయం చేయబోదని యూఎస్ ప్రెసిడెంట్ డొనాల్డ్ ట్రంప్ (Donald Trump) చేసిన తీవ్ర హెచ్చరికలపై స్టార్మర్ (Keir Starmer) ఘాటుగా స్పందించారు. “ఇది మా యుద్ధం కాదు. మేం ఎట్టి పరిస్థితుల్లోనూ ఇరాన్‌తో ప్రత్యక్ష యుద్ధంలోకి దిగబోము. మాపై ఎవరు ఎంతటి ఒత్తిడి తీసుకొచ్చినా సరే.. ఒక దేశ ప్రధానిగా బ్రిటన్ ప్రయోజనాల కోసమే నేను ఆలోచిస్తాను” అని ట్రంప్ బెదిరింపులను ఆయన సున్నితంగా తిప్పికొట్టారు. దౌత్యపరంగా అందుబాటులో ఉన్న ప్రతి శాంతియుత మార్గాన్ని పరిశీలిస్తామే తప్ప, విధ్వంసకర యుద్ధం తమ విధానం కాదని ఆయన కుండబద్దలు కొట్టారు.