రాజశేఖర్ మామిడన్న ‘డియర్ జిమ్ క్యారీ’ అమెరికా టూర్ షెడ్యూల్ ఖరారు

ప్రముఖ స్టాండప్ కమెడియన్ రాజశేఖర్ మామిడన్న (RSM) తన సరికొత్త షో డియర్ జిమ్ క్యారీతో అమెరికా ప్రేక్షకులను పలకరించేందుకు సిద్ధమయ్యారు. స్టేజ్ అడ్డా ఆధ్వర్యంలో నిర్వహిస్తున్న ఈ భారీ యూఎస్ టూర్ 2026 ఏప్రిల్, మే నెలల్లో జరగనుంది.

ఏప్రిల్ 3వ తేదీన చికాగోలో ప్రారంభమయ్యే ఈ పర్యటనలో భాగంగా చికాగో, న్యూజెర్సీ, బోస్టన్, అట్లాంటా, హ్యూస్టన్, డల్లాస్, లాస్ ఏంజిల్స్, బే ఏరియా వంటి మొత్తం 17 ప్రధాన నగరాల్లో రాజశేఖర్ తనదైన శైలి కామెడీతో అలరించనున్నారు.

ఇప్పటికే ఈ షోలకు సంబంధించిన టిక్కెట్ల విక్రయం StageAdda.com లో ప్రారంభం కావడంతో ప్రవాస భారతీయులు ఈ కామెడీ ఫీస్ట్ కోసం ఆసక్తిగా ఎదురుచూస్తున్నారు.

తెలుగు స్టాండప్ కామెడీ సెన్సేషన్..
రాజశేఖర్ మామిడన్న తెలుగు స్టాండప్ కామెడీ ప్రపంచంలో ఒక విశిష్టమైన గుర్తింపు పొందిన కళాకారుడు. హైదరాబాద్‌కు చెందిన రాజశేఖర్ వృత్తిరీత్యా కంప్యూటర్ సైన్స్ ఇంజినీర్ అయినప్పటికీ, తనలోని హాస్య చతురతను గుర్తించి కళాకారుడిగా ప్రయాణాన్ని ప్రారంభించారు. ప్రస్తుతం తెలుగులో స్టాండప్ కామెడీని ఒక గౌరవప్రదమైన స్థానానికి తీసుకెళ్లడంలో ఆయన పాత్ర ఎంతో కీలకమైనది.

చిన్న సంఘటనలకు హాస్యాన్ని జోడించి..
రాజశేఖర్ కామెడీలో ప్రధాన బలం ఆయన పరిశీలన శక్తి. ప్రతిరోజూ మన ఇళ్లలో జరిగే చిన్న చిన్న సంఘటనలు, సాఫ్ట్‌వేర్ ఉద్యోగుల కష్టాలు, మధ్యతరగతి కుటుంబాల మనస్తత్వాలను ఎంతో సహజంగా, వ్యంగ్యంగా చెప్పడం ఆయన శైలి. ఎక్కడా అసభ్యతకు తావులేకుండా కుటుంబం అంతా కలిసి చూసేలా ఆయన ప్రదర్శనలు ఉంటాయి. “మహాభారతం – ఒక కామెడీ పర్స్పెక్టివ్” వంటి షోలు ఆయనకు భారీ ప్రజాదరణను తెచ్చిపెట్టాయి.

సమాజ అంశాలను..
అంతర్జాతీయ వేదికలపై కూడా తన ప్రతిభను చాటిన రాజశేఖర్, అమెజాన్ ప్రైమ్ వీడియోలో సోలో స్పెషల్ కలిగి ఉన్న అతికొద్ది మంది తెలుగు కమెడియన్లలో ఒకరు. ఆయన రాసిన ‘డియర్ జిమ్ క్యారీ’ వంటి షోలు ప్రేక్షకులను నవ్వించడమే కాకుండా భావోద్వేగానికి గురిచేస్తాయి. కేవలం నవ్వులకే పరిమితం కాకుండా, సమాజంలోని అంశాలను తనదైన శైలిలో విశ్లేషించే రాజశేఖర్, ఎంతోమంది యువ కళాకారులకు స్ఫూర్తిగా నిలుస్తున్నారు.