Union Budget 2026: తెలుగు రాష్ట్రాలకు దక్కినవి ఇవే!

Union Budget 2026: 2026-27 ఆర్థిక సంవత్సరానికి గాను కేంద్ర ప్రభుత్వం ప్రవేశపెట్టిన బడ్జెట్‌లో ఆంధ్రప్రదేశ్, తెలంగాణ రాష్ట్రాలకు సంబంధించి మిశ్రమ ఫలితాలు కనిపిస్తున్నాయి. మౌలిక సదుపాయాలు, పర్యాటక రంగానికి ప్రాధాన్యత లభించినప్పటికీ, కీలకమైన అమరావతి, మెట్రో ప్రాజెక్టులకు నిరాశే ఎదురైంది.

కేటాయింపులు, ప్రాజెక్టులు:
హైస్పీడ్ రైలు కారిడార్లు: హైదరాబాద్ కేంద్రంగా మూడు కీలక హైస్పీడ్ రైలు మార్గాలను ప్రతిపాదించారు.

• పూణే – హైదరాబాద్
• హైదరాబాద్ – బెంగళూరు
• హైదరాబాద్ – చెన్నై దీనివల్ల హైదరాబాద్‌తో పాటు దక్షిణ ఆంధ్రప్రదేశ్ ప్రాంతాలకు రవాణా సౌకర్యం మెరుగుపడనుంది.

పర్యాటక రంగం:

అరకు వ్యాలీ: ఎకో-ట్రయల్స్, మౌంటైన్ ట్రెక్కింగ్ పాయింట్‌గా అరకును అభివృద్ధి చేయనున్నారు.

పులికాట్ సరస్సు: ఇక్కడ బర్డ్-వాచింగ్ (పక్షుల సందర్శన) కేంద్రాన్ని ఏర్పాటు చేసి, స్థానికులకు ఉపాధి కల్పించేలా పర్యాటక క్లస్టర్‌ను నిర్మిస్తారు.

రేర్ ఎర్త్ , ఇండస్ట్రియల్ కారిడార్లు:  ఆంధ్రప్రదేశ్ తీర ప్రాంతంలో ఖనిజాల వెలికితీత, పరిశోధనల కోసం ‘రేర్ ఎర్త్ కారిడార్’ ఏర్పాటు చేయనున్నారు.

తూర్పు తీర పారిశ్రామిక కారిడార్ (పూర్వోదయ) ద్వారా ఏపీలోని ఓడరేవులు, పరిశ్రమలకు లబ్ధి చేకూరనుంది.

ఆశలు అడియాశలు, నిధులు లేని ప్రాజెక్టులు
బడ్జెట్‌లో కొన్ని కీలక అంశాలపై తెలుగు రాష్ట్రాలకు స్పష్టమైన హామీలు లభించలేదు.

అమరావతి: ఎకనామిక్ సర్వేలో అమరావతి ప్రస్తావన రావడంతో భారీ నిధులు వస్తాయని ఆశించినా, బడ్జెట్‌లో ప్రత్యేక కేటాయింపులేవీ జరగలేదు.

హైదరాబాద్ మెట్రో: మెట్రో విస్తరణ కోసం తెలంగాణ ప్రభుత్వం చేస్తున్న విజ్ఞప్తులకు కేంద్రం నుండి సానుకూల స్పందన లభించలేదు.

తెలంగాణ ప్రాజెక్టులు: రాష్ట్రంలోని ఇతర పెండింగ్ ప్రాజెక్టులకు కూడా ఆశించిన స్థాయిలో నిధుల కేటాయింపులు జరగకపోవడం గమనార్హం.

పర్యాటక, రవాణా రంగాల్లో తెలుగు రాష్ట్రాలకు గుర్తింపు లభించినప్పటికీ, రాజధాని నిర్మాణం, మెట్రో వంటి కీలక మౌలిక వసతుల విషయంలో మాత్రం కేంద్ర బడ్జెట్ మొండిచేయి చూపినట్లయింది.