ఏపీలో ఎస్ఈసీ పరోక్ష ఎన్నికల షెడ్యూల్..!
- Published By: G Vencatesh
- November 10, 2026 / 02:10 PM IST
ఆంధ్రప్రదేశ్ గ్రామీణ ప్రాంతాల స్థానిక సంస్థల తుది సమరానికి సమయం ఆసన్నమైంది. రాష్ట్రంలోని మండల పరిషత్ అధ్యక్షులు, జిల్లా పరిషత్ ఛైర్మన్ల ఎంపిక కోసం రాష్ట్ర ఎన్నికల సంఘం (SEC) పరోక్ష ఎన్నికల షెడ్యూల్‌ను అధికారికంగా విడుదల చేసింది. ఇటీవల జరిగిన ఎంపీటీసీ, జెడ్పీటీసీ ఎన్నికలలో ప్రజాప్రతినిధులుగా గెలిచిన అభ్యర్థులు ఇప్పుడు తమ మండల, జిల్లా పరిషత్ బాస్‌లను ఎన్నుకోనున్నారు. ఈ మేరకు ఎన్నికల నిర్వహణకు సంబంధించిన అన్ని ఏర్పాట్లను పూర్తి చేయాలని ఎస్ఈసీ జిల్లాల యంత్రాంగాన్ని ఆదేశించింది.
ప్రకటించిన టైమ్‌లైన్ ప్రకారం.. ఈ నెల 19న రాష్ట్రంలోని 659 మండల పరిషత్‌లలో ఎంపీపీ అధ్యక్ష, ఉపాధ్యక్ష పదవుల భర్తీకి పరోక్ష ఎన్నికలు జరగనున్నాయి. అలాగే ఈ నెల 20వ తేదీన రాష్ట్రవ్యాప్తంగా ఉన్న 28 జిల్లా పరిషత్‌లలో ఛైర్‌పర్సన్, వైస్ ఛైర్‌పర్సన్ పదవుల భర్తీకి ఎన్నికలు నిర్వహిస్తారు. అయితే, ఈ ఎన్నికలు ప్రారంభం కావడానికి ముందే నిబంధనల ప్రకారం కో-ఆప్షన్ సభ్యుల ఎంపిక ప్రక్రియ పూర్తి చేస్తారు. ప్రతి ఎంపీపీలో ఒకరిని, అలాగే ప్రతి జడ్పీలో ఇద్దరి చొప్పున కో-ఆప్షన్ సభ్యులను తొలుత ఎన్నుకుంటారు.
ఈ పరోక్ష ఎన్నికల ఓటింగ్ విధానంపై ఎస్ఈసీ అత్యంత కీలకమైన స్పష్టతనిచ్చింది. ఈ ఎంపిక ప్రక్రియలో స్థానిక శాసనసభ్యులు (MLAs), పార్లమెంట్ సభ్యులు (MPs), శాసనమండలి సభ్యులు (MLCs) పాల్గొనేందుకు అవకాశం ఉన్నప్పటికీ, వారికి అధ్యక్ష, ఛైర్మన్ పదవుల ఎన్నికల్లో ఓటు వేసే హక్కు మాత్రం ఉండదు. కేవలం ప్రజల చేత నేరుగా ఎన్నికైన ఎంపీటీసీ, జెడ్పీటీసీ సభ్యులు మాత్రమే ఓటు వేసి తమ పరిషత్ అధినేతలను ఎన్నుకుంటారు. ఈ పరోక్ష ఎన్నికల సందర్భంగా పార్టీలు జారీ చేసే ‘విప్’ జారీ చేసే నిబంధనలు వర్తిస్తాయని, ఎవరైనా పార్టీ ఆదేశాలను ఉల్లంఘిస్తే వారి సభ్యత్వం రద్దవుతుందని అధికారులు హెచ్చరించారు.
