AI కంపెనీలే… ట్రంప్ రాజకీయ జీవితాన్ని దెబ్బ కొడుతున్నాయా?

గత కొంతకాలంగా  అమెరికాలో AI రంగం వేగంగా ఎదగాలని ట్రంప్ ప్రభుత్వం ఫుల్ సపోర్ట్ ఇస్తూ వచ్చింది. అందులో భాగంగా పెద్ద పెద్ద టెక్ కంపెనీలకు నిబంధనల పేరుతో బ్రేకులు వేయకుండా, వీలైనంత స్వేచ్ఛ ఇచ్చింది. మరోవైపు సిలికాన్ వ్యాలీలోని బడా బిలియనీర్లు కూడా ట్రంప్‌కు దగ్గరయ్యారు. రాజకీయ ప్రచారానికి కోట్ల డాలర్లు ఖర్చు చేశారు. చూస్తుంటే ఇద్దరి మధ్య దోస్తీ బాగానే కుదిరినట్లు కనిపించింది. కానీ ఇప్పుడు సీన్ మారుతోంది.  ఇన్నాళ్లూ AI కంపెనీలకు అండగా నిలిచిన ట్రంప్ ఇప్పుడు వాటి కారణంగా ప్రజలకు సమాధానం చెప్పుకోవాల్సిన పరిస్థితి ఎదుర్కొంటున్నారు. అసలు ఆయనకు రాజకీయంగా ప్లస్ అవుతుందని భావించిన AI పరిశ్రమే ఇప్పుడు మైనస్‌గా మారే పరిస్ధితి వస్తోంది. ఎందుకిలా జరుగుతోంది. అసలు వెనక విషయం ఏమిటి

ట్రంప్‌తో AI కంపెనీల దోస్తీ వెనుక అసలు లెక్క ఇదే!

ఈ కథను అర్థం చేసుకోవాలంటే ముందు ట్రంప్, AI కంపెనీల మధ్య కుదిరిన అండర్‌స్టాండింగ్‌ను చూడాలి. AI కంపెనీలకు ఒకటే కావాలి. తమ టెక్నాలజీని వీలైనంత వేగంగా అభివృద్ధి చేసుకోవాలి. భారీ పెట్టుబడులు పెట్టాలి. కొత్త డేటా సెంటర్లు నిర్మించాలి. ప్రభుత్వం పదేపదే నిబంధనలు పెడితే ఈ స్పీడ్ తగ్గిపోతుంది. అందుకే AI కంపెనీలు ప్రభుత్వ నియంత్రణలు తగ్గించాలని కోరుకున్నాయి.

ట్రంప్‌కు కూడా ఇందులో మంచి పొలిటికల్, ఎకనామిక్ లెక్క కనిపించింది. AI రంగంలో అమెరికా చైనాను దాటేయాలి, టెక్నాలజీ రంగంలో ప్రపంచ ఆధిపత్యం కొనసాగాలి, దేశంలో భారీ పెట్టుబడులు రావాలి. ఈ లక్ష్యాలకు AI కంపెనీలు ఉపయోగపడతాయని ఆయన ప్రభుత్వం భావించింది. దీంతో AI అభివృద్ధికి ఎక్కువ స్వేచ్ఛ ఇచ్చే విధానాన్ని అనుసరించింది. అటు టెక్ బిలియనీర్లు కూడా ట్రంప్‌కు దగ్గరయ్యారు. Meta అధినేత మార్క్ జుకర్‌బర్గ్ వైట్‌హౌస్ బాల్‌రూమ్ ప్రాజెక్టుకు మిలియన్ల డాలర్లు విరాళంగా ఇచ్చారు. ట్రంప్ మాజీ సలహాదారును Meta అధ్యక్షురాలిగా నియమించుకుంది.

అంటే ఇద్దరికీ ఒకరి అవసరం మరొకరికి ఉంది. AI కంపెనీలకు ప్రభుత్వ మద్దతు కావాలి. ట్రంప్‌కు టెక్ పరిశ్రమ అండ కావాలి. కానీ ఈ లెక్కలో చిన్న సమస్య ఉంది. కంపెనీలకు లాభం వచ్చే ప్రతి నిర్ణయం ప్రజలకు కూడా లాభం చేస్తుందని గ్యారంటీ లేదు. ఇప్పుడు అదే తేడా బయటపడుతోంది.

AI కంపెనీల బిజినెస్ పెరుగుతోంది.. మరి సామాన్యుడి పరిస్థితి ఏంటి?

ChatGPT లాంటి AI టూల్స్ మరింత పవర్‌ఫుల్‌గా మారాలంటే వాటి వెనుక భారీ కంప్యూటింగ్ వ్యవస్థ ఉండాలి. అందుకోసం వేలాది సర్వర్లు, పెద్ద పెద్ద డేటా సెంటర్లు అవసరం. వీటిని నిర్మించడానికి కంపెనీలు బిలియన్ల డాలర్లు పెట్టుబడి పెడుతున్నాయి. అయితే ఈ డేటా సెంటర్లకు కావాల్సిన విద్యుత్ కూడా మామూలుగా ఉండదు. ఒక AI కంపెనీకి అది బిజినెస్ అవసరం కావచ్చు. కానీ ఆ ప్రాంతంలో నివసించే ప్రజలకు మాత్రం అది కొత్త సమస్యగా మారవచ్చు.

డేటా సెంటర్ల నిర్మాణం పెరిగితే విద్యుత్ డిమాండ్ కూడా పెరుగుతుంది. దాని ప్రభావం కరెంటు ధరలపై పడుతుందేమోనని అమెరికన్లు ఆందోళన చెందుతున్నారు. తమకు ఉపయోగపడని టెక్నాలజీ కోసం తాము ఎక్కువ విద్యుత్ బిల్లులు ఎందుకు కట్టాలనే ప్రశ్న కూడా వినిపిస్తోంది. AI కంపెనీలు భవిష్యత్తు కోసం భారీ సామ్రాజ్యాలు నిర్మించుకుంటుంటే, ఆ విస్తరణ వల్ల స్థానిక ప్రజలకు ఏం జరుగుతుందనే చర్చ మొదలైంది.

వాషింగ్టన్ పోస్ట్-ABC న్యూస్-Ipsos సర్వేలో మూడింట రెండొంతుల మంది అమెరికన్లు కొత్త డేటా సెంటర్ల నిర్మాణాన్ని వ్యతిరేకించారు. 57 శాతం మంది AI సమాజానికి మంచిది కాదని అభిప్రాయపడ్డారు. AI విషయంలో ట్రంప్ వ్యవహరిస్తున్న తీరును 67 శాతం మంది వ్యతిరేకించారు. అంటే AI కంపెనీలకు స్వేచ్ఛ ఇవ్వడం ఒకటైతే, ప్రజలు ఆ స్వేచ్ఛను ఎలా చూస్తున్నారనేది మరో సమస్యగా మారింది.

ఉద్యోగాలు తీసుకునే AI.. ఇప్పుడు ట్రంప్ ఓట్లకూ సమస్యేనా?

విద్యుత్ బిల్లుల సంగతి పక్కన పెడితే, AI వల్ల ఉద్యోగాల పరిస్థితి ఏంటనేది కూడా అమెరికాలో పెద్ద చర్చగా మారింది. ఇప్పటివరకు AI కంపెనీలు తమ టెక్నాలజీతో ప్రపంచాన్ని మార్చేస్తామని చెబుతున్నాయి. కానీ అదే టెక్నాలజీ వల్ల కొన్ని ఉద్యోగాలు తగ్గిపోవచ్చని, అనేక రంగాల్లో పని చేసే విధానం మారిపోవచ్చని పరిశ్రమలోని నాయకులే హెచ్చరిస్తున్నారు.

సాధారణంగా టెక్నాలజీ అభివృద్ధి చెందితే కొత్త ఉద్యోగాలు కూడా వస్తాయి. కానీ పాత ఉద్యోగాలు పోయినప్పుడు కొత్త అవకాశాలు అందరికీ వెంటనే దొరుకుతాయా? AI వల్ల ప్రయోజనం పొందేది కంపెనీనా, ఉద్యోగినా? ఈ ప్రశ్నలకు ఇంకా స్పష్టమైన సమాధానాలు లేవు. పైగా AI ఏజెంట్లు సైబర్ దాడులకు పాల్పడటం, ప్రభుత్వ, కార్పొరేట్ వెబ్‌సైట్లను హ్యాక్ చేయడం వంటి ఘటనలు భద్రతపై ఆందోళన పెంచుతున్నాయి.

ఇలాంటి సమయంలో AI కంపెనీలకు పూర్తి స్వేచ్ఛ ఇవ్వాలనే ట్రంప్ విధానం ప్రజల్లో చర్చకు వస్తోంది. ఎందుకంటే AI వల్ల వచ్చే లాభాల గురించి మాట్లాడటం సులభమే. కానీ దాని వల్ల ఉద్యోగం కోల్పోయిన వ్యక్తికి, పెరిగిన విద్యుత్ బిల్లు కట్టాల్సిన కుటుంబానికి సమాధానం చెప్పడం అంత ఈజీ కాదు.

ప్రజల్లో వ్యతిరేకత పెరుగుతుంటే.. ట్రంప్ కొత్త బ్రాండింగ్ ఎందుకు తెచ్చారు?

AIపై భయాలు పెరుగుతున్నాయని గుర్తించిన ట్రంప్ ప్రభుత్వం ప్రజల్లో టెక్నాలజీ పట్ల ఉన్న అభిప్రాయాన్ని మార్చేందుకు ప్రయత్నిస్తోంది. సెప్టెంబర్ చివర్లో సంతకం చేసిన ఎగ్జిక్యూటివ్ ఆర్డర్ ద్వారా AIని ‘సూపర్ ఇంటెలిజెన్స్’గా ప్రొజెక్ట్ చేయాలనే ప్రయత్నం చేసింది. అంటే AIలో ప్రమాదాలే కాకుండా, దాని వల్ల అమెరికాకు వచ్చే ప్రయోజనాలను కూడా ప్రజలు చూడాలన్నది ప్రభుత్వ ఆలోచన.

ఇదే సమయంలో ట్రంప్ దాదాపు రెండు డజన్ల మంది AI కంపెనీల ప్రముఖులతో వైట్‌హౌస్‌లో సమావేశమయ్యారు. Anthropic CEO డారియో అమోడీ, OpenAI అధ్యక్షుడు గ్రెగ్ బ్రాక్‌మన్, Nvidia CEO జెన్సన్ హువాంగ్ వంటి ప్రముఖులు ఇందులో పాల్గొన్నారు. AI మోడళ్ల భద్రతను బయటివారితో ఆడిట్ చేయించడం, కంపెనీలు కలిసి భద్రతా ప్రమాణాలను రూపొందించడం వంటి అంశాలపై ఒక ఒప్పందానికి వచ్చారు.

అయితే ఇందులో ఒక చిన్న మెలిక ఉంది. ఇది తప్పనిసరిగా పాటించాల్సిన ప్రభుత్వ చట్టం కాదు. కంపెనీలు స్వచ్ఛందంగా అనుసరించాల్సిన ఒప్పందం మాత్రమే. అంటే AI కంపెనీలకు మరింత స్వేచ్ఛ ఇవ్వాలనే ప్రభుత్వ విధానం పూర్తిగా మారలేదు. కానీ ప్రజల్లో పెరుగుతున్న భయాలను తగ్గించాల్సిన అవసరం మాత్రం ఏర్పడింది.

AI కంపెనీలు రాజకీయ నాయకుల వెనుక ఎందుకు ఇంత డబ్బు ఖర్చు చేస్తున్నాయి?

AI కంపెనీలకు ఇప్పుడు టెక్నాలజీతో పాటు పాలిటిక్స్ కూడా చాలా ఇంపార్టెంట్ అయిపోయింది. తమకు అనుకూలమైన ప్రభుత్వ విధానాలు కొనసాగాలంటే రాజకీయంగా కూడా బలంగా ఉండాలి. అందుకే అమెరికా మధ్యంతర ఎన్నికల ప్రచారంలో టెక్ పరిశ్రమకు సంబంధించిన రాజకీయ సంస్థలు 70 మిలియన్ డాలర్లకు పైగా ఖర్చు చేశాయి.

మార్క్ ఆండ్రీసెన్, బెన్ హోరోవిట్జ్ మద్దతున్న ‘లీడింగ్ ది ఫ్యూచర్’ సంస్థ AIపై తక్కువ నియంత్రణలు ఉండాలని ప్రచారం చేస్తోంది. మరోవైపు Anthropic, దాని CEO డారియో అమోడీ మద్దతున్న ‘పబ్లిక్ ఫస్ట్’ సంస్థ AI భద్రతకు ప్రాధాన్యత ఇస్తోంది. అంటే AI పరిశ్రమలోనే నియంత్రణల విషయంలో భిన్నమైన అభిప్రాయాలు ఉన్నాయన్నమాట.

కంపెనీల లాబీయింగ్ ఖర్చులు కూడా పెరిగాయి. Anthropic ఈ ఏడాది ఇప్పటివరకు 5.6 మిలియన్ డాలర్లు ఖర్చు చేసింది. గత ఏడాది ఇదే కాలంలో ఖర్చు 2.29 మిలియన్ డాలర్లు మాత్రమే. OpenAI కూడా ఈ ఏడాది మొదటి మూడు త్రైమాసికాల్లో దాదాపు 3.8 మిలియన్ డాలర్లు ఖర్చు చేసింది. గత ఏడాది ఇదే సమయంలో ఈ మొత్తం 2.1 మిలియన్ డాలర్లుగా ఉంది.

ఇక్కడ అసలు విషయం ఏంటంటే.. AI కంపెనీలు తమ టెక్నాలజీని మరింత పవర్‌ఫుల్‌గా మార్చడానికి ఒకవైపు పోరాడుతుంటే, మరోవైపు ఆ టెక్నాలజీపై ప్రభుత్వాలు ఎక్కువ నియంత్రణలు విధించకుండా చూసుకోవడానికి కూడా ప్రయత్నిస్తున్నాయి. భవిష్యత్తులో తమ బిజినెస్ ఎలా ఉండాలనేది టెక్నాలజీ మాత్రమే కాదు, రాజకీయ నిర్ణయాలు కూడా డిసైడ్ చేయబోతున్నాయి.

డెమోక్రాట్లు వస్తే AI కంపెనీలకు కష్టాలు మొదలవుతాయా?

నవంబర్ మధ్యంతర ఎన్నికలు ఇప్పుడు AI కంపెనీలకు కూడా చాలా కీలకం. డెమోక్రాట్లు కాంగ్రెస్‌లో తిరిగి ఆధిపత్యం సాధిస్తే ట్రంప్ ప్రభుత్వం ఇచ్చిన స్వేచ్ఛపై సమీక్ష మొదలయ్యే అవకాశం ఉంది. ప్రతినిధుల సభలో డెమోక్రాట్ల నాయకుడు హకీమ్ జెఫ్రీస్ AI కంపెనీలపై విచారణ జరిపేందుకు ప్రత్యేక కమిటీ ఏర్పాటు చేసే అంశాన్ని పరిశీలిస్తున్నారు.

ఈ కమిటీ ఏర్పాటైతే AI ఆధారిత సైబర్ దాడులు, డేటా సెంటర్ల వల్ల విద్యుత్ ధరలపై పడే ప్రభావం, కంపెనీల భద్రతా ప్రమాణాలు వంటి అంశాలు పరిశీలనకు రావచ్చు. సెనేటర్ బెర్నీ శాండర్స్ అయితే కొత్త డేటా సెంటర్ల నిర్మాణంపై దేశవ్యాప్తంగా తాత్కాలిక నిషేధం విధించాలని సూచించారు. కాలిఫోర్నియా కాంగ్రెస్ సభ్యుడు టెడ్ ల్యూ ప్రమాదకర పరిస్థితుల్లో AI మోడళ్లను ఆపగలిగే కిల్ స్విచ్ ఉండాలని ప్రతిపాదించారు.

అమెరికా మాజీ అధ్యక్షుడు బరాక్ ఒబామా కూడా AI భద్రతపై చర్చను ముందుకు తీసుకెళ్తున్నారు. ‘ప్రాజెక్ట్ బ్లూప్రింట్’ ద్వారా టెక్ కంపెనీలు, రాజకీయ నాయకులు కలిసి AIకి సంబంధించిన భద్రతా విధానాలను రూపొందించాలని ప్రయత్నిస్తున్నారు. అయితే డెమోక్రాట్లకు కూడా చైనాతో పోటీ విషయంలో ఆందోళన ఉంది. AIపై మరీ ఎక్కువ నియంత్రణలు విధిస్తే అమెరికా వెనుకబడిపోతుందనే భయం వారిలోనూ ఉంది. అందుకే AIని పూర్తిగా ఆపేయడం కాకుండా, దాని వేగానికి కొన్ని బ్రేకులు వేయాలనే చర్చ సాగుతోంది.

ట్రంప్‌కు అసలు టెన్షన్ ఇక్కడే ఉంది!

ఇప్పుడు ట్రంప్ ముందున్న పరిస్థితి కాస్త విచిత్రంగా ఉంది. AI కంపెనీలకు మద్దతు ఇస్తే వాటి వల్ల పెరుగుతున్న ప్రజా వ్యతిరేకతను ఎదుర్కోవాల్సి వస్తోంది. అదే కంపెనీలపై కఠినమైన నియంత్రణలు విధిస్తే అమెరికా టెక్నాలజీ ఆధిపత్యం కోసం తాను చెబుతున్న లక్ష్యాలకు ఇబ్బంది కలగవచ్చు. ఒకవైపు చైనాతో పోటీ, మరోవైపు సొంత దేశంలో ప్రజల ఆందోళనలు.. ఈ రెండింటి మధ్య ప్రభుత్వం బ్యాలెన్స్ చేయాల్సి వస్తోంది.

దీనికి తోడు OpenAI, Anthropic వంటి సంస్థలు భారీ IPOలకు సిద్ధమవుతున్నాయి. ఈ కంపెనీల విలువ ఒక్కొక్కటి ట్రిలియన్ డాలర్లకు పైగా ఉండవచ్చనే అంచనాలు ఉన్నాయి. ఇంతటి భారీ వ్యాపారాల భవిష్యత్తు ఇప్పుడు టెక్నాలజీ సామర్థ్యంతో పాటు ప్రభుత్వ విధానాలు, ప్రజల నమ్మకంపైనా ఆధారపడుతోంది. AI కంపెనీలు సోషల్ మీడియా సంస్థల మాదిరిగా తరచూ కాంగ్రెస్ విచారణలను ఎదుర్కొనే పరిస్థితి రావచ్చని న్యాయ నిపుణులు కూడా అభిప్రాయపడుతున్నారు.

ఇక్కడే ఈ కథలో అసలు మెలిక కనిపిస్తోంది. ట్రంప్‌కు రాజకీయంగా ఉపయోగపడతాయని భావించిన AI కంపెనీలే ఇప్పుడు ఆయన ప్రభుత్వానికి కొత్త ప్రశ్నలు తెచ్చిపెడుతున్నాయి. AI అభివృద్ధి వల్ల అమెరికాకు ఆర్థికంగా లాభం రావచ్చు. కానీ ఆ లాభాల కోసం ప్రజలు విద్యుత్ బిల్లులు, ఉద్యోగాల భద్రత, టెక్నాలజీ ప్రమాదాల విషయంలో ఆందోళన చెందితే ఆ ప్రభావం రాజకీయాలపై కూడా పడుతుంది.

ఒకప్పుడు ట్రంప్‌కు అండగా నిలిచిన AI బిలియనీర్లు ఇప్పుడు ఆయనకు రాజకీయంగా కొత్త తలనొప్పిగా మారుతున్నారు. AI కంపెనీలు ప్రపంచాన్ని మార్చడానికి బయలుదేరాయి. కానీ ఆ మార్పును అమెరికా ప్రజలు కోరుకుంటున్నారా? టెక్నాలజీని వేగంగా పరిగెత్తించాలనే ట్రంప్ ఆలోచనకు, ప్రజల భయాలకు మధ్య ఇప్పుడు అసలు పోటీ మొదలైంది. ఈ పోరులో ఎవరి ప్రయోజనాలు గెలుస్తాయన్నది అమెరికా రాజకీయాల్లో ఆసక్తికరమైన ప్రశ్నగా మారింది!