మన దేశం తయారు చేసే ఆయుధాలకు ఇంత డిమాండా?!

ఒకప్పుడు భారత్ ఆయుధాలు కొనుగోలు చేసే దేశం. ఇప్పుడు అదే భారత్… ప్రపంచ దేశాలకు యుద్ధ సాంకేతికతను అమ్మే దేశంగా మారుతోంది. అందరూ BrahMos గురించే మాట్లాడుతుంటే, అసలు మార్పు మాత్రం ఇంకో చోట జరుగుతోంది.

భవిష్యత్ యుద్ధాలు క్షిపణులతో మాత్రమే గెలవవని ప్రపంచానికి తెలుసు. డ్రోన్లు, స్మార్ట్ మ్యూనిషన్స్, AI ఆధారిత ఆయుధాలే కొత్త యుద్ధ భాషగా మారుతున్నాయి. ఆ మార్పుకు తగ్గట్టే భారత్ తన డిఫెన్స్ పరిశ్రమను మార్చుకుంటోంది.

అందుకే 2025-26 ఆర్థిక సంవత్సరంలో భారత రక్షణ ఎగుమతులు ₹38,424 కోట్ల రికార్డుకు చేరాయి. ఒక్క ఏడాదిలోనే 62.66 శాతం వృద్ధి నమోదైంది. ఇప్పుడు భారత రక్షణ ఉత్పత్తులు 80కిపైగా దేశాలకు చేరుతున్నాయి. అలాగే డిఫెన్స్ ఎక్స్‌పోర్ట్ చేసే భారతీయ కంపెనీల సంఖ్య కూడా 128 నుంచి 145కు పెరిగింది. ప్రభుత్వ లక్ష్యం కూడా మరింత పెద్దదే. 2029-30 నాటికి ₹50,000 కోట్ల డిఫెన్స్ ఎక్స్‌పోర్ట్స్ సాధించాలని లక్ష్యంగా పెట్టుకుంది.

BrahMos ఇప్పటికీ భారత్‌కు గర్వకారణమే. ఫిలిప్పీన్స్ ఇప్పటికే కొనుగోలు చేయగా, ఇండోనేషియా ఒప్పందం చేసుకుంది. థాయ్‌లాండ్ కూడా ఆసక్తి చూపుతోంది. కానీ రేపటి మార్కెట్‌ను నడిపించేది BrahMos ఒక్కటే కాదని నిపుణులు చెబుతున్నారు.

నోయిడాకు చెందిన IG Defence రూపొందించిన KAL డ్రోన్ దీనికి ఉదాహరణ. వెయ్యి కిలోమీటర్ల వరకు ప్రయాణించే ఈ డ్రోన్‌తో పాటు Pinaka, Akash, ATAGS, కౌంటర్ డ్రోన్ సిస్టమ్స్, స్మార్ట్ గైడెన్స్ టెక్నాలజీలకు ప్రపంచ మార్కెట్‌లో డిమాండ్ పెరుగుతోంది.

అసలు భారత్ ఎగుమతి చేస్తున్నది కేవలం ఆయుధాలు కాదు… వాటిని మరింత కచ్చితంగా, తెలివిగా పనిచేసే టెక్నాలజీ కూడా. ఇదే భారత రక్షణ రంగంలో కొత్త అధ్యాయం. ఒకప్పుడు “Make in India” అంటే దేశీయ అవసరాలు గుర్తొచ్చేవి. ఇప్పుడు “Made in India” అంటే ప్రపంచ భద్రతా మార్కెట్‌లో ఒక కొత్త బ్రాండ్ గుర్తుకొస్తోంది