మీరు ఈమెయిల్ పంపడం లేదు… ఒక AI మోడల్‌కు శిక్షణ ఇస్తున్నారు!

“ఈ మెయిల్ ఒక్కసారి చదివి వెంటనే డిలీట్ చేసేయ్” అని మీరు మీ సహోద్యోగికి పంపిన సీక్రెట్ మెసేజ్ గుర్తుందా? లేదా బాస్‌పై కోపంతో రాసి పంపిన అసలు అభిప్రాయం, క్లయింట్‌ను ఒప్పించడానికి పడిన పాట్లు, ఒక ప్రాజెక్ట్ ఫెయిల్ అయినప్పుడు వెతుక్కున్న సాకులు… ఇవన్నీ నిజంగానే డిలీట్ అయిపోయాయి అనుకుంటున్నారా? ఒక్కసారి ఆగి ఆలోచించండి. మీరు పంపే ప్రతి చిన్న మెసేజ్, డిలీట్ చేశామనుకునే ప్రతి ఈమెయిల్, ఏఐ మోడల్‌ను మరింత తెలివైనదిగా మార్చే మైండ్ గేమ్‌లో ఒక భాగంగా మారిపోతుంటే?

మన ఆఫీస్ చాట్లు.. AI కి పాఠాలు

ఇన్నాళ్లూ AI కంపెనీలు తమ మోడల్స్‌ను సిద్ధం చేయడానికి ఇంటర్నెట్‌లో దొరికే వికీపీడియా వ్యాసాలు, సోషల్ మీడియా పోస్టులు, పుస్తకాలు, వార్తలు వంటి బహిరంగ సమాచారాన్ని మాత్రమే వాడుకున్నాయి. కానీ ఇప్పుడు వాళ్లకు అది సరిపోవడం లేదు. మనుషులు నిజంగా లోపల ఎలా పనిచేస్తారు, ఒక సమస్య వచ్చినప్పుడు ఎలా నిర్ణయాలు తీసుకుంటారు, క్లయింట్స్‌తో ఎలా బేరసారాలు ఆడతారు అనే అసలైన “మానవ అనుభవం” ఉన్న డేటా కావాలి.

అలాంటి సమాచారం గూగుల్ సెర్చ్‌లోనో, రెడ్దిట్‌లలోనో దొరకదు కదా! అది కేవలం మన కంపెనీల ఈమెయిల్స్, ఆఫీస్ చాట్లు, మీటింగ్ రికార్డింగ్‌లలో మాత్రమే దాగి ఉంటుంది. అందుకే ఇప్పుడు AI కన్ను మన డిజిటల్ సంభాషణలపై పడుతోంది.

కోర్టుకెక్కిన రహస్య డేటా

ఇది ఏదో ఊహాగానం అనుకుంటే పొరపాటే. ఇటీవల అమెరికాలో దివాలా తీసిన ‘స్పిరిట్ ఎయిర్‌లైన్స్’ కి సంబంధించిన భారీ డేటాను గూగుల్ కొనుగోలు చేసేందుకు ప్రయత్నించడం పెద్ద వివాదంగా మారింది. ఆ కంపెనీకి చెందిన దాదాపు 10 కోట్ల ఈమెయిల్స్, 50 కోట్ల మైక్రోసాఫ్ట్ టీమ్స్ సందేశాలను దక్కించుకోవడానికి ప్రయత్నాలు జరుగుతున్నట్లు కోర్టు వివాదాల్లో బయటపడింది.

ఒక్కసారి ఆలోచించండి, 50 కోట్ల సంభాషణలు అంటే ఎంత పెద్ద ప్రపంచమో! అందులో ఎందరో ఉద్యోగులు ఆవేశంలో రాసిన వాక్యాలు, మేనేజర్లు తీసుకున్న సంచలన నిర్ణయాలు, ప్రాజెక్టులు విఫలమైనప్పుడు చెప్పుకున్న కారణాలు, కంపెనీ సంక్షోభంలో ఉన్నప్పుడు పడిన ఆరాటం అంతా రికార్డయి ఉంది.

కంపెనీ చరిత్ర కాదు.. డిజిటల్ మాస్టర్‌ప్లాన్

మన దృష్టిలో ఇవన్నీ కేవలం మనం రోజూ పంపుకునే సాధారణ సందేశాలు మాత్రమే కావచ్చు. కానీ ఒక AI మోడల్‌కు మాత్రం ఇవి “వ్యాపారం ఎలా చేయాలి?” అని నేర్పించే అతిపెద్ద పాఠ్యపుస్తకాలు. ఒక కంపెనీ దశాబ్దాల తరబడి ఎలా పనిచేసింది, లోపల ఉన్న ఉద్యోగులు ఎలా వ్యవహరించారో తెలిపే ఈ సమాచారం అంతా AI చేతికి వెళ్తే, అది కేవలం ఒక కంపెనీ చరిత్రగా మిగలదు. ప్రపంచంలో మనుషులు ఆఫీసుల్లో ఎలా ప్రవర్తిస్తారో పక్కాగా అర్థం చేసుకునే ఒక డిజిటల్ మైండ్‌ను తయారు చేస్తుంది.

ఈసారి మీరు ఆఫీస్ ల్యాప్‌టాప్ ముందు కూర్చుని, కీబోర్డ్ మీద వేగంగా వేళ్లు కదుపుతూ ఒక సీక్రెట్ మెయిల్ రాస్తున్నప్పుడు ఒక్క క్షణం ఆగి ఆలోచించండి. మీరు నిజంగా ఒక సహోద్యోగికి మెయిల్ పంపుతున్నారా, లేక భవిష్యత్తు AIకి మీ ఆఫీస్ ప్రపంచాన్ని ఉచితంగా నేర్పిస్తున్నారా?

—సూర్య ప్రకాష్ జోశ్యుల