Payyavula Keshav: శ్రీవారి ప్రసాదంపై అపచారం? సిట్ రిపోర్టుపై పయ్యావుల కేశవ్ వైరల్ స్టేట్మెంట్..

సుప్రీం కోర్టు (Supreme Court) ఆదేశాల మేరకు తిరుమల లడ్డూలో (Tirumala Laddu) నెయ్యి కల్తీ వ్యవహారంపై సీబీఐ (CBI) ఆధ్వర్యంలో ఏర్పాటైన ప్రత్యేక దర్యాప్తు బృందం (SIT) నివేదిక తాజాగా వెలుగులోకి వచ్చింది. ఈ నివేదిక బయటకు వచ్చిన తర్వాత రాష్ట్ర రాజకీయాల్లో తీవ్ర దుమారం నెలకొంది. అధికార టీడీపీ (TDP), ప్రతిపక్ష వైసీపీ (YSRCP) నేతల మధ్య పరస్పర ఆరోపణలు మొదలయ్యాయి. ఈ నేపథ్యంలో ఆర్థిక శాఖా మంత్రి పయ్యావుల కేశవ్‌ (Payyavula Keshav) కీలక వ్యాఖ్యలు చేశారు.

సిట్‌ నివేదికలో చాలా షాకింగ్ విషయాలు బయటపడ్డాయని ఆయన తెలిపారు. ముఖ్యంగా నెయ్యి సరఫరా విషయంలో వైసీపీ ప్రభుత్వ హయాంలో టెండర్ నిబంధనలు పూర్తిగా ఉల్లంఘించారని ఆరోపించారు. లడ్డూ తయారీలో ఉపయోగించిన నెయ్యిలో రసాయనాలు (Chemicals), కృత్రిమ ఫ్లేవర్స్‌ (Flavours) కలిపినట్లు నివేదికలో స్పష్టంగా ఉందని చెప్పారు. ఇది శ్రీవారి పవిత్రతకు తీవ్ర అపచారమని ఆయన వ్యాఖ్యానించారు.

వైసీపీ నేతలు ఈ కల్తీని సహజమైన విషయంలా మాట్లాడుతున్నారని విమర్శించారు. శ్రీవారి ప్రసాదానికి సంబంధించిన విషయంలో ఇలాంటి నిర్లక్ష్యం ఎలా జరుగుతుందో ప్రజలు ఆలోచించాలన్నారు. నెయ్యిలో జంతు కొవ్వు అవశేషాలు (Animal Fat Residues) ఉన్నాయని ముఖ్యమంత్రి చంద్రబాబు నాయుడు‌ (N. Chandrababu Naidu) చెప్పిన తర్వాతే ఈ అంశం పెద్ద చర్చగా మారిందని గుర్తు చేశారు. అయితే ఆ వ్యాఖ్యలు సీఎం వ్యక్తిగత అభిప్రాయం కాదని, ఎన్‌డీటీబీ (NDDB – National Dairy Development Board) నివేదికలో ఉన్న విషయాలనే ఆయన ప్రజల ముందుకు తీసుకొచ్చారని స్పష్టం చేశారు.

నెయ్యికి చేసిన పరీక్షల్లో ‘ఎస్ వాల్యూ’ (S Value)లో తేడాలు ఉన్నాయని, దీని ఆధారంగా కల్తీ జరిగి ఉండే అవకాశముందని సిట్ నివేదికలో పేర్కొన్నట్టు మంత్రి వివరించారు. సోయాబీన్ ఆయిల్ (Soybean Oil), కొబ్బరి నూనె (Coconut Oil), పామ్ ఆయిల్ (Palm Oil), ఫిష్ ఆయిల్ (Fish Oil), లార్డ్ (Lard) వంటి పదార్థాల అవశేషాలు ఉండే అవకాశం ఉందని నివేదిక సూచించిందన్నారు.

వైసీపీ పాలనలో 2022 ఆగస్టు 3న బీటా సిటోస్టెరాల్‌ (Beta-Sitosterol) ఉన్నట్లు రిపోర్టు వచ్చినప్పటికీ అదే సరఫరాను కొనసాగించారని ఆరోపించారు. అప్పుడే చర్యలు తీసుకోకుండా తప్పును కప్పిపుచ్చుకునే ప్రయత్నం చేశారని విమర్శించారు. ఉద్దేశ్యపూర్వకంగానే నకిలీ పత్రాలు (Fake Documents) ఉపయోగించి నెయ్యి టెండర్లు కేటాయించారని, ఈ ప్రక్రియలో భాగమైన వారందరినీ నేరస్థులుగా పరిగణిస్తామని చెప్పారు.

ఈ కల్తీ వ్యవహారంలో సుబ్బారెడ్డి (Subba Reddy), ధర్మారెడ్డి (Dharma Reddy) సహా పలువురు అధికారులు పాత్ర ఉన్నట్లు సిట్ గుర్తించిందన్నారు. బాలాజీ (Balaji), సింఘాల్‌ (Singhal) వంటి అధికారులపై కూడా చర్యలు తీసుకోవాలని సిఫార్సు చేసినట్లు తెలిపారు. తప్పు చేసిన వారిపై కఠిన చర్యలు తప్పవని, శ్రీవారి పవిత్రతను కాపాడటమే తమ ప్రభుత్వ ప్రధాన లక్ష్యమని మంత్రి పయ్యావుల కేశవ్ స్పష్టం చేశారు.