క్షుద్రపూజల రగడ.. రాజకీయ దిగజారుడుతనానికి పరాకాష్టా?

తెలంగాణ రాజకీయాలు రోజురోజుకూ సరికొత్త వివాదాలకు కేంద్రబిందువుగా మారుతున్నాయి. అభివృద్ధి, ప్రజా సమస్యలు, సంక్షేమ పథకాల అమలుపై జరగాల్సిన రాజకీయ చర్చ.. క్షుద్రపూజలు, అఘోరా యాగాల స్థాయికి దిగజారడం రాష్ట్ర రాజకీయ ముఖచిత్రాన్ని విస్మయానికి గురిచేస్తోంది. ములుగు జిల్లా వేదికగా ముఖ్యమంత్రి రేవంత్ రెడ్డి ప్రతిపక్ష బీఆర్ఎస్ నేతలను టార్గెట్ చేస్తూ చేసిన అఘోరా పూజల వ్యాఖ్యలు, దానికి మాజీ మంత్రి హరీష్ రావు ఇచ్చిన ఘాటు కౌంటర్ ఇప్పుడు రాష్ట్రవ్యాప్తంగా తీవ్ర రాజకీయ దుమారాన్ని రేపుతున్నాయి.

ములుగులో ఆదివారం జరిగిన బహిరంగ సభలో ముఖ్యమంత్రి రేవంత్ రెడ్డి నేరుగా ప్రతిపక్ష బీఆర్ఎస్ అగ్రనేతలను లక్ష్యంగా చేసుకుని తీవ్రస్థాయిలో విరుచుకుపడ్డారు. బీఆర్ఎస్ పార్టీకి చెందిన ఒక కీలక ‘మేనల్లుడు’ పొరుగు రాష్ట్రాలైన కర్ణాటక, తమిళనాడులకు వెళ్లి అఘోరా పూజలు, క్షుద్ర తంత్రాలు చేయించారని ఆరోపించారు. తెలంగాణలో వర్షాలు కురవకూడదని, కరవు తాండవించాలని, తద్వారా కాంగ్రెస్ ప్రభుత్వానికి చెడ్డపేరు రావాలని కోరుకుంటూ ఈ క్షుద్ర క్రియలకు పాల్పడ్డారని సీఎం విమర్శించారు. “ప్రజలు చనిపోయినా పర్వాలేదు.. ప్రభుత్వానికి చెడ్డపేరు రావాలన్నదే వారి కుట్ర. ఎన్ని క్షుద్రపూజలు చేసినా భగవంతుడు ప్రజాపక్షాన నిలబడ్డాడు కాబట్టే వర్షాలు సమృద్ధిగా కురిసి ఎల్లంపల్లి ప్రాజెక్ట్ నిండింది” అంటూ రేవంత్ రెడ్డి తీవ్ర పదజాలంతో ధ్వజమెత్తారు.

సీఎం రేవంత్ రెడ్డి చేసిన ఈ ఆరోపణలపై మాజీ మంత్రి, సిద్దిపేట ఎమ్మెల్యే హరీష్ రావు తక్షణమే స్పందించారు. ఈ వ్యాఖ్యలను పూర్తిగా నిరాధారమైనవిగా, రాజకీయ దిగజారుడుతనంగా కొట్టిపారేశారు. పాలనా వైఫల్యాలు, ప్రజలకు ఇచ్చిన హామీల అమలు నుంచి ప్రజల దృష్టిని మళ్లించడానికే ముఖ్యమంత్రి స్థాయి వ్యక్తి ఇలాంటి చౌకబారు ప్రచారాలకు దిగుతున్నారని ఎద్దేవా చేశారు. “ఇలాంటి వ్యక్తిగత దాడులకు, చిల్లర రాజకీయాలకు నేను భయపడను. రైతులు, విద్యార్థులు, సామాన్య ప్రజల పక్షాన ప్రభుత్వాన్ని నిలదీస్తూనే ఉంటాను” అని స్పష్టం చేశారు. తనపై నిరాధారమైన ఆరోపణలు చేస్తే ఊరుకునేది లేదని, కోర్టుల ద్వారా న్యాయపరమైన చర్యలు తీసుకుంటానని హెచ్చరించారు. ఇప్పటికే తనపై ఇలాంటి ఆరోపణలు చేసినందుకు పీసీసీ అధ్యక్షుడు మహేష్ కుమార్ గౌడ్, ఎమ్మెల్సీ అద్దంకి దయాకర్, కాంగ్రెస్ అధికార ప్రతినిధి సామ రామ్మోహన్ రెడ్డిలకు లీగల్ నోటీసులు పంపిన విషయాన్ని ఆయన గుర్తుచేశారు.

తెలంగాణ కాంగ్రెస్, బీఆర్ఎస్ మధ్య సాగుతున్న ఈ ఘర్షణ కేవలం రెండు పార్టీల ఆరోపణలకే పరిమితం కాలేదు. దీని వెనుక వ్యూహాత్మక రాజకీయ ఎత్తుగడలు స్పష్టంగా కనిపిస్తున్నాయి. బీఆర్ఎస్ నేతలు రాష్ట్ర క్షేమాన్ని కోరుకోవడం లేదని, అధికారం కోసం రాష్ట్ర ప్రజలకు హాని తలపెట్టే స్థాయికి వెళ్లారనే భావనను ప్రజల్లో బలంగా నాటడం అధికార కాంగ్రెస్ వ్యూహంగా కనిపిస్తోంది. ఎన్నికల హామీలు, రుణమాఫీ, ఇతర పరిపాలనాపరమైన సమస్యలను ప్రభుత్వం సమర్థవంతంగా ఎదుర్కోలేకనే ‘చేతబడి’, ‘క్షుద్రపూజలు’ వంటి పాతకాలపు సెంటిమెంట్లను తెరపైకి తెచ్చి ప్రజలను తప్పుదోవ పట్టిస్తోందని బీఆర్ఎస్ ఎదురుదాడి చేస్తోంది. కాంగ్రెస్ నేతలు రాజకీయ సభల్లో పర్సెప్షన్ వార్ సాగిస్తుంటే, హరీష్ రావు లీగల్ నోటీసుల ద్వారా కాంగ్రెస్ నేతలను న్యాయపరంగా ఇరుకున పెట్టాలని చూస్తున్నారు.

రాష్ట్రంలో ప్రజా సమస్యలు, తాగునీరు, విద్య, ఉద్యోగాల కల్పనపై నిర్మాణాత్మక చర్చ జరగాల్సిన తరుణంలో, ప్రధాన పార్టీల మధ్య క్షుద్రపూజల చుట్టూ రాజకీయాలు నడవడం ప్రజాస్వామ్యానికి ఏమాత్రం ఆరోగ్యకరం కాదు. ఒకరిపై ఒకరు నైతికతను కోల్పోయి చేసుకుంటున్న ఈ వ్యక్తిగత ఆరోపణలు ప్రజాక్షేత్రంలో ఏ మేరకు ప్రభావం చూపుతాయో, ప్రజలు ఎవరి వాదనను విశ్వసిస్తారో వేచి చూడాల్సిందే.