బ్రాండ్ లోనూ మాస్టరే.. ? సచిన్ బ్రాండ్ వాల్యూ రూ. 1201.కోట్లు..!
- Published By: techteam
- August 7, 2026 / 12:55 PM IST
మాస్టర్ బ్లాస్టర్ .. క్రికెట్ దేవుడు సచిన్ టెండూల్కర్ .. క్రికెట్ కు వీడ్కోలు పలికి ఏళ్లు గడుస్తున్నా.. అతని క్రేజ్ మాత్రం అభిమానుల్లో అలాగే కొనసాగుతోంది.ఇప్పటికీ బ్రాండ్ విలువలో దేశంలోని టాప్ సెలబ్రిటీలతో పోటీ పడుతున్నాడు సచిన్. తాజాగా విడుదలైన ‘క్రోల్ ఇండియా సెలబ్రిటీ బ్రాండ్ వాల్యుయేషన్ 2025’ నివేదిక ప్రకారం సచిన్ బ్రాండ్ విలువ 125.9 మిలియన్ డాలర్లకు (సుమారు రూ. 1,201 కోట్లు) చేరింది. దీంతో అతడు దేశంలోనే టాప్-5లో స్థానం సంపాదించాడు. విశేషమేమిటంటే.. ఈ జాబితాలో టాప్-10లో నిలిచిన ఏకైక రిటైర్డ్ క్రీడాకారుడు సచిన్ కావడం. ఏటా అతని బ్రాండ్ విలువ పెరుగుతూనే ఉండటం గమనార్హం.
సచిన్పై ప్రజల్లో ఉన్న అపారమైన నమ్మకం, విశ్వసనీయత, తరగని కీర్తిప్రతిష్టలే ఈ స్థాయి బ్రాండ్ విలువకు కారణమని నిపుణులు విశ్లేషిస్తున్నారు. అందుకే వివిధ రంగాలకు చెందిన ప్రముఖ బ్రాండ్లు ఇప్పటికీ ఆయనతో ఒప్పందాలు చేసుకోవడానికి ఆసక్తి చూపుతున్నాయి.
‘గాడ్ ఆఫ్ క్రికెట్’గా, ‘మాస్టర్ బ్లాస్టర్’గా ప్రపంచవ్యాప్తంగా అభిమానులను సంపాదించుకున్న సచిన్కు ఈ స్థాయి బ్రాండ్ ఇమేజ్ రావడానికి మైదానంలో ఆయన సృష్టించిన అసాధారణ రికార్డులే పునాది. తన తరంలో అత్యంత సంపూర్ణమైన బ్యాటర్గా గుర్తింపు పొందిన సచిన్, అంతర్జాతీయ క్రికెట్లో 34,357 పరుగులు చేసి, అత్యధిక పరుగులు సాధించిన ఆటగాడిగా చరిత్రలో నిలిచిపోయాడు.
టెస్ట్ క్రికెట్లో అతని పేరిట ఎన్నో రికార్డులు పదిలంగా ఉన్నాయి. అత్యధికంగా 200 టెస్టు మ్యాచ్లు ఆడిన ఏకైక ఆటగాడు సచిన్. ఈ ఫార్మాట్లో 15,921 పరుగులు, 51 శతకాలు సాధించాడు. కేవలం 300 ఇన్నింగ్స్లలోనే 15,000 పరుగుల మైలురాయిని అత్యంత వేగంగా అందుకున్న ఘనత కూడా అతనిదే.
ఇక, వన్డే ఫార్మాట్లోనూ సచిన్ రికార్డుల మోత మోగించాడు. 22 ఏళ్ల సుదీర్ఘ కెరీర్లో ఒకే క్యాలెండర్ ఇయర్లో (1998) అత్యధికంగా 1,894 పరుగులు, 9 సెంచరీలు చేసిన రికార్డు ఇప్పటికీ చెక్కుచెదరలేదు. వన్డేల్లో 145 అర్ధశతకాలు, 2,016 ఫోర్లతో పాటు అత్యంత వేగంగా 18,000 పరుగులు (440 ఇన్నింగ్స్లు) పూర్తి చేసుకున్న ఆటగాడిగా నిలిచాడు. ఈ అసామాన్య ప్రతిభే అతడిని బ్రాండ్ ప్రపంచంలోనూ తిరుగులేని శక్తిగా నిలబెట్టింది.
