Vijay Sai Reddy: పవన్ స్టైల్ లో విజయసాయిరెడ్డి.. ఈ స్కెచ్ ఎవరి కోసం?

విజయసాయిరెడ్డి (Vijay Sai Reddy) ప్రస్తుతం క్రియాశీల రాజకీయ నాయకుడిగా కాకుండా, ఒక విరామ దశలో ఉన్న వ్యక్తిగా చెప్పుకోవచ్చు. ఏడాది క్రితం రాజకీయాలకు విరామం ప్రకటించిన ఆయన, రైతుగా కొత్త జీవితం ప్రారంభించినట్టు వెల్లడించారు. అయితే తాజాగా చేసిన వ్యాఖ్యలు చూస్తే, ఈ విరామం శాశ్వతం కాదని స్పష్టమవుతోంది. త్వరలోనే తాను మళ్లీ రాజకీయాల్లో పూర్తిస్థాయిలో చురుగ్గా వ్యవహరిస్తానని ఆయన ప్రకటించారు. కానీ ఏ పార్టీ నుంచి, ఏ వేదిక మీద రాజకీయ ప్రయాణం తిరిగి ప్రారంభమవుతుందన్నది మాత్రం స్పష్టంగా చెప్పలేదు.

ఇటీవల రెడ్డి సామాజిక వర్గ సమావేశంలో ఆయన చేసిన ప్రసంగం ఇప్పుడు రాజకీయ వర్గాల్లో పెద్ద చర్చకు దారి తీసింది. దేశం, ధర్మం, భారతీయ సంస్కృతి గురించి ఆయన గట్టిగా మాట్లాడారు. హిందూ ధర్మాన్ని కాపాడుకోవాల్సిన బాధ్యత ప్రతి ఒక్కరిపై ఉందని, ముఖ్యంగా ఈ బాధ్యత రెడ్డి సామాజిక వర్గంపై ఎక్కువగా ఉందని ఆయన వ్యాఖ్యానించారు. గత కొన్ని శతాబ్దాలుగా భారతీయ సంస్కృతిపై దాడులు జరుగుతున్నాయని, విదేశీ పాలన ముగిసినా ఆ ప్రభావం ఇంకా కొనసాగుతుందన్న అభిప్రాయాన్ని వ్యక్తం చేశారు.

ఈ వ్యాఖ్యలు సాధారణంగా బీజేపీ (BJP) భావజాలానికి దగ్గరగా ఉండటంతో, విజయసాయిరెడ్డి భవిష్యత్తు రాజకీయ దిశపై ఊహాగానాలు మొదలయ్యాయి. ఆయనకు కేంద్ర ప్రభుత్వ పెద్దలతో, ముఖ్యంగా బీజేపీ నాయకత్వంతో సాన్నిహిత్యం ఉందన్న ప్రచారం గతంలోనూ ఉంది. ఇప్పుడు అదే తరహా మాటలు ఆయన నోట రావడంతో, ఆయన రాజకీయ కార్యాచరణ ప్రణాళిక ఇప్పటికే సిద్ధమైందా అనే ప్రశ్నలు తలెత్తుతున్నాయి.

రెడ్డి జాతి గురించి కూడా ఆయన చేసిన వ్యాఖ్యలు ఆసక్తికరంగా మారాయి. రెడ్డి సమాజం ద్వేషించే జాతి కాదని, ప్రపంచాన్ని ప్రేమించే జాతి అని అన్నారు. సమాజాన్ని మతం పేరుతో విభజించడాన్ని ఆయన తీవ్రంగా విమర్శించారు. భారత్–పాకిస్తాన్ (India–Pakistan) క్రికెట్ మ్యాచ్‌ల సమయంలో మతం ఆధారంగా ఆలోచించే ధోరణి ప్రమాదకరమని చెప్పారు. అలాగే పహల్గాం (Pahalgam) వంటి ప్రాంతాల్లో అమాయకులపై జరిగిన దాడులను ప్రస్తావిస్తూ, ఇలాంటి ఘటనలను ఎట్టి పరిస్థితుల్లోనూ సమర్థించకూడదని వ్యాఖ్యానించారు.

భారత్‌తో పాటు పొరుగు దేశాల్లో హిందువులపై జరుగుతున్న దాడుల గురించి కూడా ఆయన ప్రస్తావించారు. దేశం భవిష్యత్తులో ఆఫ్ఘనిస్తాన్ (Afghanistan) లేదా పాకిస్తాన్ (Pakistan) తరహా పరిస్థితుల్లోకి వెళ్లకుండా ఉండాలంటే మత మార్పిడులను అడ్డుకోవాల్సిన అవసరం ఉందని అన్నారు. హిందూ ధర్మం అంతరించిపోకుండా చూడటం ప్రతి ఒక్కరి బాధ్యత అని ఆయన పిలుపునిచ్చారు.

సుమారు పదిహేను నిమిషాల పాటు సాగిన ఈ ప్రసంగంలో ఎక్కువగా కాషాయ భావజాలం ప్రతిఫలించిందని రాజకీయ విశ్లేషకులు అంటున్నారు. ప్రధాని నరేంద్ర మోదీ (Narendra Modi) ప్రభుత్వంపై విజయసాయిరెడ్డి గతంలోనూ సానుకూల వ్యాఖ్యలు చేసిన సందర్భాలు ఉన్నాయని గుర్తుచేస్తున్నారు. ఈ నేపథ్యంలో ఆయన బీజేపీ వైపు అడుగులు వేస్తున్నారా? రెడ్డి సామాజిక వర్గాన్ని తనకు అనుకూలంగా మలచుకునే ప్రయత్నమా? అన్న ప్రశ్నలు రాజకీయ వర్గాల్లో చర్చనీయాంశంగా మారాయి. ఒకరకంగా పవన్ కళ్యాణ్ తన వైఖరిని ఎలా మార్చుకున్నారో ఇప్పుడు విజయసాయిరెడ్డి కూడా అదే స్టైల్ లో మోదీ మెప్పు కోసం ప్రయత్నిస్తున్నారు అన్న వాదన కూడా గట్టిగా వినిపిస్తోంది.ఆయన మాటలకు, రాబోయే రోజుల్లో తీసుకునే చర్యలకు మధ్య ఉన్న సంబంధమే ఇప్పుడు అందరి దృష్టిని ఆకర్షిస్తోంది.