TDP: పల్లాకు మంత్రి పదవి.. టీడీపీకి కొత్త సారథి?
- Published By: Vasishta
- March 28, 2026 / 09:18 AM IST
తెలుగుదేశం పార్టీలో వ్యవస్థాగత మార్పులకు రంగం సిద్ధమైనట్లు తెలుస్తోంది. ప్రస్తుతం రాష్ట్ర అధ్యక్షుడిగా ఉన్న పల్లా శ్రీనివాసరావు పదవీ కాలం రెండేళ్లు పూర్తి కావస్తుండటంతో, కొత్త అధ్యక్షుడి నియామకంపై పార్టీ అధిష్టానం కసరత్తు ముమ్మరం చేసినట్లు సమాచారం. అదే సమయంలో మంత్రివర్గ పునర్వ్యవస్థీకరణ చేపట్టే అవకాశం కూడా ఉందని తెలుస్తోంది. అందులో భాగంగా పల్లా శ్రీనివాసరావుకు మంత్రి పదవి వరించే అవకాశం ఉందని సమాచారం.
టీడీపీ అధ్యక్ష పదవిని ఈసారి బీసీ సామాజిక వర్గానికి చెందిన నేతకు దక్కే అవకాశం ఉంది. ఈ రేసులో ప్రస్తుతం ముగ్గురు సీనియర్ నేతల పేర్లు ప్రముఖంగా వినిపిస్తున్నాయి. మంత్రులు కొల్లు రవీంద్ర, అచ్చెన్నాయుడు, అనగాని సత్యప్రసాద్ లలో ఒకరికి టీడీపీ అధ్యక్ష పగ్గాలు చేపట్టే అవకాశం కనిపిస్తోంది. పార్టీకి, ప్రభుత్వానికి మధ్య సమన్వయకర్తగా ఉంటూ, రాబోయే ఎన్నికలకు పార్టీని సమరోత్సాహంతో నడిపించే సత్తా ఉన్న నేత కోసం చంద్రబాబు అన్వేషిస్తున్నారు. మహానాడు లోపు పూర్తిస్థాయి రాష్ట్ర కమిటీని ప్రకటించే అవకాశం ఉంది. ఇప్పటికే జిల్లా, నియోజకవర్గ, మండల కమిటీల ఎన్నికల ప్రక్రియ పూర్తవ్వగా, కేవలం రాష్ట్ర కార్యవర్గ ఎంపిక మాత్రమే పెండింగ్లో ఉంది.
గాజువాక నుంచి రాష్ట్రంలోనే అత్యధిక మెజారిటీతో ఎమ్మెల్యేగా గెలుపొందిన పల్లా శ్రీనివాసరావు, గత రెండేళ్లుగా పార్టీ అధ్యక్షుడిగా వివాదరహితంగా పనిచేశారు. అధిష్టానానికి, క్షేత్రస్థాయి నాయకులకు మధ్య వంతెనలా ఉంటూ పార్టీ బలోపేతానికి కృషి చేశారు. వాస్తవానికి కూటమి ప్రభుత్వం ఏర్పడిన తొలి విడతలోనే ఆయనకు మంత్రి పదవి దక్కుతుందని అనుకున్నారు. అయితే సామాజిక సమీకరణాల వల్ల అది సాధ్యపడలేదు. ప్రస్తుతం ఆయన పనితీరు పట్ల ముఖ్యమంత్రి చంద్రబాబు సంతృప్తిగా ఉన్నారని, త్వరలో జరగబోయే మంత్రివర్గ మార్పుల్లో పల్లాకు క్యాబినెట్ బెర్త్ ఖచ్చితంగా దక్కుతుందని పార్టీ వర్గాలు బలంగా విశ్వసిస్తున్నాయి.
జూన్ నాటికి కూటమి ప్రభుత్వం అధికారంలోకి వచ్చి రెండేళ్లు పూర్తికానుంది. ఈ నేపథ్యంలో పనితీరు సరిగా లేని ఇద్దరు ముగ్గురు మంత్రులను తప్పించి, వారి స్థానంలో కొత్తవారికి అవకాశం కల్పించాలని చంద్రబాబు యోచిస్తున్నారు. 2029 ఎన్నికల దిశగా పార్టీని, ప్రభుత్వాన్ని మరింత పటిష్టం చేయడం ఆయన లక్ష్యంగా ఉంది. వచ్చే నెల రెండో వారంలోగా రాష్ట్ర కార్యవర్గంపై పూర్తి స్పష్టత వచ్చే అవకాశం ఉంది.
మొత్తానికి, మే నెలలో జరగబోయే మహానాడు వేడుకల నాటికి టీడీపీలో కొత్త అధ్యక్షుడి ఎంపికతో పాటు, ప్రభుత్వంలో కొత్త మంత్రుల చేరికపై పూర్తి క్లారిటీ రానుంది. బీసీ వర్గాలకు పెద్దపీట వేసే ఆనవాయితీని కొనసాగిస్తూనే, సమర్థులైన నేతలకు కీలక బాధ్యతలు అప్పగించేలా చంద్రబాబు వ్యూహరచన చేస్తున్నారు.
