Rohit Sharma: రోహిత్ 2.0 వచ్చేశాడు.. మిగతా ఫ్రాంచైజీలకు వణుకే!
- Published By: Phanindra
- April 2, 2026 / 06:54 AM IST
ఐపీఎల్ (IPL 2026) 19వ సీజన్ను ముంబై ఇండియన్స్ మాజీ కెప్టెన్, ‘హిట్మ్యాన్’ రోహిత్ శర్మ (Rohit Sharma) కళ్లు చెదిరే సూపర్ ఇన్నింగ్స్తో ఆరంభించాడు. కోల్కతా నైట్ రైడర్స్ (KKR)తో జరిగిన మ్యాచ్లో రోహిత్ ఆకాశమే హద్దుగా చెలరేగిపోయాడు. కేవలం 38 బంతుల్లోనే 200కు పైగా స్ట్రైక్ రేట్తో విరుచుకుపడి 78 పరుగులు సాధించి, ముంబై ఘన విజయంలో కీలక పాత్ర పోషించాడు. రోహిత్ ఆడిన ఈ విధ్వంసకర ఇన్నింగ్స్పై భారత స్పిన్ దిగ్గజం, మాజీ క్రికెటర్ అనిల్ కుంబ్లే (Anil Kumble) ప్రశంసల వర్షం కురిపించాడు. ఈ సీజన్లో ఐపీఎల్లోని మిగతా జట్లను కుంబ్లే సున్నితంగా హెచ్చరించాడు.
రోహిత్ 2.0.. ఇక జాగ్రత్త!
కోల్కతాపై రోహిత్ శర్మ (Rohit Sharma) ఆడిన విధానం చూశాక ఒక్కటే చెప్పాలనిపిస్తోందని, ‘రోహిత్ 2.0’ (Rohit Sharma) వచ్చేసిందని కుంబ్లే అన్నాడు. “క్రీజులో రోహిత్ బంతిని ఎదుర్కొన్న తీరు మిగతా జట్లకు ఒక స్పష్టమైన హెచ్చరిక పంపినట్లుగా ఉంది. అతడు తన అత్యుత్తమ ఫామ్లో ఉన్నప్పటి పాత రోజులను మళ్లీ గుర్తు చేశాడు. వరుణ్ చక్రవర్తి, సునీల్ నరైన్, బ్లెస్సింగ్ ముజరబాని లాంటి అత్యుత్తమ బౌలర్లపై ఆధిపత్యం ప్రదర్శించడం అంత సులువైన విషయం కాదు. కానీ, రోహిత్ (Rohit Sharma) తనదైన శైలిలో అలవోకగా సిక్సర్లు బాదేశాడు” అని కుంబ్లే చెప్పాడు.
ఇవి కూడా చదవండి
“తన ఫిట్నెస్పై అతడు చాలా శ్రమించినట్లు స్పష్టంగా కనిపిస్తోంది. సాధారణంగా కొంత విరామం తర్వాత మైదానంలోకి అడుగుపెడితే ఆ లయను అందుకోవడానికి ఏ ఆటగాడికైనా కనీసం ఐదారు రోజులు పడుతుంది. కానీ రోహిత్ చాలా ఫ్రెష్గా కనిపించాడు. ఈ ఐపీఎల్ సీజన్లో తన ఉద్దేశం ఏంటో తొలి మ్యాచ్లోనే బ్యాట్తో చెప్పేశాడు” అని కుంబ్లే విశ్లేషించాడు.
